2
End cale ingaŝax eŋ
1 Awa teɓin oxeỹ or ex yo, osit or ex yo, egi ed ɓëỹëŋënax ɓër kë laɓayand el, oƴëkëraxi ol do gë odena od ex yo. 2 Ñandiyindëleŋun ang omër omënëk fo eyeƴan ed Kaxanu el ang këɓi ỹandind omër ɓëndoyer ak, en pirixën gër apexa, 3 gayikako anang dëŋ nang kën ang nënga ko Axwën ak.
4 Tëkayino ar ex ekaỹ eɓëngw ed lap bani ɓela an. Xarak, mëŋ ex ed yata ko Kaxanu el, ed xëɓënan këŋo el. 5 Ang këni ɓarënd oxaỹ ex gi aciw̃ ak, wën ɓëte ɓarërin ang oxaỹ oɓëngw fo, en gixën Aciw̃ amënëk, ɓëŝaɗaxan ɓëw̃ënëk, eno dinaxënënd Kaxanu, paɓ gë Yesu Kërisët, ocaɗaxa od onden, od ko ỹana exo ŋanënd. 6 Gayikwa are rek gër Oñëgw Omënëk:
«Watin ga këme xwëtënd gër Siyoŋ ekaỹ ekëla,
elo sana këme, elo xëɓënan ke.
Do ar kë w̃a endexëm an,
din aŋo cëfënan na✡ 2.6 Esayi 28.16.»
7 Awa ekaỹ elo këŋun yëlënd epëɓ el, wën ɓër xwëta këŋo ɓën. Ɓarikan gër ɓër aŋo kwëta ex na:
«Ekaỹ elo ex ed lap bani ɓëɓaƴ el
xarak mëŋ ex ekëla el✡ 2.7 Calemoñëw̃ 118.22.»
8 Do ɓëte:
«Ekaỹ elo këni fokërënd ɓela ɓën,
ekaỹ elo këɓi reɓënd✡ 2.8 Esayi 8.14.»
Ga xeƴ këɓi eni tëf eyeƴan ed Kaxanu el, ɓëte gayik mondako bax eɓi gi.
9 Ɓarikan wën cëŋ, er hi kën andëw̃ëra and sana ko Kaxanu, ɓër gë oŝaɗaxan or emun, enëng emënëk, ɓulunda ir xwën ko. Mondako hik en tëfëtëraxënënd ɓecërëcaxik ɓend ri ko ar nëcëtëgu këŋun gër ecamëɗan do w̃ëla këŋun gër angoɓen akëɓënaxik andexëm an. 10 Wën anëka hi kën gërëgako ɓulunda ir Kaxanu, xarak akarëk aŋ, an gi bana ɓulunda. Kaxanu abaŋo xaỹënan na endewën eŋ. Ɓarikan gërëgako axaỹënan këŋo xaỹënanënd.
11 Wën ɓëmaỹe ɓënd ke ɓalënd mbaŋ ɓëŋo, axara xara këmun gayikako ɓër okucan, do ɓëliyer fo hi kën, kemënayin en kwëỹëta oñandi od eman od kë w̃erelind enjëw̃ ok. 12 Mëlayayindën ŝenene ola orewën ol mërëxand ir ɓër aŋo kwëta ex na Kërisët ɓën. Do gër ed kënun nangaŝandërand, watindëlexëni ɓandixa ɓanjekax ɓandewën ɓaŋ, eno cëkwaxën Kaxanu yatir këɓi h̃atën.
End epëɓ ed owun eŋ
13 Ang ỹapëk gër Axwën ak, pëɓindën olëngw or ex yo. Pëɓindëno emun eŋ, mëŋ ar ex ar gapak an. 14 Pëɓindënëɓi ogofërëner ok gayik emun eŋ fana këɓi enëɓi nëpënd ɓëw̃endëran ɓën do enëɓi cëkwand ɓër kë rind ɓenjekax ɓën. 15 Enimin oñandi od Kaxanu ok ex, paɓ gë ɓenjekax ɓend kën rind ɓeŋ, eni cëmind ɓela ɓësitarak ɓën, ɓër ỹoweỹ ax nang ex na ɓën. 16 Ɗiyayindën ang ɓërëƴaƴa fo, ɓari këren ɗaɓayand na gë orëƴaƴa olo en dixën eñëŋënax eŋ ado ɓayik ỹoweỹ aŋun cëɓa ex na: giyin okaɗëp od Kaxanu. 17 Pëɓindënëɓi ɓela ɗek, ŋanindënëɓi ɓëmaỹe ɓëŋ, yëdayindëno Kaxanu, do pëɓindëno emun eŋ.
End oxëreceŋ eŋ
18 Wën ɓëriyenin ɓër gër ɓëciw̃ ɓën, yëdayindënëɓi ɓëxwën ɓërewën ɓën do mayindën endeɓën eŋ ado eni nemëri, ɓari ax gi ex na ɓër ɓëngwëk do nënga këni ɓën fo. 19 Gayikwa oyekax kën ŝot ga ɓuŋa kën ɓuŋand en toro në end Kaxanu, gë amena këm. 20 Enimin, aŝëkw nde këno ŝëkwënd ar kë ɓuŋand gër toro në end ga w̃endëra ko an? Ɓarikan angëmëne aɓuŋa kën ɓuŋand në end ga kën rind ɓenjekax, enjekax ex gër ogës od Kaxanu.
21 Në eŋo yataxën këŋun Kaxanu gayik Kërisët,
mëŋ ɓëte, mondako soro ko në endewën na, eno tëfëtelixënënd,
en tëfaxënënd ɓanjëta ɓandexëm ɓaŋ. 22 Ɓari mëŋ elod axo mendëra ex na,
ɓëte elod ala ax wël ex na enëgwëŝ gër etëỹ edexëm.
23 And bano ŝirërand aŋ abaɓi w̃aŝa na,
and baxo sorond aŋ, ala abaŋo wesa na.
Ɓarikan aseɓën seɓën këŋo amaŝa aŋ ar kë xitind ŝenene an.
24 Mëŋ dëŋ lëɓinak ɓamena ɓandeɓi ɓaŋ gër eman endexëm and fika këno gër kërëwa
do ŝës ko në end ɓeñëŋënax ɓendeɓi aŋ.
Mondako ŝës këne ene capëraxëne gë ɓeñëŋënax ɓeŋ,
ene ɗiyaxënënde aniyan and ŝenene.
Gë tembaỹ indexëm iŋ kën fakaxënënd.
25 Enimin, anëka hi ban ang oyel or nambërak fo✡ 2.25 Esayi 53.4-6.
Ɓarikan gërëgako anëka ɓaka kën gër ar ex axaɗac
do anëkona arewën.