1 Tolanoo nggalei! Hatematak ia, ai sangga mafada ei, laꞌeneu fai hida ita Lamatuan Yesus Karistus sangga mai, boe ma ita takabubua ton. 2 Boso lofoanak ei nana kedi nalak ma boso bii, mete ma hataholi la lae, Lamatuak fali main so. Mae ala kokolak lae ala bubuluk leme Dula Dalek, do ala lamanene leme hataholi mai, do ala hambu susulak leme ai mai, na boso mamahele sala. Te basa sila pepekok ndia! 3 Boso fee hataholi la tao langgonggoa ei. Te hataholi manggalauk esa musi mai nakahuluk, dei fo Lamatuak Yesus fali main. Hataholi ndia, laban tebe-tebe Lamatuak, losa hataholi noꞌuk laban tungga boe. Hataholi ndia, memak sudi seli kana! Huu ndia de, ana nandaa maso neni tasi haꞌik neu. 4 Ana tao aon dema lena basa hata fo hataholi sosonggon, ma laban basa hata fo hataholi la lakaluku-lakatele neun, losa ana neni Uma Ina Huhule-Haladoik neu, de ana soꞌuk aon nae, “Au ia, Manetualain!”✡ 1 Tesalonika 4:15-17✡ Daniel 11:36; Yeskial 28:2

5 Ei bei masaneda, do ta? Fain au afada memak ei so, laꞌeneu hataholi manggalauk ndia, neu faik fo au bei ua ei, hetu?

6 Hatematak ia, hataholi manggalauk ndia, fai natudu aon bei ta ia, huu hambu mana makaleleek. Ma ei boe oo, bubuluk hata ndia nakaleen. 7 Hatematak ia malangga dula manggalauk ndia tao naodek no nee-neek, huu bei hambu esa nakaleleen. Tehuu dei fo mana makaleleek ndia, nakamboꞌik liman. 8 Boe ma hataholi manggalauk mana tao naodek ndia toda mai, de ana mulai tao ue-ledin no ledo-ledo. Tehuu, nandaa no Lamatuak Yesus fafali main, Ana tao nakalulutu hataholi manggalauk ndia, nenik kada dedeꞌa deꞌek esak.✡ Yesaya 11:4

9 Tehuu, fain fo Lamatuak Yesus bei ta mai, nitu la malanggan fee koasa inahuuk neu hataholi manggalauk ndia, fo ana bisa tao tanda heran mata-mata kala, losa hataholi la laehetuk Ana pake Manetualain koasan.✡ Mateos 24:24 10 No leondiak, na hataholi noꞌu kala nana kedi nalak, leme hataholi manggalauk ndia masapepekon mai. Neu ko sila latanggelak dook lo Manetualain. Mae Ana soi dalak, fo fee sala sodak, tehuu ala timba heni Ndia hihii malolen ndia, ma tala nau lamahele hata fo tetebes. 11 Huu ndia, de Manetualain kena nisa dale nala neme hata fo ndoos, fo ela lamahele basa masapepeko kala sila. 12 No leondiak, de Manetualain fee huhuku belak neu sala, huu ala ta nau lamahele hata fo ndoos. Te, kada ala lahiik tao manggalauk.

13 Tolanoo nggalei! Ai mambue moke makasi taa-taa neu Manetualain, huu Ana sue ei. Neu faik fo Ana bei ta nakadadadik daebafok ia, Ana naketun mema kana so, fo fee ei sodak. Boe ma Ana fee Dula Dalen tao nalalao ei, huu ei mamahele hata fo tetebes. 14 Faik fo ai tui Hala Malole neu ei ndia, Manetualain pake Hala Malole ndia, fo noke nala ei, suek ei hambu sodak, ma mameda Lamatuak Yesus Karistus nula-nambun.

15 De leoiak, tolanoo nggalei! Makatataka makandoo, ma toꞌu matalolole basa hata, fo ai mafada ei so. Masanenedak boe, basa hata fo ai sula kasa so boe.

16-17 Ai hule-haladoi makandoo neu Manetualain, ita Aman, ma neu Yesus Karistus ita Lamatuan ndia. Ai hule fo Ala tao latetea ei dale mala, suek ei tao basa dedeꞌa malole la. Ai moke leondiak huu ai bubuluk mae, Lamatuak sue nala ita basa nggata ana seli. Huu Ndia dale malolen, de Ana ta hahae tao natetea ita dale nala. No leondiak, de ita tamahena takandondoo henin neu Ndia.