1 Faik fo, Yesus ina-huu so, boe ma Yohanis Mana Salanik mulai nanoli hataholi la lai mamana nes, nai propinsi Yudea. 2 Ana nafada nae, “Tolanoo susue nggalei! Ei musi manaku ma laꞌo ela ei sala mala, fo fali mini Manetualain miu leo. Huu, hatematak ia, basa hataholi la bisa maso dadik Manetualain hataholin nala so.”✡ Mateos 4:17; Markus 1:15

3 Makahulun Manetualain mana kokolan esa, nade Yesaya sulak so, laꞌeneu Yohanis, nae,

4 Yohanis ia dala sodan sama leo Lamatuak mana kokola makahulun nala. Ndia baloꞌa papaken, nana taok neme banda onta bulun mai. Kalikeen, nana taok neme banda loun mai. Ndia nanaꞌa-nininun, lamak ma fani oe nula.✡ 2 Mane-mane kala 1:8

5 Faik ndia hataholi noꞌu kala mai fo sangga latonggo lo Yohanis. Ala mai leme Yerusalem, ma basa propinsi Yudea isin. Sila boe oo, leme nggolo kala mana dekak no lee Yarden. 6 Ala lalengga dalen nala, ma manaku basa sila sala-singgon nala, basa de, Yohanis salani sala leme lee Yarden.

7 Faik ndia, hataholi la leme partei anggama Farisi, ma partei anggama Saduki boe, ala mai fo loke Yohanis salani sala. Tehuu ledoeik ana nita sala, boe ma nasapala kasa, nae, “Heh! Ei ia sama leo mengge fo masapepekok! Dei fo Manetualain huku ei, huu ei tatao-nonoꞌi manggalau mala. Weih! Boso maehetuk ei bisa malai kalua mima Ndia huhukun mai.✡ Mateos 12:34; 23:33 8 De, malolenak ei fali mini Manetualain miu, ma laꞌo ela basa ei sala-singgo mala. Basa ndia, na, ama tao dedeꞌa malole, sama leo ai huuk mana maboa boa malole. 9 Boso maehetuk ei sodak so, huu ei ia, baꞌi Abraham numbu-sadun. Mamahele au! Huu Manetualain bisa tao nala batu la ia, dadik neu baꞌi Abraham numbu-sadun.✡ Yohanis 8:33 10 Mata neuk baa! Huu Hataholi mana toꞌu taka, nahehele fo sangga kekeko ai huuk boa taak. Kekeko basa, boe ma Ana mbian neni haꞌi dale neu.✡ Mateos 7:19

11 Hatematak ia au salani ei unik oe, fo dadik tanda, nae, ei heok masadea ela ei sala-singgo mala so. Tehuu dei fo Hataholi esa ana seli lena heni au, sangga mai. Mae kada dadik neu Ndia nadedenun boe oo, au taa andaa. Dei fo Ana tao nahenu ei dale mala no Lamatuak Dula Dale Malalaon. Ndia boe oo, tao nalalao ei, sama leo hataholi pake haꞌi fo hotu kadafuk.* Ndia dedeꞌa deꞌe Yunani isi-isik nae, “salani nenik Lamatuak Dula Dale Malalaon, ma haꞌi.” “Salani nenik Ndia Dulan” ndandaan ndia, “Tao nahenu ei dale mala nenik Lamatuak Dula Dale Malalaon.” “Salani...nenik haꞌi” ndandaan ndia, “tao ei malalaok sama leo hataholi hotu heni kadafuk nenik haꞌi.” 12 Huu Ana toꞌu oko henuk no isik, fo sangga daꞌi heni uun. Basa na Ana tao isi kala leni karon dale neu. Tehuu, Ana mbia henin uu kala leni haꞌi dale leu, fo mana mbilak taa no mana basak.”

13 Faik ndia, Yesus loe neme Galelea mai neni lee Yarden neu. Ana mai noke Yohanis salani Ndia, 14 tehuu Yohanis taa nau. Ana sapa nae, “Talobee de au musi salani Lamatuak? Taa kasafalik ia do? Lamatuak musi salani au dei. Huu au paluuk ndindia, maa!”

15 Tehuu Yesus nataa nae, “Taa hata-hata. Huu, soaneu hatematak ia, na, ela kaꞌa ndia salani Au. No leondiak na, ita tungga Manetualain hihii-nanaun.”

Namanene leondiak, boe ma Yohanis nataa nae, “Kada neme Lamatuak mai.” De ana salani Yesus.

16 Salani nateꞌe, boe ma Yesus kalua neme lee dale mai. Tehuu kada nggengge neuk, lalai natahuꞌak. Boe ma nita Manetualain Dulan konda neu Ndia, sama leo lunda mai saꞌe neu Ndia. 17 Boe ma lamanene Manetualain nahala neme lalai mai, nae,