2
Cohãcjʉ̃ yere quehnoañe buheyere marine sa tʉhotu cãhno cahmedare
1 Sa yena Cohãcjʉ̃ macʉno waro marine yahuriquiro tiquiro ijigʉ̃ masina tiquiro yahuyere mari tʉhorire quehnoano wacũno cahmene marine, “Tire boari”, nina. 2-3 Angele yahurire masa pehe yʉhdʉdʉcagʉ̃ ihñano Cohãcjʉ̃ tiquinare buhiri dahreahye. Sa buhiri dahrero angele tiquina yahuri poto ijigʉ̃ ihñono niahye. Sa yena angele yahuri poto ijigʉ̃ masina, tire marine yʉhtiro cahmene. Ti yʉhdʉoro Cristo pehere yʉhtiro cahmene. Tiquiro mari pʉhtoro marine tiquiro yʉhdʉoatire yahu mʉhtahye. Sa ye tiquirore tʉhoriquina pehe tiquiro yahurire marine yahu turiari, marine quehnoano masigʉ̃ yee tehe. Sa yero ti buheyere marine tiquiro yʉhdʉoati buheyere mari sa tʉhotu cãgʉ̃ Cohãcjʉ̃ marine buhiri dahrerota. Tire duhti masiedaja mari.
4 Ti buheyere tʉho mʉhtariquina tiquina buheri watoa Cohãcjʉ̃ pehe ti buheye poto ijigʉ̃ ihñono nidi. Tiquiro tutuaye mehna ihñono nidi. Sa yero peye tahari tiquiro tutuaye mehna ye ihñono ti buheyere poto ijigʉ̃ ihñono nidi. Sa yero tiquiro yequinare tiquina ye masiatire tiquiro cahmeno sahata cũahye. Espíritu Santo pehe ijire marine ye masigʉ̃ yeriquiro.
Jesucristo mari yero sahata pagʉ tiriquiro masa bajuahye
5 Pihtiri deco bato ijiyequina Cohãcjʉ̃ caha ijiyequina pʉhtoa ijisi angele pehe. Tiquinare pʉhtoa sõsi mari Pacʉ. 6 Sa yero ihcãquiro mari Pacʉre tiquiro yahuducurire ohõ saha ni ojoahye panopʉ:
Masa ihyo ijiyequina tiquina ijiepegʉ̃ta tiquinare wacũre mʉhʉ. Masare quehnoano yere mʉhʉ. 7 Meheñe decorigã angele docapʉ masare cũahye mʉhʉ. Sa cũepegʉta yojopʉre tiquinare tutuayere ohogʉ, pʉhtoa sõahye mʉhʉ. 8 Mʉhʉ sa sõgʉ̃ ahri yehpapʉ ijiyequina wahiquina gʉ̃hʉ bui dʉhsaro marieno masare cũahye mʉhʉ, niahye panopʉ cjʉ̃no mari Pacʉre.
Sa sõno ahri yehpapʉ ijiyequina wahiquina gʉ̃hʉ bui dʉhsaro marieno masare cũahye. Masare tiquiro sa pʉhtoa sõepegʉ̃ta ijipihtiyequina ahri yehpapʉ ijiyequina wahiquina masare ihña wahãedarĩaga, ʉsã tʉhotugʉ̃. Ahri yehpapʉ ijiyequina wahiquinare ihña wahãgʉ̃ yeraniaga masa. Ijipihtiye bui ijieraniaga masa. 9 Sa tiquinare ihña wahãgʉ̃ yerapenata Jesu pehere wacũ tutuaja mari. Meheñe decorigã angele docapʉ mari Pacʉ tiquiro macʉno gʉ̃hʉre cũahye, mari ñañe buhiri yariatiquirore. Mari Pacʉ marine cahĩno mari yariaborirore Jesure yariagʉ̃ cahmeahye. Sa yero tiquiro sa yariagʉ̃ ihñano tiquirore tutuayere ohoro, pʉhtoro sõahye tiquirore.
10 Cohãcjʉ̃ ijipihtiyere bajumehnediquiro ijire. Sa ye ijipihtiye tiquiro ye dihita ijire. Sa yero Jesure yaria dutiro ñañene cohãgʉ̃ yeahye tiquirore. Sa yeahye tiquiro masa peyequina tiquiro yequina ijiatiquinare ʉhmʉsepʉ neano taro. Jesu sa yero, ñañe marieniquiro, quehnoa yʉhdʉariquiro tiquiro ijiyere ihñono niahye. Sa yero Jesu pehe marine yʉhdʉoriquiro, mari pʉhtorota ijire. 11 Ijipihtiyequina masare tiquina ñañe yerire cose were tiquiro. Sa yero Jesu mari tiquiro cose wenohrina mehna Pacʉ tire Cohãcjʉ̃re. Mari Pacʉ ihcãquirota ijire. Mari Pacʉ tiquiro ijigʉ̃ Jesu marine tiquiro yequinare tiquiro cose wenohrinare “Yʉhʉ acaye ijire”, ni pisuro ne bʉe tierare. Tiquiro sa ni pisurire mʉsare yahutja. 12 Ohõ saha nino niahye tiquiro:
Cohãcjʉ̃, mʉhʉ ijiye tiyere yahutja yʉhʉ acayepʉre. Ijipihtiyequina yeequina ihñonopʉ mʉhʉre ño peogʉ “Tutuariquiro ijire”, ni yahutja yʉhʉ tiquinare, niahye tiquiro Pacʉrore.
13 Ahri gʉ̃hʉre niahye tiquiro:
Cohãcjʉ̃re wacũ tutuaʉtja yʉhʉ, niahye tiquiro.
Ahri gʉ̃hʉre niahye tiquiro:
Ohõ ijiaja yʉhʉ. Cohãcjʉ̃ pohne mehna ohõ ijiaja. Yʉhʉre tiquiro cũriquina yʉhʉ acaye mehna ohõ ijiaja, niahye tiquiro yequinare “Yʉhʉ acaye” ni pisuro.
14 “Tiquiro pohne” tiquiro niñequina pagʉ tiyequina mari ijigʉ̃ ihñano, Jesu pehe mari ya pagʉ saha pagʉ tiriquiro ahtahye. Sa ijiriquiro ahtahye tiquiro curusapʉ yariaro taro, watĩnore butigʉ̃ yero taro. Tiquiro watĩno pehe yaria dutiriquiro ijire. 15 Sa ye watĩnore butigʉ̃ yero, marine yʉhdʉore. Mari pehe decoripe mari yariatire cuemi. Sa cuerina ijina pecapʉ wahaborina ijimi mari. Sa ijina mari ijigʉ̃ ihñano tiquiro marine yʉhdʉore. 16 Sa yʉhdʉoro angele pehere yedohoro ahtaerahye tiquiro. Abrahã panamena iji turianare Cohãcjʉ̃ yequinare mari pehere yedohoro ahtahye. 17 Sa yero tiquiro mari acayʉro warota ahtahye. Ihcãno saha mari yero saha pagʉ tiriquiro ahtahye. Sa ahtaro mari yʉhdʉatire mari ñañe yerire mari Pacʉre cohã dutiro ahtaro niahye. Sa yero mari yequina pahia pʉhtoa tiquina yeriro saha yero ahtaro niahye. Mari yero saha ijiro marine quehnoano paja ihñare. Sa yero Cohãcjʉ̃ cahmeno saha sa yeducuriquiro ijire. Sa yero tiquiro mari yaquiro pahia pʉhtoro ijiro nine. 18 Tiquiro ñano yʉhdʉahye. Sa yero watĩno tiquirore ñano ye dutimahye. Yerahye tiquiro. Sa ñañene yerariquiro ijiro, tiquiro pehe mari gʉ̃hʉre ñañene yeragʉ̃ ye masine. Watĩno ñañene tiquiro ye dutigʉ̃ ihñano marine ñañene yeragʉ̃ ye masine Jesu.