1 'Mɔ ‑bʋ, ‑ɛ mɔ 'cʋɛ a ye'nanyɔ, 'mɔ ‑yɩ ‑mʋ mɔ 'crɩɩ ‑nɩ, ‑mɔ Gayusɩ, ‑ɛ mɔ 'na ꞊wlʋ a nɩnatumu, 'n ‑nʋɛ ‑nɩ ‑tɛɛ.

2 'Na nɩnatumu, 'n dɛ Nyɩsʋa, ‑ɛ di꞊e nu, ‑tɛblɩ a pɛpɛ 'mʋ ‑mʋ wɛn, kɔ, ‑na 'hʋɩ 'mʋ ‑tɛɛ nu ‑wɛ. 'N yi꞊e nɩ, ‑ɛ mɔ, ‑na ꞊wlʋ nu ‑tɛɛ, 'kɩ 'ʋ Nyɩsʋa a 'hru wlɔn.

3 ‑Yusu a nyibli ‑mʋ', ‑ʋ ‑hʋɛn 'lɩ ‑mʋ ‑mɔ lɛ, ‑ʋ yɩ 'nɛ‑ lɛ di, ʋ hlɛ꞊ɛ nɩ, ‑ɛ mɔ, ꞊cibi 'ʋ, ꞊nɩ nɛ ‑tɛɛ a 'hru. Dɛ a 'mʋ, ɛ nii 'mʋ dɔdʋ dɩakɩ. 'N yi꞊e nɩ, ‑ɛ mɔ, kɛ‑ ‑ni꞊e lɛ. 4 'Bʋ mɔ, 'nɩ yɩ nɩ 'wɩn, ‑ɛ mɔ, 'na 'yonʋ nɛ 'hru a ‑tɛɛ, ɛ mɔ dɛ ꞊nɩɔ, ‑ɛ nii 'mʋ dɔdʋ dɩakɩ, 'ɛ ‑hi 'ʋ 'a ‑nɛ ꞊dedede 'ʋ.

5 'Na nɩnatumu, ‑mɔ nyiblo ꞊nɩɔ, ‑ɛ ni Nyɩsʋa a ‑kʋan ‑tɛɛ, ‑kɔtɩ ‑Yusu a nyibli ‑mʋ', ‑ʋ ‑hʋɛn 'lɩ 'waa 'blʋgbɩ klɛ, ‑ʋ hlɛ Nyɩsʋa a ‑tɩ, ‑yɩ ꞊nʋ 'nɩ ‑hɛɛ ‑nɩ dɩakɩ. 6 Nyibli a 'mʋ, ‑yɩ ‑hɛɛ ‑nɩ, 'bʋ yɩ 'lɩ nɩ di, ‑Yusu a nyibli ‑bʋ, ʋ ‑nɩ 'nɛ‑, ʋ yɩ ꞊nʋ 'nɩ ‑lee ‑nɩ, ‑ɛ mɔ, ‑nʋɛ ꞊nʋ nɩ dɩakɩ. 'N nyɛɛ ‑mʋ lɛ, 'cibi 'ʋ ‑bʋ ‑hɛɛ ꞊nʋ, ‑ɛ di꞊e nu, ʋ 'mʋ 'waa 'dagba 'lu ‑mɔ gba ‑tɛɛ. ‑Hɛɛ ꞊nʋ, ꞊wɩ yɩ, ‑tɛ Nyɩsʋa ni 'a ‑hʋhʋa. 7 'Dagbɩ ‑mʋ', ʋ mi lɛ, ‑Yusu 'Klɩsʋ a ‑kʋan ʋ mi nu mɔ. Ʋ 'yɩ꞊ɩ kɩ ‑wɛn, 'kɩ nyibli ‑mʋ', ‑ʋ 'yɩ Nyɩsʋa ‑yi, bʋ ‑hɛɛ ꞊nʋ. 8 'A ‑tɩ, ‑a mʋ ‑bʋ, ‑ʋ mɔ ‑Yusu a nyibli, ‑a kɔ ‑ba ‑hɛɛ nyiblidʋ a 'mʋ, ‑ɛ di꞊e nu, ‑a 'mʋ ꞊nʋ kɩ bi, Nyɩsʋa a ‑kʋan a 'mʋ, ʋ ni, ʋ kɔ ‑a mʋ 'hʋɛn‑, ‑a 'mʋ꞊ʋ nu, ‑tɩ a ‑tɛɛ ‑mʋ', ‑ɛ ‑hɔn 'lɩ Nyɩsʋa ‑mɔ, ɛ 'mʋ bʋ 'hɛɛn ‑nɩ.

9 'N 'crɩɩ 'cʋɛ ‑mɔ, kɛɛ, nyiblo ‑mʋ', ‑ɛ mɔ Diotrɛfʋ, ‑tɩ ‑bʋ 'n ‑hla, ɛ 'nɩ ‑hʋa꞊a lɩ bʋ pʋ꞊ʋ nʋa yɩ bʋ. 'A 'lulɛ‑hihie a pɛpɛ, nɔ‑ mɔ bʋ nu 'cʋɛ a nyiblogbagbʋdɛ. 10 'Bʋ mɔ, 'nɩ di 'lɩ, yɩnyre‑tɛblɩ ‑mʋ', ɛ ni, 'n di 'a ‑tɩ 'nɩ hla, 'kɩ 'ʋ nyibli a ‑pɛpɛ ye', ‑kɔtɩ ɛ yɩ nyre 'na 'nyrɛ yɩ dɩakɩ. Ɛ 'yɩ dɛ nɩ ‑do a 'mʋ 'pa‑, ɛ 'nɩ ‑nu꞊o lɩ꞊ɩ. ‑Yusu a nyibli, ‑ʋ mɔ 'dagbɩ, 'bʋ mu 'lɩ꞊ɩ ‑mɔ, ɛ 'nɩ 'ble꞊e lɩ ꞊nʋ kʋa, nyibli ‑bɩ 'bʋ ‑hʋɛ bʋ 'ble wɛn ꞊nʋ kʋa, ɛ 'nɩ ‑ha꞊a lɩ ꞊nʋ mɛ lɛ, ʋ 'nɩ ‑nu꞊o lɩ꞊ɩ, 'ɛ blɛ ꞊nʋ lɛ, 'kɩ 'lɩ 'cʋɛ bʋ.

11 'Na nɩnatumu, ꞊nɩ 'kʋɛ 'lɩ nyibli a nunuklɔ ‑hʋan ꞊wien lɛ, kɛɛ, ꞊haannyibli a nunuklɔ, nɔ‑ ‑bʋ kʋɛ ꞊wien lɛ. Nyiblo ‑mʋ', ‑ɛ 'cibi 'ʋ ꞊haandɛ a nunuo, ɛ nɔ‑ mɔ Nyɩsʋa a 'yu. Kɛɛ, nyiblo ‑mʋ', ‑ɛ 'cibi 'ʋ yɩnyre‑tɛblɩ a nunuo, ɛ nɔ‑ ‑mɔ ‑bɩ, ɛ 'yɛ Nyɩsʋa nɩ yi.

12 Nyiblo ‑mʋ', ‑ɛ mɔ Demetriusɩ, nyibli a pɛpɛ hlɛ 'a ꞊haan‑tɩ. 'A 'yrinaabʋɩ 'sii 'ʋ yɩ ‑tɛɛ, 'ɛ tʋɛ nyibli ‑tɩ a ‑tɛɛ, ‑ɛ ‑hɔn 'lɩ Nyɩsʋa ‑mɔ. ‑Aan 'mumu, ‑a wɛn꞊ɛ kɩ, ‑ɛ mɔ, ɛ mɔ ꞊haannyiblo ꞊nɩɔ. 'Bɩ ‑yi꞊e nɩ, ‑ɛ mɔ, ‑tɩ ‑bʋ, ‑a ‑hlɛ, ɛ mɔ ‑tɩ a ‑tɛɛ ꞊nɩɔ.

13 'N kɔ ‑tɛblɩ ‑hʋɔhʋɩ ꞊bʋ lee nɛ 'a mʋ, kɛɛ, 'nɩ ‑hʋa꞊a lɩ ꞊bʋ hlaa 'nɛ꞊ɛ 'crɩɛn ‑bʋ 'kwli. 14 'N ‑hʋɛ꞊ɛ nɩ, 'kɩ ti gbi 'kwli, ꞊bʋ di wɛn 'lɩ ‑mʋ ‑mɔ, ‑a 'mʋ yɩ bʋ ‑nɩnɩ ‑nɩ, ‑a 'mʋ꞊ʋ hla.

15 Kɩbʋwɛɛnlɛ 'kɩ 'ʋ ‑mʋ ‑mɔ. ‑Na nɩnatumupʋ a pɛpɛ, ‑ʋ nɩ 'nɛ‑, ʋ 'bɛti ‑mʋ. ‑Aan nɩnatumupʋ a pɛpɛ, 'a ‑nɛ nyiblo 'bʋ nɩ 'ʋ, ‑a 'bɛti꞊e.