1 Sa ye bohrearopʉ pahia pʉhtoa, bʉcʉna, ʉsã judio masare buheyequina, ijipihtiyequina apequina pʉhtoa mehna cahmecoa, yahuducuahye tiquina yeatire masiñe tehe. Tiquina basi yahuducu tuhasa, Jesure dʉhte, ne cã, Pilatore ohoahye tiquirore. 2 Tiquina ne sagʉ̃ ihñano Pilato tiquirore sinituahye:

—‍¿Potota judio masa pʉhtota ijiajari mʉhʉ? niahye tiquiro Jesure.

—‍Mʉhʉ nino sahata ijiaja, ni yʉhtiahye Jesu.

3 Sa ye pahia pʉhtoa peye yahusãhye tiquirore. 4 Tiquina sa ni yahusãgʉ̃ tʉhoro Pilato tiquirore sinituahye tja:

—‍Ahriquina mʉhʉre peye yahusãñe nine. ¿Tiquina sa yahusãepegʉ̃ta yʉhtierajari mʉhʉ? niahye tiquiro.

5 Tiquiro sa niepegʉ̃ta Jesu ne pari turi yʉhti nemoedahye. Sa yero Pilato ne dʉhse ni masiedahye.

6 Cʉhmaripe pascuaripe masa yaquiro ijiatiquirore ihcãquiro peresupʉ ijiriquirore tiquina cahmediquirore Pilato wio basaducue tiahye. 7 Ti pjere Barrabá wame tiriquiro peresupʉ ijiahye. Tiquiro pʉhtoare cohã duayequina, masare wejẽñequina mehna cjʉ̃no ijiahye. 8 Sa ye masa peyequina Pilato cahapʉ esaye, tiquirore siniahye:

—‍Cʉhmaripe ʉsãre mʉhʉ yeducuriro sahata yeya ʉsãre. Ihcãquiro peresupʉ ijiriquirore ʉsãre wio basaya, niahye tiquina.

9 Tiquina sa nigʉ̃ta Pilato tiquinare sinituahye:

—‍¿Mʉsa yaquiro ijiatiquirore mʉsa judio masa pʉhtorore wio basaboagari yʉhʉ? ni sinituahye masare Jesure wio duaro.

10 Jesure masa tiquina cahĩgʉ̃ ihñañe pahia pʉhtoa gʉ̃hʉ tiquirore ihña tuhtiahye. Sa ihña tuhtiye tiquirore ohoahye Pilatopʉre. Sa yero masa tiquina cahĩdi buhiri tiquina ihña tuhtirire masino Pilato Jesure wio duamahye. 11 Tiquiro sa wio duepegʉ̃ta pahia pʉhtoa Jesu mehna masare usuagʉ̃ yeahye. Ohõ saha ni dutiahye tiquinare: “Barrabá pehere wioya. Jesure wejẽ dutiya”, ni dutiahye masare. 12 Sa yero Pilatore Barrabáre tiquina wio dutiri bato Pilato tiquinare sinituahye tja:

—‍¿Ahriquiro judio masa pʉhtoro mʉsa nidiquiro pehere dʉhse yegʉtari yʉhʉ, mʉsa sa nigʉ̃? ni sinituahye tiquiro.

13 —‍Curusapʉ quẽ biha wejẽña tiquirore, ni sañuducuahye masa.

14 —‍¿Yabe borore ñañene yeari ahriquiro, mʉsa sa ni sañuducugʉ̃? ni sinituahye tiquinare.

Tiquiro sa nigʉ̃ tʉhoye tiquina sañuducu nemoahye tja:

—‍Curusapʉ quẽ biha wejẽña tiquirore, ni sañuducuahye tiquina.

15 Tiquina sa ni sañuducugʉ̃ tʉhoro Pilato pehe masare bucuegʉ̃ ye duaro Barrabá pehere peresupʉ ijiriquirore wio dutiahye masa tiquina cahmediquirore. Sa yero Jesu pehere yuta dari mehna tana duti, curusapʉ quẽ biha wejẽ dutiro ohoahye surarare.

16 Sa ye surara Pilato ya wʉhʉpʉ pretorio wame tiri wʉhʉpʉ tiquirore ne sahye. Ne sa tuhasa tiquina apequina surarare tiquina mehna cjẽnare cahmecoañe tehe pijioahye. 17 Sa ye tiquina pʉhtoro ya suhtiro yero saha bajuri suhtirore Jesure sãa, pota behtore dahre, ti behtore tiquiro dapu bui duhu peoahye. 18 Sa ye tuhasa ohõ saha ni bʉjʉpeahye tiquina tiquirore:

—‍Quehnoano ahtaya. Judio masa pʉhto, quehnoano ahtaya, ni bʉjʉpeahye.

19 Sa nieta yucʉgʉ mehna tiquiro dapure quẽ, tiquirore sihco puti wisõ, cua pesaro yeyequina yero saha tiquirore quehe sa, ño peoro saha yeahye. Tiquirore ñano yeye niahye. Sa ye bʉjʉpeye niahye. 20 Sa yepe tuhasa tiquina sãari suhtirore tu we nedoqueo, tiquiro ye suhti pehere tiquirore sãa, tiquirore curusapʉ quẽ biha wejẽñe wahaye, nea wahahye tiquina.

21 Sa ye topʉ wahariquiro, Simo Cirene cjʉ̃no ihquẽ wʉhʉse ijiropʉ esariquiro, tiquina cahapʉ wihigʉ̃ ihñañe surara pehe tiquirore Jesu ya curusare wʉa cã dutiahye. Alejandro, Rufo pacʉro ijiahye Simo pehe.

22 Waha, Gólgota wame tiropʉ esahye. Gólgota nino “Dapu pehtoro”, nino nine. 23 Sa ye vinore mirra wame tiye co mehna tiquina moredi core Jesure ohomahye. Sa yero ti core sihni duerahye tiquiro. 24 Sa ye curusapʉ Jesure quẽ bihahye tiquina. Quẽ biha tuhasa tiquiro suhti ijirire “¿Noa yaro ijirotari ohõ?” ni cahme doquepeahye tiquina.

25 Jesure curusapʉ tiquina quẽ bihagʉ̃ ihtia hora dʉhsahye coheri pje esato. 26 Sa ye curusapʉ ohõ saha ni ojoari pjĩne duhu ohõahye tiquina tiquiro ñañe buhirire yahu duaye. “AHRIQUIRO JUDIO MASA PɄHTORO IJIRE”, ni ojoahye tiquina ti pjĩne. 27 Sa ye pʉaro yaque bʉcʉna Jesu caha apeye curusaripʉ tiquina quẽ biha ohõriquina ijiahye tiquina. Ihcãquiro poto pehe, apequiro cũ pehe pehe quẽ biha ohõahye tiquina gʉ̃hʉre. [ 28 Tiquina sa yegʉ̃ panopʉ Cohãcjʉ̃ yere tiquina yahu ojoariro sahata waharo niahye. Ohõ saha ni ojoahye: “ ‘Dutiyere yʉhdʉdʉcayequina mehna cjʉ̃no ijire’, ni, tʉhoturi masa tiquirore”, ni ojoahye panopʉ.]

29 Sa ye curusari cahapʉ yʉhdʉ cãñequina Jesure ihña, tiquina dapu pacare yuredoqueo, tiquirore ñano ni yahuducuahye:

—‍Quehnoare. Quehnoare. ¿Cohãcjʉ̃ wʉhʉre cohã, ihtia deco wahaboro pari turi ti wʉhʉre dahreacjʉ ijiajari mʉhʉ? 30 Mʉhʉ basi dijiahya. Sa yegʉ mʉhʉ basi yedohoya. Sa yegʉ yʉhdʉ witigʉta mʉhʉ, ni bʉjʉpeahye tiquina.

31 Tiquina yero sahata pahia pʉhtoa gʉ̃hʉ ʉsã judio masare buheyequina gʉ̃hʉ tiquirore sa ni bʉjʉpeahye. Sa ni bʉjʉpeye ohõ saha niahye tiquina basi:

—‍Tiquiro apequinare yʉhdʉoriquiro ijieperota tiquiro basi yʉhdʉo masiedare. 32 “Israe masa pʉhto, Cristo ijiaja”, nimedi tiquiro. Sa yena tiquiro basi dijia tagʉ̃ ihñana tiquirore wacũ tutuanata, ni bʉjʉpeahye tiquina.

Sa ye yaque bʉcʉna tiquiro caha tiquina quẽ biha ohõriquina gʉ̃hʉ sata ñano ni bʉjʉpeahye tiquirore tja.

33 Sa ye coheri pje ijigʉ̃ ihtia hora waro ijipihtiropʉ nahitiaa wahahye. 34 Sa yero nahitia yʉhdʉgʉ̃ waro Jesu tutuaro sañuducuahye:

—‍¿Eloi, Eloi lema sabactani? niahye tiquiro.

Sa nino ohõ saha nino niahye. “¿Yʉhʉ Pacʉ, yʉhʉ Pacʉ, dʉhsegʉ yʉhʉre cohãjari mʉhʉ?” nino niahye.

35 Tiquiro sa nigʉ̃ tʉhoye ihquẽquina topʉ ducuriquina ohõ saha nimahye:

—‍Cohãcjʉ̃ yere yahu mʉhtariquirore Elia mʉnanore pijioro niboaga, nimahye tiquina.

36 Sa yero ihcãquiro tiquina mehna cjʉ̃no oma cã, aco ihmini sʉhtere vino sʉẽñe core tiquiro sohari sʉhtere ne cã, yucʉgʉ sohtoapʉ dʉhte ohõ, Jesure sihõmahye. Sa sihõno ohõ saha nimahye:

—‍Cohteniña. Elia mʉnano ahriquirore tiquiro yʉhdʉogʉ̃ ihñarĩihna mari, nimahye tiquiro apequinare.

37 Tiquiro sa nidi bato Jesu pehe tutuaro sañuducu, yariaa wahahye. 38 Tiquiro yariagʉ̃ta Cohãcjʉ̃ wʉhʉ cjã suhtiro cahsero tore tiquina cahmotari cahsero deco mehna bui pehe tʉhnʉ dijia ta, tʉhnʉ maa cjũ saa wahahye. 39 Tiquiro sa yariagʉ̃ ihñano surara pʉhtoro Jesu caha ducuriquiro ohõ saha niahye:

—‍Ijirota ijire. Ahriquiro Cohãcjʉ̃ macʉnota ijire, niahye tiquiro.

40 Sa ye yoaropʉ ducuye numia Jesure ihñaducuye niahye. Tiquina numia mehna María Magdalena ijiahye. Apecoro María wame tiricoro gʉ̃hʉ ijiahye. Ticoro pehe José, tiquiro bahʉro Santiago, tiquina pacoro ijiahye. Apecoro Salomé ijiahye. 41 Tiquina numia Jesu yere quehnoano tʉhoyequina numia ijiye, Galilea yehpapʉ tiquiro ijigʉ̃ tiquirore yedohoe tiahye. Tiquina numia mehna peyequina apequina numia gʉ̃hʉ Jerusalẽpʉ Jesu mehna ahtariquina numia ijiahye.

42-43 Sa ye ti deco tiquiro yariari deco saurú pano judio masa ʉsã sori deco pano ijiri deco ijiahye. Sa yero pascua cjẽ ijiatire tiquina quehnoyuri deco ijiahye. Ti ñamita José Arimatea cjʉ̃no cuero marieno Pilato cahapʉ esahye Jesu pagʉre sinino esaro. José judio masa ʉsã pʉhtoa mehna cjʉ̃no, pʉhtoa tiquina cua pesaro ihñariquiro waro ijiahye. Sa yero Cohãcjʉ̃ masa bui tiquiro pʉhtoro sajãtore cohtero niahye. 44 Sa yero José Pilatore tiquiro sini tuhasagʉ̃ tʉhoro tʉho maria wahahye Pilato pehe. “¿Jesu yaria tuhasayari?” ni tʉhoturo, tʉho maria wahahye. Sa yero surara pʉhtorore pijio ohõ saha niahye tiquirore:

—‍¿Jesu yariaa wahari? ni, sinituahye tiquirore.

45 Tiquiro sa nigʉ̃ surara pʉhtoro yʉhtiahye:

—‍Yariaa wahari, niahye.

Tiquiro sa nigʉ̃ Pilato Jesu pagʉre oho dutiahye Josére. 46 Tiquiro sa oho dutiri bato José quehnoari suhtirore dúahye. Dú tuhasa, Jesu pagʉre ne dijio, suhtiro mehna wahme, masa copepʉ ʉtãpʉ tiquina seheri copepʉ tiquiro pagʉre cũahye. Cũ tuhasa, ti cope caha ijiria ʉtãre pajiria ʉtãre tu torẽ cã, ti copere bihahye. 47 Sa ye María Magdalena, María José pacoro Jesure tiquina cũrirore ihñahye.