1 Iyan heini menge lalag te Nengazen he impezayag din diyà te ki Joel te anak ni Petuel.

2 Sikiyu is menge edumala te Juda wey is langun he meǥinged kayi, pemineǥa niw heini is egkeǥiyen ku ziyà te keniyu. Wazè pa nehitavù he iring kayi hein kaazen pa te menge kepuun niw wey kayi te keniyu en he timpu ǥuntaan. 3 Kinahanglan he edtudtulen heini ziyà te kada lapis te kevuwazan niw:

4 Duen ebpekedtitinundug he menge grupu te menge terapan he ebpendezaat. Is egkesamà he menge pinemula he kenà egkekaan duen te egkehuna he grupu ne egkeenen en maan te ebpeketinundug he grupu taman te egkaamin is menge pinemula.

5 Sikiyu is menge lelenguten, enew kew wey mebpurung medsineǥew! Su wazè niw en egkeinum; wazè en menge paras he egkeveelan he veǥu he vinu. 6 Su is tanà te Nengazen mid-etaki te mekahandekhandek he menge nasyun. Iring te terapan is menge sundaru zan su utew subra is kahabet dan. Meǥarang is menge ngipen dan iring te menge ngipen te erimaung. 7 Midezeetan dan is menge pinemula he paras te Nengazen wey is menge kayu zin he higus. Migketket dan is menge lekang kayi taman te mibmeputì is menge subpang.

8 Sineǥew kew iring te raǥa he mibivisti te saku te kebpaahà he ingkeseeng din is kebpatey te ebpengesawa kandin. 9 Su wazè en trigu wey vinu he igkepemuhat diyà te valey te Nengazen; umbe edlalew is menge memumuhat he ebpenilbi te Nengazen. 10 Egkengezeetan is menge pemuleey he henduen be te etew he edlalew. Egkengezeetan is menge trigu ne egkeǥangu is menge paras wey is menge kayu he ulibu.

11 Sikiyu is menge perevasuk, keseeng kew! Sikiyu is ed-atur te pemuleey te paras, habet kew sineǥew! Su wazè en menge abut diyà te menge vevesukà; wazè en menge trigu wey menge barli. 12 Egkeǥangu is menge pinemula he paras wey is langun he kayu ragkes en is menge higus, pumigranata, palma, wey mensanas. Benar iyan he egkaawà is kelipey te menge etew.

13 Sikiyu is menge memumuhat he ebpenilbi ziyà te pemuhatà he para te Megbevayè ku, bivisti kew te saku ne hendiyè kew te valey te Nengazen ne sineǥew kew seled te tivuuk he kezukileman. Su wazè en menge trigu wey menge vinu he igkepemuhat diyà te valey te Megbevayè niw. 14 Keǥiyi niw is menge edumala te Juda wey is langun he meǥinged kayi, he medtiǥum dan is langun diyà te valey te Nengazen he Megbevayè niw ne mebpuasa zan. Mebuyù dan te tavang diyà te Nengazen.

15 Egkeuvayan en is andew te kebpendezaat te Nengazen he Mekeǥeǥehem. 16 Neehè tew iyan ke nemenumenu is kegkeewai kenitew te keenen wey ke nemenumenu is kegkaawà te kedlipey ziyà te valey te Megbevayà. 17 Nemematey is menge venì diyà te tanà. Ne tenged te kegkezeeti te menge trigu, wazè en taǥù te menge budiga, umbe egkengerundus en heini. 18 Egurub is menge uyaǥen tenged te kegkevitil zan. Ed-engà is menge vaka su wazè dan en egketabtab, wey elin daan edlised is menge kerehidu.

19 Mid-ampù si Joel. Ke sikandin te, “Ed-umawen ku sikew, Nengazen, su nengeǥangu is menge penebtavà wey is langun he menge kayu ziyà te menge vevesukà he henduen be te nevinsulan. 20 Minsan is leew he menge langgam edtaǥad te penavang nu, su nemezahan en is dezekelà wey dezeisey he menge wahig, ne nengeǥangu is menge penebtavà he henduen be te nevinsulan.”