1 Yesus kokolak nenik nakandandaak esa nae, “Au afada ei ia, tetebes. Biꞌilombo kalalaek. Mete ma hataholi fo taa maso tungga lelesu, tehuu ana hene nesik mbaꞌa, na, manggaledok so, na naꞌo ndia.

2 Tehuu mana maso nesik lelesu ndia, na, ndia biꞌilombo la manahoon fo nakaboi sala. 3 Mana manea lelesu nalelak manahoo ndia, de ana soi lelesu fee ndia. Biꞌilombo la lalelak manahoo ndia halan. Boe ma mete ma ana noke sala esa-esak naden, na, ala tungga ndia deak leu. 4 Ledoeik ana noo sala deak leu, ana laꞌok nakahuluk nai mata. Biꞌilombo la tungga dea, huu lalelak ndia halan. 5 Mete ma hambu hataholi fo biꞌilombo taa lalela kana, na, ala taa tunggan. Tehuu ala lalai, huu ala taa lalelak hataholi feꞌek ndia halan.”

6 Leo mae Yesus tui nakandandaak ndia neu sala, tehuu ala taa bubuluk ndia maksud boe.

7 Basa de Yesus nafada nakadaik neu sala nae, “Au afada ei ia, tetebes. Au sama leo lelesu nai biꞌilombo la lalaen. 8 Basa hataholi mana makahuluk neme Au mai, ala sama leo naꞌo. Mae ala loke mbea-mbea, tehuu biꞌilombo la taa lamanene neu hataholi sila. 9 Boe ma Au sama leo lelesu ndia. De mete ma hambu mana nau nesik Au, na, Manetualain nau nasalaꞌe nalan neme ndia sala-singgo nala mai. Ndia sama leo ana maso neni Lamatuak mamanan neu nesik Au fo mana dadik neu lelesu. Ma hataholi fo ana maso nesik Au, na, ana laꞌok sudi bee neu, ma ana hambu naꞌa-ninu no teteben.✡ Sosoda Koa-kio kala 118:20 10 Naꞌo la kada tao naodek, huu ala mai fo lamanaꞌo, lakanisa, ma tao lakalulutu hataholi sodan. Tehuu Au uni sodak fo malolen nalan seli, huu Au mai fo suek hataholi bisa nasoda ndoo-ndoo, ma nasoda ndoos.

11 Au boe oo sama leo manahoo malole esa. Huu manahoo malole sadia fee ndia aoinan losa maten, fo suek ndia biꞌilombo nala bisa lasoda. 12 Tehuu hataholi mana manea fo nana nanggadik, mete ma ana nita busa fui esa mai, na, ana nalai, de ela biꞌilombo la sila leme ndia. Basa de busa fui ndia kiki nala biꞌilombo esa, boe ma biꞌilombo feꞌe kala lalai latanggelak. 13 Hataholi mana manea ndia nalai, huu kada ana sangga doik. Ana taa mbali, fo nanea neulalau biꞌilombo la sila.

14 Tetebes! Au sama leo manahoo malole. Au alelak Au biꞌilombo nggala. Ma sila boe oo, lalelak Au. 15 Ndia sama leo Amak nai nusa-sodak nalelak Au, ma Au boe oo alelak Ndia. Au boe oo sadia fee Au aoinang losa mate, fo suek Au biꞌilombo nggala bisa lasoda.✡ Mateos 11:27; Lukas 10:22 16 Hambu Au biꞌilombo feꞌe nggala, fo bei ta lakabubua lo Au biꞌilombo nggala lai ia. Au musi akabubua ala sala boe. Dei fo mete ma ala lamanene neu Au halang so, na, ala lalelak memak. Boe ma ala mai lakabubua, dadik leu bubuak esa fo manahoo esa.

17 Huu Au sadia so fee Au aoinang losa mate, fo Au bisa asoda fali. Huu ndia de Au Amang nai nusa-sodak sue Au. 18 Taa hambu hataholi esa nakaseti Au fo mate, tehuu Au mesa nggau sadia fee Au aoinang losa mate. Au boe oo aena haak fo fee Au aoinang. Au boe oo aena haak fo haꞌi fali kana. Palenda ia, Au simbon so neme Au Amang nai nusa-sodak.”

19 Huu ala lamanene Yesus kokolak leondiak, boe ma hataholi Yahudi la lasisimbo bafak bali. 20 Hambu noꞌuk leme sila mai lae, “Wei! Hataholi ia kamuluk! Ma Ndia boe oo nitu nalak! Hatina de ei nau mamanene neu Ndia?”

21 Tehuu hambu luma bali lae, “Ia hataholi kamuluk kokolan taa ia hetu? Kokola leondiak, taa kalua nitak neme nitu la bafan mai! Ma nitu la boe oo taa tao lala hataholi mbokek bisa nita bali, hetu?”

22 Faik ndia, hataholi Yahudi la nau tao sila anggaman fai malolen esa. Fai malole ndia, nandaa no fai makasufuk. Nai feta ndia, hataholi Yahudi la lasaneda faik fo hataholi feꞌek tao langgenggeo Lamatuak Uma Ina Huhule-haladoin nai kota Yerusalem, boe ma ala tao lalalaon de ala tabis selu kana.* Hatematak ia, hataholi Yahudi la loke fai malole ndia na lae, Hanuka, fo ana tuda deka-deka no hali Besa. Ndia tutuin leoiak: faik fo teuk natun esa nee hulu hitu fo Karistus bei taa nana bonggik (167 SM), jendelaal hataholi Siria esa, nade Antiokus Epifanes, tao nakalulutu kota Yerusalem. Ndia boe oo tao nanggenggeo Uma Ina Huhule-haladoik, huu ana ofe heni mei tunu-hotuk nai ndia. Boe ma ana nambadedei bua sosonggon nai ndia. Huu ndia de hataholi Yahudi la laba sala. Basa de bula Kislef fain dua hulu lima, teuk natun esa nee hulu haa, Karistus bei ta nanabonggik (164 SM), ala tao lalao seluk Uma Ina Huhule-haladoik, de ala tao tataos esa, fo tabis selu kana. 23 Yesus laꞌok ndule nai Uma Ina Huhule-haladoik pasan, nai mamanak fo makahulun ala lae, ‘Mane Soleman Uma Teras’. 24 Boe ma hataholi Yahudi malangga nala mai lakalilimbu lala Ndia lae, ‘Wei! Ita musi tahani losa faik bee, bei fo ita bisa bubuluk? Mete ma Ama ia, Karistus, na, tulun mafada manggaleledon dei.”

25 Yesus nataa nae, “Au afada memak neu ei so, tehuu ei taa nau mamahele. Naa te dedeꞌa kala fo Au tao kala, basan kada tungga Au Amang palendan. Dedeꞌa kala sila latudu lae, Au ia see. 26 Tehuu ei taa mamahele Au, huu Au biꞌilombo nggala taa ei. 27 Huu Au biꞌilombo tetebeng ndia, lalelak Au halang. Sila boe oo tungga Au. Au boe oo alelak sila. 28 Au fee sala soda tetebes fo taa namaketuk, ma sila boe oo taa laelak lo Lamatuak. Taa hambu hataholi esa boe, fo bisa namoa nala sila leme Au mai. 29 Au Amang nai nusa-sodak fee sala leu Au. Ndia ana seli lena heni basan. Huu ndia de taa hambu hataholi esa boe fo ana bisa namoa nala sala leme Ndia liman mai. 30 Huu Au Amang ma Au ia, esak.”

31 Lamanene leondia, boe ma hataholi Yahudi la malangga nala haꞌi batu laꞌi esa bali, fo sangga mbia lisa Yesus. 32 Boe ma Yesus nafada sala nae, “Heeh! Au atudu dedeꞌa malole noꞌuk neme Au Amang mai so. Neme dedeꞌa malole fo Au atuduk sila, esa dadi toꞌok fo ei sangga mbia misa Au, do?”

33 Ala lataa lae, “Ai taa mbia o, huu o tao dedeꞌa malole. Tehuu ai huku mbia o, huu o mamumulu belak so! O kada hataholi basa faik, tehuu o soꞌuk aok sama leo Manetualain! Ana seli ndia so bali maa!”✡ Malangga Anggama la Heti-heun 24:16

34 Boe ma Yesus nataa nae, “Talobee? Nai heti-heu anggama fo ei toꞌuk ndia nana sulak nae, ‘Au afada memak ae, ei malangga mala ia, sama leo lamatuak.’✡ Sosoda Koa-kio kala 82:1, 2, 6 35 Ai bubuluk so mae, basan nana sulak nai Lamatuak Susula Malalaon ndia, tetebes, ma taa bisa koka henin. Mete ma Manetualain seseik nae, malangga dae-bafok ia sama leo ‘lamatuak’, na, nakalenak neu Au bali. 36 Ama nai nusa-sodak hele nala Au, ma nadenu Au uni dae-bafok ia mai. De nandaa nalan seli mete ma Au ae, Au dadik Manetualain Anan! Taa maso langga utek, mete ma ei mae, Au kokolang ndia nakadadaek. 37 Leoiak. Mete ma Au taa akalalaꞌok Au Amang uen na, ei boso mamahele neu Au. 38 Tehuu Au akalalaꞌok Ndia uen akandoo. De, mae ei taa nau mamahele Au, tehuu mae kada faak boe ei musi simbok tanda heran fo Au taok ndia. No leondiak, na, ei boe oo bisa bubuluk mae, Au Amang nana mbaꞌak no Au. Ma Au boe oo nana mbaꞌak ua Ndia.”

39 Basa boe ma ala soba seluk fo sangga humu Ndia, tehuu mboꞌi heni Ndia.

40 Boe ma Yesus neni seluk lee Yarden selik neu, nai mamanak makasososan fo makahulun Yohanis mana salanik, salani hataholi. Boe ma Ana leo tataak neme ele.✡ Yohanis 1:28 41 Hataholi noꞌuk mai sangga Ndia. Boe ma ala lakokola lae, “Yohanis taa bisa tao tanda heran esa boe. Tehuu basa hata fo ana kokolak laꞌeneu Yesus ia, tetebes, bae maa!” 42 Boe ma hataholi noꞌuk lai ele lamahele leu Ndia.