1 Makahulun, hataholi Israel luma lae, ala dadik Manetualain mana kokola nala. Naa te ala pepeko ndia. Dei fo ei boe oo, matonggo mia hataholi leo sila kala, lai ei lalada mala. Huu, hataholi luma lae, lanoli laꞌeneu Lamatuak, tehuu kada ala pepeko ndia. Lanoli lafufunik sila duduꞌa manggalau nala sila. Huu ndia de, ala bisa tao sila nanonoli pepeko nala neu hataholi kamahele kala. Mete ma ei mamanene neu sila nanonoli nala, na, dei fo ei makalulutuk henin. Ala lalelesi lae, Lamatuak Yesus ndia, sila lamatuan taa ndia. Naa te, Yesus soi nala sila belin ana seli. Huu sila tatao leondian, de, dei fo sila mesa kasa lakalulutuk lai-lai.

2 Mae leondiak boe, tehuu dei fo hataholi noꞌu kala tungga sala, ma tao ladabak fo taa lameda mae. Dei fo hataholi noꞌuk lae, nanonoli tetebes ndia, sala, huu mese pepeko kala kedi lala sala. 3 Mese pepeko kala sila, balenaꞌo la. Ala dula mata-mata kala, fo ala bisa pepeko lala ei doi mala. Ma boso lilii henin, huu Manetualain dadi Mana Maketu Dedeꞌak fo tana sunggu nitak. Neme makahulun mai, Ana nahehele so, fo huku sala. Dei fo ala lakalulutuk heni sala.

4 Conto leo, makahulun, Lamatuak ata nusa-sodan luma tao salak. Tehuu Lamatuak dadik neu Mana Maketu Dedeꞌak, de taa mboꞌi heni sala. Ana mbia heni sala leni naraka leu, ma longga sala leu Bolo Makiuk fo Madema. Ala lahani lai mamanak ndia losa fain fo ala lasale Ndia.

5 Leondiak boe, no hataholi lele ulu kala. Faik ndia, lasoda tao manggalauk, ma tala mbali Manetualain. Tehuu Lamatuak heti so, fo Ndia hataholi dale ndoon esa, nade Noh, natudu dalak fo hataholi bisa nasoda ndoos. Tehuu, tala nau lamanene neu ndia boe. Huu ndia, de, Lamatuak haitua faa tuak mai, fo tao nakalulutu heni hataholi la fo taa nau mbali Ndia. Tehuu Ana nasalaꞌe nala Noh no ndia bobonggi nala. Sila basa sala hataholi falu.✡ Tutuik laꞌeneu Sososan 6:1—7:24

6 Laꞌi esa bali, hataholi lele ulu kala malai kota Sodom ma kota Gomora, ala lasoda lo manggalaun ana seli. De, Manetualain huku sala. Ana hotu heni basa hata malai ndia kala dadik afu. Boe ma basa hataholi malai ndia kala mate basa sala. Ndia dadi conto neu hataholi feꞌe kala fo mana nau lasoda manggalauk, ma taa mbali Manetualain. Ala bisa bubuluk memak sila ua-nale nala, mete ma tala nau hondak.✡ Tutuik laꞌeneu Sososan 19:24 7 Tehuu faik ndia, hambu hataholi esa nade Lot, nasoda ndoos. Ana manggu no hataholi manggalau kala tatao-nonoꞌi lena-lena nala, fo tala nau lamanene neu Lamatuak. Boe ma, Lamatuak nasalaꞌe nala Lot, neme ndia mai.✡ Tutuik laꞌeneu Sososan 19:1-6 8 Lot mesa kana nateme tao ndoos, tehuu, ana leo nai kota sodom hataholi nala lalada nala. De, tungga-tungga faik ndia boe oo, nita ma namanene ala laꞌolena Lamatuak Heti-heu nala. Ndia tao nala ndia dalen hedis.

9 Basa conto la sila latudu, lae, Manetualain bubuluk dalak fo nasalaꞌe nala hataholi mana mahiik namanene neu Ndia, neme soba-douk mata-mata kala. Ndia boe oo, nalelak fee huhuku belak neu hataholi la fo soda nala peko-paki. Ma Ana tao leondiak nakandoo losa fain, fo Ana naketu basa hataholi la dedeꞌa nala. 10 Huhuku mabela ndia, nakalenak soaneu hataholi fo kada nahiik nasoda manggenggeok, tungga sila hihii-nanau heheli nala. Ala taa nau lamanene neu hataholi esa boe, ma ala haumemee basa hataholi mana toꞌu koasa la. Neu ko Lamatuak huku sala.

Boe ma, mese masapepeko isinaak sila lambalani lalan seli, ma koao. Ala taa nau fee hadak, ma ala taa bii kokolak tao laboboo Manetualain no Ndia ata nusa-soda nala malai lalai. 11 Naa te, Ndia ata nusa-sodan balakain lena heni mese masapepeko kala sila. Mae leondiak boe oo, tehuu ata nusa-soda kala sila taa kokolak tao laboboo mese nala sila nai sila Lamatuan matan. Ma sila boe oo, taa lambue soli salak neu mese nala sila.

12 Tehuu mese masapepeko kala sila lateme kokolak tao laboboo laꞌeneu dedeꞌa nusa-soda kala fo sila mesa kasa taa lalela kana. De, sila sama leo banda fo tala duduꞌa lalelak! Malolenak, humu nala sala fo tao nakalulutu heni sala! Huu, sila ua-nalen ndia. Neu ko dei fo ala lakalulutuk heni sala, huu sila tatao-nonoꞌi nala. 13 Ala tao lakatotoꞌak noꞌuk neu hataholi la. Basa, dei fo Lamatuak boe tao nakatotoꞌa kasa, huu sila tatao taa ndoos. Ala lahiik kada feta manggalauk noꞌu. Sila boe oo, lahiik tao ladabak neu leledok, fo suek basa hataholi la bisa lita sila manggalau nala. Sila taa mae lalelak, boe ma ala tao lakalulutu ei nade malole mala. Mete ma laꞌa feta noꞌu lo ei, na, kada ala nau tao tungga sila hihii manggalaun. 14 Mata nala lakabubulak fo sangga inak suek ala nau tao eok no sala. Ala kada lasoda tao manggalauk lakandoo. Ala lahiik sangga hataholi fo namahehelen neu Lamatuak taa matea, boe ma ala fufudin fo tao manggalauk tungga. Ala lambue sangga dalak fo balenaꞌo lakandoo. Neu ko Lamatuak huku sala!✡ Tutuik laꞌeneu Sososan 6:5

15-16 Makahulun, mese masapepeko kala sila, hataholi mana tungga dala ndoos, tehuu doo-doo, boe ma ala laꞌo feꞌek leu. No leondiak, ala sama leo Balaam lele uluk, fo ndia Bosor* Susula dedeꞌa Yunani neulauk nalan seli, nae, Bosor. Hambu susulak luma bali nana sulak, nae, Beor. Basa susula dedeꞌa Yunani nana sulak nae, Balaam. Susula Malalaok dedeꞌa Indonesia nana sulak nae, Bileam. anan. Ndia ndia, Lamatuak mana kokolan esa. Tehuu ana nahiik nalan seli sangga doik, de ana tao dedeꞌa taa ndoos. Laꞌi esa Balaam saꞌe banda keledei. Tungga teteben, na banda keledei la taa bisa lakokola. Tehuu, faik ndia Lamatuak tao banda keledei ndia nakokola leo hataholi! Boe ma banda keledei ndia kaꞌi Balaam, huu ndia tatao manggalaun. Banda keledei ndia nau fo ana hahae tao dedeꞌa pepekok bali, sama leo hataholi kamuluk.✡ Lelekek 22:4-35

17 Mese masapepeko kala sila, sama leo oe matak esa fo sosoan taa huu mada heni oen so. Ala sama leo manggasasabuk fo sosoan taa, huu taa neni uda, kada ani fumbu henin. Lamatuak sadia memak mamana makiu mumuuk esa fo nakalee sala. 18 Huu ala labafa lalan seli, tehuu isin taa. Ala lahiik fufudi hataholi fo bei fo hondak leme sila salan mai, fo suek ala tao seluk salak tungga sila hihii manggalaun bali. 19 Hataholi masapepeko kala sila helu, lae, “Mete ma ei mamanene ai, na, ei makamboꞌik kada tao tungga ei hihii mala!” Tehuu hataholi mana kokolak leondia kala, sama leo ata fo taa bisa nakamboꞌik aon neme sila manggalau nala mai. Huu hataholi mana mboꞌi salak esa heti ndia, na, ndia sama leo ana dadik salak ndia atan. 20 Mete ma nau makamboꞌik muma manggalauk nai daebafok ia, fo mana tao manggenggeo ita, na, ita musi talelak ita Lamatuan Yesus Karistus. Tehuu, mete ma hambu mana heok neme ndia mai, boe ma nanambaꞌak seluk no dedeꞌa manggalauk, sama leo makahulun ndia, na, ndia sama leo dedeꞌa manggalauk ndia heti sala. Hatematak ia, ala boe lamabela lalan seli bali. 21 Mete ma ala bubuluk dala soda ndoos, tehuu ala heok leme dalak ndia mai, ma ala heok lasadea Manetualain palenda malalaon fo makahulun ala simbok ndia, na ndia taa malole. Dei fo ala simbok huhuku mabela, de malolenak ala taa bubuluk litak Lamatuak dala ndoon ndia. 22 Hambu dedeꞌa lasik fo nae, “Mete ma busa muta, na naꞌa falik muta hehelin ndia.” Hambu feꞌek bali, nae, “Mae nadiu bafi esa oe so, tehuu neu loli seluk tane bali.” Kokolak sila latudu laꞌeneu mese masapepeko kala sila.✡ Dedeꞌa Lasik 26:11