8
Mutu Yesus nehe ribu buta iahi
(Matius 15:32-39)
1-3 Ved nu adana, nehe toang hoa taing vengkumpul, e Yesus aing vengmee. Ini amulung ved tue tila, angu ebele imod osing. Ang muse Yesus Egahing vala ang naung iarut iat mateng hula, “Nehe toang anga Nomi etatabit ijahi. Iiba anga ola mi hoa, e ini taing vengkumpul ved tue tila, anguba imod osing. Miaaung ini ekang iatou osing ila ekang. Misavaka ini via mi ajebing.”
4 Egahing vala ang naung Ehur ebalet hula, “Nimang, mana anga aabang eola. Base nehe toang alang anga pi bae iahit jadi niang!”
5 Aarunge Yesus iadang taaning hula, “Iiroti edeng ba ue?”
Ini ebalet hula, “Nimang. Roti iipi bititu kolang ni taloul mea ba ae.”
6 Nehe toang angu Yesus Ana iot meke taang mihi. Ang muse Ana roti iipi bititu ang medi, e banang tarima kasi metma Lahatala enang. Seng muse Ana atang metma roti angu ening atatara, e metma Egahing vala ang naung inang. Ini baning ila paul metma nehe toang ang naung inang. 7 Ing di bot iaab aaedeng ue. Yesus bot banang tarima kasi Lahatala enang metma aab angu adana. Ang muse Ana bot Egahing vala ang naung iot ila paul metma nehe toang ang naung inang. 8-9 Ing emangpi oma ribu buta. Ini naadang iatou vengbarang. Naadang seng muse Egahing vala ang naung ila mod ealehil angu akumpul, ota bititu aaving. Ang muse ing emangpi Yesus Ana iot ila. 10 Ini ila tila muse, Yesus bot Egahing vala ang naung imampi je taang mida, e mana nu ene Dalmanuta angmi ila.
Nehe Farisi hula Mutu Yesus abaang
(Matius 16:1-4)
11 Yesus iimal ila Dalmanuta mi muse, nehe aaedeng Farisi eamulung hoa Aing harak. Ini At natataanang hula Aing ening ahala. Ini Abanang hula, “Nimang! Tanda nu matubing e ni ateing hula Aaing angu etatabit Lahatala Ekavasa ue Aaing veng.”✡ Matius 12:38; Lukas 11:16
12 Yesus eeng masiling aavening e, vengbanang hula, “Iini mateng aulang Na vengmee se, Na manasal! Etatalang ba iini tanda herang banang? Ekang aulang ekang! Tanda herang mang ae, aarunge Na bae ening ma iinang niang.”✡ Matius 12:39; Lukas 11:29
13 Seng muse, Yesus lamal iahalang e, bale je taang mida Egahing vala ang naung imampi dano edenaveng angmi ila.
Mutu Yesus hula tava vengani nehe Farisi evomung-epahang adana
(Matius 16:5-12)
14 Yesus iimal ila dano ehama mi se, Egahing vala ang naung mi vengani, hula ini tajebing bae mod baning niang. Ini roti iipi nu kolang baning. 15 Vengmeet ini roti veng mateng muse, Yesus hula, “Iini malekang vengani! Raja Herodes bot nehe Farisi ivomung-ipahang jasi angu iini ekang eamulung ekang. Ivomung-ipahang ba jasi angu ini metma nehe iomi taang emenghula bibit roti nehe gaot metma roti ening angu edadenang.”✡ Lukas 12:1
16 Vengmeet Ana mateng aulang muse, Egahing vala ang naung iomi iipi sehi. Ini itaat mateng hula, “Boma angu naba ba veng mateng e? Ana mateng aulang angu, pi oma bae roti baning niang angu ebele.”
17 Aarunge Yesus iomi ang ateing. Base Ana iat mateng hula, “Etatalang ba iini mang roti ba veng mateng! Iini Nenomi ang bae ateing niang ka? Iiomi angu mang iipi sehi! 18 Iini uuling iieng taang ateing, bot iiaver vengmee tila, aarunge bae manggarati niang. Emenghula iini bae ateing niang edadenang! Iini veng tajebing iila✡ Yeremia 5:21; Yehezkiel 12:2; Markus 4:12 19 roti iipi iising ba Na ening atatarat metma nehe ribu iising iahi angu, tura ealehil iini akumpul angu ota eedeng?”
Ini vengbanang hula, “Ota arinu belta aalu, Nimang.”
20 Yesus bot taaning hula, “Iini jedung vengani sehi e, niang? Tura Na roti ening atatarat metma nehe ribu buta iahi angu, iini ealehil akumpul angu ota eedeng?”
Ini vengbanang hula, “Bititu, Nimang!”
21 Ang muse Yesus hula, “Etabi! Iini uuling iieng taang ateing iila, aarunge etatalang ba iini bae manggarati niang hula, Nekavasa angu taang mi hoa?”
Mutu Yesus Betsaida mi nehe eng kete ening mona
22 Ang muse Yesus iimal ila Betsaida aabang mi. Ang mi angu nehe eng kete nu, nehe at Yesus Ebele hoa. Ini banang hula Yesus ot Atang metma nehe eng kete angu aing deit ening mona. 23 Yesus Ana nehe angu atang vengpina at aabang eolat ila. Ana eng angu vengpurung senge, Atang metma eng angu taang mea. Ana adang taaning hula, “Tatalang, eeng angu jara tila e, jedung?”
24 Nehe angu uuling tene bajaul, senge vengbanang hula, “Na uuling se nehe lamal sehi, aarunge emenghula te ba ue lamal edadenang.”
25 Yesus bale Atang metma nehe ang eng angu taang mea. Ang muse, ana bot uuling se, eng angu mang jara. Bot ana etatabit mona. 26 Yesus nehe angu ot ila, senge Ana at mateng hula, “Aana ila aarunge via aabeung oa! Ekang Betsaida mi ila ekang.”
Petrus vengbanang hula Yesus anguba Kristus, turangmi Lahatala Aing matubing iila
(Matius 16:13-20; Lukas 9:18-21)
27 Ang muse, Yesus bot Egahing vala ang naung imampi lamal Kaisaria Filipi eabang ang migoleng. Via mi lamal sehise, Yesus iadang taaning hula, “Nehe ang naung isarenta eamulung se, ini hula Naing anga nuba?”
28 Ini Ebalet hula, “Iiba hula ꞌYohanis nehe sasaraniꞌ. Iiba hula, ꞌBoma Eliaꞌ, ba Lahatala Ehur vala tura angu. Eabeung hula Aaing angu, Latahala Ehur vala tura ang ba nu.”✡ Markus 6:14-15; Lukas 9:7-8
29 Yesus bot bale iadang taaning hula, “Aarunge iing hula Naing anga nuba?”
Petrus Ebalet hula, “Nimang anga ba Kristus! Lahatala turangmi matubing iila angu.”✡ Yohanes 6:68-69
30 Aarunge Yesus ihapat hula, “Iini ekang nehe iiba at mateng ekang!”
Mutu Yesus Esusalala bot Eamina Ana vengbanang
(Matius 16:21-28; Lukas 9:22-27)
31 Yesus bot Egahing vala ang naung iat mateng ehalomang vengbanang hula, “Naing anga ba Manusia Emamolo, turangmi Lahatala matubing iila. Na malekang susalala toang harak, se hada eboma-boma, agama Yahudi ebuang vala ekapala ang naung, bot guru agama ang naung emangpi Natobang bot bae Neamulung niang. Angu ebele eningse ini Nameang. Aarunge mietang aaru* Yunani ehur emamolo tura mi hurak hula, “mietang tue omimi”, aarunge ved anga ini vengtaanang hula, vede anga ꞌmietang nuꞌ, bot tobang ini vengtaanang hula, ꞌmietang aaruꞌ, bot tiang aaru ini vengtaanang hula, ꞌmietang tueꞌ, bot tiang aaru etobang angu ini vengtaanang hula, ꞌmietang butaꞌ. Aarunge Pura enehe bot Alor enehe bot NTT enehe ved evengtaanang angu tatara, bae nehe Yahudi etaanang edadenang niang: vede anga vengtaanang niang, aarunge tobang senge ping vengtaanang hula, ꞌmietang nuꞌ, tiang aaru ping vengtaanang hula, ꞌmietang aaruꞌ, bot tiang aaru etobang ping vengtaanang hula, ꞌmietang tueꞌ. Yunani ehur hula, “mietang tue omimi”, evengbanang hula, ꞌmietang aaruꞌ. Base hari Jumat veng Mutu Yesus aamina (Yunani ehur mi ini vengtaanang hula hari Jumat veng angu, ꞌmietang nuꞌ). Etobang hari Sabtu angu (Yunani ehur mi ini vengtaanang hula, ꞌmietang aaruꞌ). Ang muse hari Minggu veng Mutu Yesus bale aabeta (Yunani ehur mi ini vengtaanang hula, hari Minggu veng angu ꞌmietang tueꞌ, aarunge Pura ehur mi ping vengtaanang hula, ꞌmietang aaruꞌ). Base Mutu Yesus aamina angu mietang aaru omimi muse, Ana bale aabeta. se Nabale aabeta.”
32 Yesus iat mateng tarang aulang, aarunge Petrus ana Yesus Atang vengpina, senge Ehapat hula, “Nimang ekang mateng aulang ekang! Na bae vengkilang ini iatang ohit metma Aadana niang.”
33 Petrus mateng aulang, bae Lahatala Eomi eamulung niang. Yesus bale Egahing vala aabeung ang naung iuling, senge Ana Petrus ehapat etatabit hula, “He! Ola iila! Angu setang enehe eele emateng! Aana mang manusia eomi ang ba vengpikir, Lahatala Eomi angu aana bae vengpikir niang!”
34 Ang muse Yesus Ana nehe aabeung ang naung iarut hoa Egahing vala ang naung imampi taing vengkumpul. Ana iavomung-iapahang hula, “Nuba ba vengjalit hula Namulung se, ana malekang vengtahang Namulung ved kakanap! Eomi angu ana malekang metma etajebing ening, e Lahatala Eomi angu ba eamulung. Nehe hula ameang dise, ana malekang vengtahang emenghula nehe leut tevang vengaamina angu edadenang.✡ Matius 10:38; Lukas 9:23; 14:27 35 Nuba ba eabetang por alolang taang ang ba enangkolang vengomi, eningse eabetang angu bae ue niang! Aarunge nuba ba Namulung bot Lahatala Eomi angu metma nehe avomung-apahang, eningse aabetang ejajehing Lahatala abung angu ana harak.✡ Matius 10:39; Lukas 17:33; Yohanes 12:25 36 Pasaka por alolang e angu emangpi aaing veng di Lahatala aatobang se, bae egunang niang. 37 Bot pasaka angu emangpi aana metma eeoa di, bae metma ooramana aabetat ejajehing angu vengtelul jadi niang!
38 Iini vengani! Nehe por alolang taang ang naung, angase jasi-ahala angu ba ening toang amara. Ini bae Lahatala Eomi angu Eamulung niang. Base nuba ba Naing veng avaaloring Nevomung-nepahang angu bae eamulung niang se, Nandi aing veng Navaaloring bae Nimang Apang aadang mi aing mangaku niang. Naing anga ba Manusia Emamolo. Eningse Na sorga mi bale hoa. Lahatala Egahing vala hamulang sorga mi ang naung Nat hama-hama, Nimang Ekavasa eele angmi hoa, he nehe ateing hula Naing anga nuba.
✡8:11 Matius 12:38; Lukas 11:16
✡8:12 Matius 12:39; Lukas 11:29
✡8:15 Lukas 12:1
✡8:18 Yeremia 5:21; Yehezkiel 12:2; Markus 4:12
✡8:28 Markus 6:14-15; Lukas 9:7-8
✡8:29 Yohanes 6:68-69
*8:31 Yunani ehur emamolo tura mi hurak hula, “mietang tue omimi”, aarunge ved anga ini vengtaanang hula, vede anga ꞌmietang nuꞌ, bot tobang ini vengtaanang hula, ꞌmietang aaruꞌ, bot tiang aaru ini vengtaanang hula, ꞌmietang tueꞌ, bot tiang aaru etobang angu ini vengtaanang hula, ꞌmietang butaꞌ. Aarunge Pura enehe bot Alor enehe bot NTT enehe ved evengtaanang angu tatara, bae nehe Yahudi etaanang edadenang niang: vede anga vengtaanang niang, aarunge tobang senge ping vengtaanang hula, ꞌmietang nuꞌ, tiang aaru ping vengtaanang hula, ꞌmietang aaruꞌ, bot tiang aaru etobang ping vengtaanang hula, ꞌmietang tueꞌ. Yunani ehur hula, “mietang tue omimi”, evengbanang hula, ꞌmietang aaruꞌ. Base hari Jumat veng Mutu Yesus aamina (Yunani ehur mi ini vengtaanang hula hari Jumat veng angu, ꞌmietang nuꞌ). Etobang hari Sabtu angu (Yunani ehur mi ini vengtaanang hula, ꞌmietang aaruꞌ). Ang muse hari Minggu veng Mutu Yesus bale aabeta (Yunani ehur mi ini vengtaanang hula, hari Minggu veng angu ꞌmietang tueꞌ, aarunge Pura ehur mi ping vengtaanang hula, ꞌmietang aaruꞌ). Base Mutu Yesus aamina angu mietang aaru omimi muse, Ana bale aabeta.
✡8:34 Matius 10:38; Lukas 9:23; 14:27
✡8:35 Matius 10:39; Lukas 17:33; Yohanes 12:25