1 Tolanoo nggalei! Mamanene neulalau! Ei dale mala musi namahoko, huu ei nanambaꞌak mia Karistus. Mae au sulak bali-bali leo iak, tehuu au ta mbela fee nasanenedak neu ei, fo boso ei nana kedi nalak!

2 Mata neuk neu masapepeko kala, fo lakaseti hataholi, lae, “Ei musi tungga sunat fo dadik tanda, nae, ei ndia, Manetualain hataholin.” Na te, Manetualain ta palenda leo ndiak! Ala sala ndia so! Tehuu mae leo ndiak boe, ala bei husi hataholi, sama leo busa manggalauk. 3 Huu lae Manetualain simbok hataholi huu ala sunat. Tehuu sala ndia! Ita bubuluk so, Manetualain simbok hataholi, huu lamahele neu Yesus. Boe ma, Manetualain hataholi tetebe nala, fo ndia ita mana mamahele neu Yesus! Ita takaluku-takatele neu Ndia, tungga Ndia Dula Dale Malalaon. Ita soꞌuk tamadedema Yesus Karistus, huu Ndia soi dalak so, fo ita bisa maso dadik Manetualain hataholin. Ita ta bisa hambu sodak mete ma ita tungga hataholi uen.

4 Makahulun, au boe oo, duduꞌa sala, sama leo sila, ae, hataholi bisa maso dadi Manetualain hataholin, sadi ala sunat. Naa te kada hataholi tataon ndia! Mete ma sangga kokolak hataholi tataon, na, au bisa kokolak koaok lena heni basan, huu makahulun au tataong meuaok leo basa hataholi Yahudi la heti-heu anggaman. 5-6 Tungga heti-heu anggama, na au ina-ama nggala sunat au, neu faik fo au faik falu. Au ia boe oo, hataholi Yahudi isi-isik, huu au ia uma leo Banyamin tititi-nonosin nakandoon neme baꞌi Israel mai. Au manggateng ana seli tungga basa heti-heuk neme partei anggama Farisi mai, losa ta hambu hataholi esa fo fee salak fa boe neu au. Nakalenak bali, au manggateng ana seli tao doidoso hataholi mana tungga Karistus, huu au duduꞌa ae hataholi la ia, nggali heni ita heti-heu anggaman.✡ Roma 11:1; Hataholi Nadedenu nala Tutuin 8:3; 22:4; 23:6; 26:5, 9-11

7-8 Tehuu doo-doo boe ma au duduꞌang nasafali neu faik fo au heok tungga Karistus. De, hatematak ia, au ta koao so, ua au soda makahulung ndia, huu sila sosoan ta fa boe neu au so. Fo au taok ana seli, na ndia: au bisa alelak Yesus Karistus, fo ndia au Lamatuang. Basa dedeꞌa feꞌe kala, au taon leo kada kadafuk. 9 Au nau asoda nanambaꞌak ua Yesus Karistus. Huu mae au tungga basa heti-heu anggama boe oo, bei ta dadi Manetualain simbok au. Ma mae au taok au ndoos, na bei ta dadi Ana simbok au boe. Tehuu au musi amahele neu Karistus dei, bei fo Manetualain simbok au, “Huu Karistus koka heni o sala-singgo mala, de o dadik malalaok so.”

10 De, au hihiing leo iak: au nau alelak neulalau Karistus. Au boe nau bubuluk neulalau Manetualain koasan, fo Ana paken tao nasoda falik Yesus Karistus neme Ndia mamaten mai. Leo hambu hataholi sangga nakatotoꞌak au, huu au tungga Karistus, na elan neme naa. Huu hataholi ana nakatotoꞌak Karistus boe. Ma mete ma hambu hataholi sangga tao nisa au, huu au ono-lau hataholi, na kada au simbok. Huu Karistus mate soaneu au leo ndiak boe. 11 Ma mete ma au mate, na neu ko Ndia boe tao nasoda falik au.

12-13 Tolanoo nggala ei! Au ahiik tungga Karistus dala sodan, ma basa Ndia hihii-nanaun. Tehuu mete ma kokolak no ndoos, na au bei ta tungga leo ndiak. Huu ndia de au mbalak eik, huu Yesus Karistus hele nala au so, fo au tungga Ndia leo ndiak. Au sama leo hataholi fo nalaik tingga-tingga, suek bisa losa to-lane. De, au alaik ndoos uni mata uu, ma ta suli dea uu, fo duduꞌa dedeꞌa makahulu kala. Au lilii heni sala so. 14 Tehuu au alaik uni tean akandoo losa to-lane, fo hambu piala. Au hadiang ndia, na ndia: neu ko Manetualain simbok au nai nusa-sodak, huu au amahele Yesus Karistus.

15 Naa, au oke fo ei basa nggei ama moli ma maoka matea nai Karistus dalek, bisa dalek esa nai basa dedeꞌa kala ia. Tehuu mete ma hambu duduꞌak mana feꞌek, na, ela Manetualain natudu dala kalua neulauk. 16 Tehuu mae leo ndiak boe oo, ita musi toꞌu tea-tea ma tao tungga basa dedeꞌa tetebes, fo Lamatuak nanoli ita so.

17 Basa tolanoo nggalei! Ei musi tungga au conto dala sodang. Ei luma manai ndia kala dala soda nala sama leo au so. Tehuu mana bei kala, na bisa lanoli neulalau leme sila mai fo tao leo ndiak boe.✡ 1 Korintus 4:16; 11:1 18 Mata neuk mia hataholi fo mana laban Karistus, ma ta simbok malole Ndia mamaten nai ai ngganggek lain. Sila dala soda hehelin ndia, natudu sila laban Karistus. Au afada itak ei, laꞌeneu hataholi mata-aok leo sila, tehuu hatematak ia, au afada seluk no luu mana faak. 19 Huu neu ko Manetualain timba heni sala, boe ma Ana mbia sala leni tasi haꞌik leu, huu dale nala ta nanambaꞌak lo Ndia. Kada sila toꞌu dedeꞌa manggalau kala, ma sangga dalak fo kada tao natetu ao-ina hehelin hihii-nanau nala, losa langga batu lo sila manggalau nala. Ala ta lameda mae. Kada ala duduꞌa sama leo hataholi ta lalelak Manetualain.

20 Ei ta bole tao tungga sala, tehuu tao tungga ai. Huu ita maso dadik Manetualain hataholi nala so, ma toꞌu hak hataholi nusa-sodak. Hatematak ia, ita tahani-tahani ita Lamatuan Yesus Karistus. Huu neu ko Ndia konda fali neme nusa-sodak mai, fo nasalaꞌe nala ita teme Manetualain nasan mai. 21 Neu ko Karistus tao nasafali ita ao-inan mana noe-naꞌuk fo bisa maten, dadik ao-ina beuk fo ta mana matek, sama leo Ndia ao-inan fo ana seli ndia. Ana tao nasafali ita ao-ina nala, pake Ndia koasa inahuun, fo tao basa-basan sudi lai bee mesan, doꞌok tungga Ndia palendan.