22
Lee fo oen maneni masodak, ma ai huuk mana neni masodak
1 Basa boe ma, ata maneme nusa-sodak mai, ana natudu au lee esa, fo oen neni masodak. Oe ndia neu ndoos sama leo titilok ia. Oe ndia faa kalua neme Manetualain ma Biꞌilombo Ana kadela mana palendan mai.✡ Yeskial 47:1; Sakarias 14:8 2 Boe ma, ana faa neni okofo inahuuk ndia laladan fo manai kota ndia. Nai lee ndia, bifin dua sala hambu ai huuk maneni masodak. Ai ndia, naboa teuk esa, laꞌi sanahulu dua, bulak esa, na laꞌi esa. Doon bisa dadik akidook, fo tao nahai basa hataholi nusa kala malai daebafok.✡ Tutuik laꞌeneu Sososan 2:9 3 Te basa hata fo Manetualain timba henin, ma Ana sumba-soo sala, na taa lai kota ndia. Manai ndia kala, na kada Manetualain ma Biꞌilombo Ana langgatuuk toꞌu palenda lai Sila kadela mana palendan, lo basa hataholi mana ono-lau ma lakaluku-lakatele leu Sala.✡ Sakarias 14:11
4 Sila basa sala bisa lita Manetualain matan. Ma Manetualain naden nana sulak nai sila oda-mata nala. 5 Nai ndia, leꞌodaek taa. De, Manetualain hataholi nala, tala paluu ledo, do banduk, huu Manetualain mesa kana tao manggaledo kota ndia. Mateꞌen, ala toꞌu noꞌu palenda nai ndia, losa dodoon neu.✡ Yesaya 60:19; Daniel 7:18
Lamatuak Yesus nateꞌe Ndia hehelun
6 Boe ma, Manetualain atan ndia nafada au, nae, “Basa hata fo au afadak o ia, memak tetebes. Basa hataholi la bisa lamahele au kokolang ndia. Makahulun, Manetualain pake Ndia Dula Dalen, fo nafada Ndia Dedeꞌa-kokolan neu mana kokola nala. Tehuu hatematak ia, Ana pake atan maneme nusa-sodak mai, fo lafada Ndia ana nala, laꞌeneu basa dedeꞌa kala ia, fo ta dook so te musi dadi.”
7 Basa ndia, boe ma Yesus kokolak, nae, “Masanenedak baa! Ta dook so, te Au mai. Nai susulak ia, nana sulak basan, laꞌeneu hata fo neu ko ana dadi. Basa hataholi la fo mana tungga susulak ia isin, neu ko ala laua-lanale lalan seli.”
8 Mana sulak susulak ia, na ndia au, Yohanis. Au ia, mana mamanenek, ma au ita basa dedeꞌa kala ia. Amanene basa leondia, boe ma au sendek lunggulanggang, fo au akaluku-akatele neu ata nusa-sodak ndia matan, huu ana natudu au, basa dedeꞌa kala ia. 9 Tehuu ana kaꞌi au, nae, “Wei! O boso tao leondiak! O musi makaluku-makatele neu kada Manetualain. Boso makaluku-makatele neu au. Te au boe Manetualain atan, sama leo o mua o tolanoom. Sila ndia, na, Ndia mana kokola nala, ma basa hataholi fo mana tao tungga hata fo nana sulak nai susulak ia.
10 O boso mafuni susulak ia isin, neu hataholi feꞌek. Te ta dook so bali, basa nana sulak nai susulak ia, neu ko ana dadi.
11 Basa hataholi mana tao manggenggeok, na,
sokolaa sala leu ndia, fo ala lambue tao manggenggeok lakandoo.
Tehuu, basa mana masoda malalaok,
ala musi lasoda malalaok lakandoo.
Basa hataholi mana tao manggalauk,
sokolaa sala leu ndia, fo lasambute tao manggalauk lakandoo.
Tehuu basa mana tao malole,
sila musi tao malole lakandoo.”✡ Daniel 12:10
12 Basa ndia, boe ma Yesus kokolak seluk bali, nae, “Masaneda neulalau bou! Ta dook so bali, te Au mai. Neu ko Au bala basa hataholi la, tungga hata fo ala ue-taon so.✡ Yesaya 40:10; 62:11; Sosoda Koa-kio kala 28:4; Yermia 17:10
13 Au ia,
Alfa losa Omega.* Tungga hataholi Yunani la, na, Alfa ndia huruf makasososak, ma Omega ndia na huruf mateꞌek.
Au ia,
uma A mai, losa Z.
Basan natahuhuun neme Au mai,
mulai neme sososan mai losa babasan.✡ Dae-bafok Mata Beuk 1:8; Yesaya 44:6; 48:12; Dae-bafok Mata Beuk 1:17; 2:8
14 Hataholi la fo mana safe lalalao baloꞌan nala, laua-lanale lalan seli.
Te neu ko ala hambu hak, fo maso tungga lelesu ina leni kota ndia dalek leu.
Hataholi la fo lasoda malalaok so, na laua-lanela lalan seli.
Te neu ko ala hambu nakamboꞌik, fo laꞌa ai boak ndia, fo ana tao hataholi nasoda nakandondoo henin.✡ Tutuik laꞌeneu Sososan 2:9; 3:22
15 Tehuu, hataholi feꞌek, na, taa bole maso neni ndia neu.
Te Manetualain ta hataholin, na, ta bole leo nai ndia.
Fo ndia, de hataholi fo ta namahele neu Manetualain,† Susula Malalaok dedeꞌa Yunani nana sulak, nae, “busa”. Hataholi Yahudi lahiik ala pake dedeꞌa deꞌek “busa,” fo ana dadik neu nakandandaak, fo natudu neu hataholi taa Yahudi, fo ndia hataholi feꞌe kala “taa mana mamahele Manetualain”. Nai lalanek ia Yohanis ana kokolak laꞌeneu bubuak mata-matak fo tala maso leni nusa-sodak leu. Kaesan ndia “hataholi taa mana mamahele Manetualain”. Ia taa dedeꞌak laꞌeneu busa ana maso nusa-sodak do taa.
hataholi kalabik, mana songgok,
mana makanisak, kamodo mamates,
masapepekok.
Basa sila, taa bole maso.
Sila basa sala, ela sala kada leme deak.
16 Au ia, Yesus. Au ndia haitua Au atang neme nusa-sodak mai, fo atudu basa dedeꞌa kala ia, suek ei miu mafada Au hehelung ia, neu salani kahitu kala sila.
Au ia, mane Dauk tititi-nonosin.
Au ia, Manek mana toꞌu palenda.
Au saꞌang manggaledo ndoos,
sama leo Nduu Lolembilak.
Au saꞌang tanden seli,
sama leo Nduu Lolembilak.”✡ Yesaya 11:1, 10
17 Manetualain Dula Dalen noke nae, “Mai ia leo!”
Lamatuak Yesus ina mana kabin boe, noke, nae, “Mai leo!”
Basa mana mamanene kala boe, langgou tungga lae, “Mai leo!”
See mana maa mada, na, mai minu leo!
Basa mana nau ninu oe fo maneni sodak,
na, mai ndui leo!
Hataholi bole ndui nala oe ndia
no mudak.
Bole minu oe ndia
ta no babaek.✡ Yesaya 55:1
Yohanis hehelu mateꞌen
18 Au ia, Yohanis. Au fee nasanenedak neu basa hataholi la, fo dei fo lamanene susulak ia isin. Manetualain natudu memak neu au basa hata ia, mete ma hambu hataholi tamba seluk hata-hata bali nai susulak ia, neu ko Manetualain huku nakadaik ndia, nenik soe kahitu kala, fo Ana ngganggan neni daebafok mai. 19 Ma mete ma, hambu hataholi tao ta manadaik hata-hata bali nai susulak ia, na, neu ko Manetualain feꞌa heni ndia hak, fo ta maso neni kota malalaok neu, ma ta naꞌa ai boak ndia, fo ana tao hataholi nasoda nakandondoo henin.✡ Tui Seluk laꞌeneu Dala Sodak 4:2; 12:32
20 Lamatuak Yesus mesa kana natudu basa dedeꞌa kala sila. Ana helu so, nae, “Tetebes ndia! Ta dook so bali, te Au mai so.”
Naa, Lamatuak Yesus, mai leo!
21 Au oke fo Lamatuak Yesus natudu Ndia dale malolen, neu basa Ndia hataholi nala. Amin!
Neme au mai,
Yohanis
✡22:1 Yeskial 47:1; Sakarias 14:8
✡22:2 Tutuik laꞌeneu Sososan 2:9
✡22:3 Sakarias 14:11
✡22:5 Yesaya 60:19; Daniel 7:18
✡22:11 Daniel 12:10
✡22:12 Yesaya 40:10; 62:11; Sosoda Koa-kio kala 28:4; Yermia 17:10
*22:13 Tungga hataholi Yunani la, na, Alfa ndia huruf makasososak, ma Omega ndia na huruf mateꞌek.
✡22:13 Dae-bafok Mata Beuk 1:8; Yesaya 44:6; 48:12; Dae-bafok Mata Beuk 1:17; 2:8
✡22:14 Tutuik laꞌeneu Sososan 2:9; 3:22
†22:15 Susula Malalaok dedeꞌa Yunani nana sulak, nae, “busa”. Hataholi Yahudi lahiik ala pake dedeꞌa deꞌek “busa,” fo ana dadik neu nakandandaak, fo natudu neu hataholi taa Yahudi, fo ndia hataholi feꞌe kala “taa mana mamahele Manetualain”. Nai lalanek ia Yohanis ana kokolak laꞌeneu bubuak mata-matak fo tala maso leni nusa-sodak leu. Kaesan ndia “hataholi taa mana mamahele Manetualain”. Ia taa dedeꞌak laꞌeneu busa ana maso nusa-sodak do taa.
✡22:16 Yesaya 11:1, 10
✡22:17 Yesaya 55:1
✡22:19 Tui Seluk laꞌeneu Dala Sodak 4:2; 12:32