KO E TOHI
ʻAE PALŌFITA KO
ʻISAIA
1
1 ʻOku lāunga ʻa ʻIsaia ʻi he angatuʻu ʻa Siuta. 5 Pea tangi ia ʻi heʻenau mamahi. 10 ʻOku ne valokiʻi ʻenau ngāue kotoa pē. 16 ʻOku ne enginaki ʻaki ʻae ngaahi talaʻofa mo ne fakaʻilo ʻae houhau ke nau fakatomala. 21 ʻI heʻene mamahi koeʻuhi ko ʻenau angakovi, ʻoku ne fakahā ʻae ngaahi fakamaau ʻae ʻOtua. 25 ʻOku ne fakaʻilo ʻae ʻofa, 28 Mo ne fakahā ʻae fakaʻauha ki he angakovi.
1 Ko e meʻa naʻe hā mai kia ʻIsaia koe foha ʻo ʻAmosi, ʻaia naʻa ne mamata ʻoku kau ki Siuta mo Selūsalema ʻi he ngaahi ʻaho ʻo ʻUsia, mo Sotame, mo ʻAhasi, pea mo Hesekaia, koe ngaahi tuʻi ʻo Siuta.
2 Mou fanongo, ʻae ngaahi langi,
pea fakafanongo mo māmani:
he ʻoku folofola ʻa Sihova,
“Kuo u fafanga mo tauhi ʻae fānau,
pea kuo nau angatuʻu kiate au.
3 ʻOku ʻilo ʻe he pulu ʻaia ʻoku ʻaʻana ia,
pea mo e ʻasi ʻae fale manu ʻo ʻene ʻeiki:
ka ʻoku ʻikai ʻilo ʻe ʻIsileli,
ʻoku ʻikai tokanga ʻa hoku kakai.”
4 Oiau! ʻAe puleʻanga angakovi,
ko e kakai māfasia ʻi he hia,
ko e hako fai meʻa kovi,
ko e fānau ʻoku fakahala:
kuo nau liʻaki ʻa Sihova,
kuo nau fakahouhauʻi ʻae tokotaha māʻoniʻoni ʻo ʻIsileli,
kuo nau fakaholomui.
5 Ko e hā ʻe toe teʻia ai ʻakimoutolu?
ʻE tupulaki pe hoʻomou angatuʻu:
ʻoku mahaki ʻae ʻulu kotoa pē,
pea vaivai mo e loto kotoa pē.
6 Mei he ʻaofi vaʻe ʻo aʻu ki he ʻulu ʻoku ʻikai ha haohaoa ʻi ai;
ka ko e lavea, mo e volu, mo e pala kovi:
ʻoku teʻeki ai fakamaʻopo, pe nonoʻo, pe feʻauaki ʻae lolo faitoʻo.
7 Kuo lala homou fonua,
kuo vela homou ngaahi kolo ʻi he afi:
pea ko homou fonua,
ʻoku kai ʻo ʻosi ʻe he kakai muli ʻi homou ʻao,
pea ʻoku lala ia,
ʻo hangē kuo fakaʻauha ʻe he kau muli.
8 Pea kuo tuku ʻae ʻofefine ʻo Saione ʻo hangē ko e fale siʻi ʻi he ngoue vaine,
ʻo hangē ko e fale leʻo ʻi he ngoue kukumipa,
ʻo hangē ko e kolo kuo kāpui ʻe he tau.
9 Ka ne ʻikai tuku kiate kitautolu ʻe Sihova ʻoe ngaahi kautau ha tokosiʻi,
pehē, kuo tau hangē ko Sotoma,
pea kuo tau tatau mo Komola.
10 Fanongo ki he folofola ʻa Sihova, ʻakimoutolu ʻae kau pule ʻo Sotoma;
fakafanongo ki he fono ʻa hotau ʻOtua, ʻakimoutolu ko e kakai ʻo Komola.
11 ʻOku pehē ʻe Sihova, “Ko e hā hono ʻaonga ʻo hoʻomou ngaahi feilaulau lahi kiate au?
Kuo u fiu ʻi he feilaulau ʻaki ʻae fanga sipitangata, mo e ngako ʻoe manu sino;
pea ʻoku ʻikai te u fiemālie ʻi he toto ʻoe fanga pulu,
pe ko e fanga lami,
pe ko e fanga kosi tangata.
12 ʻOka mou ka haʻu ke fakahā ʻakimoutolu ʻi hoku ʻao,
ko hai kuo ne fekau ke ʻomi ʻae meʻa ni ʻi homou nima, ke malaki hoku ngaahi potu tapu?
13 ʻOua naʻa toe ʻomi ʻae ngaahi feilaulau taʻeʻaonga;
ko e meʻa fakalielia kiate au ʻae tutu ʻoe ʻakau namu lelei;
ko e ngaahi māhina foʻou mo e ngaahi ʻaho tapu, mo e ui ke fakataha, ʻoku ʻikai te u faʻa kātaki;
pea naʻa mo e fakataha ke lotu ko e angahala ia.
14 ʻOku fehiʻa ʻa hoku laumālie ki hoʻomou ngaahi māhina foʻou mo hoʻomou ngaahi kātoanga:
ko e meʻa fakamamahi ia kiate au;
kuo u fiu ʻi hono kātaki.
15 ʻOka mou ka mafao homou nima, te u fufū hoku fofonga ʻiate kimoutolu:
ʻio, ʻoka mou ka hū ʻo liunga lahi, ʻe ʻikai te u fanongo:
he ʻoku pito homou nima ʻi he toto.
16 “Fufulu ʻakimoutolu, ʻo ngaohi ke mou maʻa;
hiki ke mamaʻo meiate au ʻae kovi ʻo hoʻomou faianga;
tuku ʻae fai kovi;
17 ʻAko ke mou fai lelei:
kumi ki he angatonu,
tokoni ʻakinautolu kuo fakamālohia,
fakamaau ki he tamai mate,
langomakiʻi ʻae fefine kuo mate hono husepāniti.”
18 ʻOku pehē ʻe Sihova, “Mou haʻu, pea ke tau alea fakataha:
he neongo ʻae tatau ʻo hoʻomou angahala mo e kulaʻahoʻaho, ʻe hoko ia ke hinehina ʻo hangē ko e ʻuha hinaekiaki;
kapau ʻoku kulokula ia ʻo hangē ko e kulamūmū, ʻe tatau ia mo e fulufuluʻi sipi.
19 Kapau te mou loto ki ai mo talangofua,
te mou kai hono lelei ʻoe fonua:
20 Ka ʻi hoʻomou talangataʻa mo angatuʻu, ʻe ʻauha ai ʻakimoutolu ʻi he heletā:
he kuo folofola pehē ʻae fofonga ʻo Sihova.”
21 Hono ʻikai liliu fau ʻae kolo naʻe angatonu ko e faʻa feʻauaki!
Naʻe fonu ia ʻi he fakamaau; naʻe nofo ai ʻae māʻoniʻoni;
ka ʻoku ʻi ai ni ʻae kau fakapō.
22 Kuo hoko hoʻo siliva ko e taʻeʻaonga,
mo hoʻo uaine kuo huʻi ʻaki ʻae vai:
23 ʻOku angatuʻu homou houʻeiki, pea kaumeʻa mo e kau kaihaʻa:
ʻoku nau manako kotoa pē ki he ngaahi foaki, ʻonau muimui ki he totongi:
ʻoku ʻikai te nau fakamaau ki he tamai mate,
pea ʻoku ʻikai aʻu kiate kinautolu ʻae mamahi ʻae fefine kuo mate hono husepāniti.
24 Ko ia ʻoku pehē ʻe he ʻEiki,
ko Sihova ʻoe ngaahi kautau,
ko e Toko Taha Māfimafi ʻo ʻIsileli,
“ʻIo, te u fakafiemālieʻi au ʻiate kinautolu ʻoku angatuʻu mai,
pea te u totongi ʻe au ki hoku ngaahi fili.
25 Pea ʻe toe ala hoku nima kiate koe,
pea fakamaʻa moʻoni hoʻo ʻuli,
pea ʻave mo hoʻo kovi kotoa pē:
26 Pea te u toe fakanofo hoʻo kau fakamaau ʻo hangē ko ia ʻi muʻa,
pea mo hoʻo kau fakakaukau poto ʻo hangē ko ia ʻi he kamataʻanga:
pea hili ia ʻe ui koe, ‘Ko e kolo māʻoniʻoni,
ko e kolo angatonu.’
27 ʻE huhuʻi ʻa Saione ʻaki ʻae fakamaau,
mo ʻene kakai ului ʻaki ʻae māʻoniʻoni.”
28 Pea ʻe fakaʻauha fakataha ʻae kau talangataʻa mo e angahala,
pea ʻe ʻauha ʻakinautolu ʻoku liʻaki ʻa Sihova.
29 He te nau mā ʻi he ngaahi ʻakau naʻa mou holi ki ai,
pea te mou puputuʻu ʻi he ngaahi ngoue kuo mou fili.
30 He te mou tatau mo e ʻakau kuo mae hono lau,
pea hangē ko e ngoue ʻoku ʻikai hano vai.
31 Pea ʻe tatau ʻae mālohi mo e kākā,
pea mo ʻene ngāue ʻo hangē ko e kalofiama,
pea te na vela fakataha,
pea ʻe ʻikai tāmateʻi ia ʻe ha tokotaha.”