Idi oojai ʌrJudidíu vaavoitudadami vʌʌtarʌ
1
1 Ʌʌquioma Diuusi ñiooquidiña gʌraaduñicaru naana duucai dai muiyoco. Diuusi ootosi ñiooqui gʌraaduñicaru gʌñiñiooquituldiadamigacʌdʌ. 2 Dʌmos diviacai ʌCristo Diuusi maradʌ tʌvaagiaiñdʌrʌ ʌgai gʌraagidi vaamioma istumaasi Diuusi ipʌlidi ismaatʌca aatʌmʌ. Diuusi ʌʌmadu ʌCristo idui oidigi, dai Diuusi maa Cristo vʌʌsi istumaasi oidaga. 3 Diuusi maradʌ sʌʌlicʌdʌ cʌʌ tuiga. Ʌgai tomali ʌmo imidagai maisoimaasi ivueeyi daidʌ ʌgai ʌpan ducami gʌooga. Aatʌmʌ cʌʌga istutuidi ismaatʌcagi istuiga Diuusi maatʌcatai isducatai oidacatadai dai istumaasi ivuaadana Suusi Cristo. Ʌgai nuucada vʌʌsi istumaasi oidaga. Ʌgai vaamioma viaa guvucadagai istomasioorʌ dai vaamioma tʌaanʌi. Aidʌsi muu Suusi Cristo curusiaba oigʌli ʌgai gʌrsoimaascamiga sai poduucai camaigʌpiʌr vʌʌtʌcana aatʌmʌ dai gotorʌ ii ʌgai tʌvaagiamu dai daja Diuusi sʌʌlisia padʌrʌ.
―――
4 Dai Diuusi maa ʌgai ʌmo sʌʌlicami vaamioma namʌacami isDiuusi tʌtʌaañicarudʌ sʌʌlicamigadʌ. 5 Diuusi tomali ʌmo imidagai maipotʌtʌdai tomali ʌmoco gʌtʌaañicaru:
Aapi apʌrgiñmara. Sivi gʌmaa aanʌ ʌmo sʌʌlicami.
Dʌmos Diuusi gia potʌtʌdai gʌmara.
Tomali ʌmo imidagai maiaagidi Diuusi tomali ʌmoco gʌtʌaañicaru saidʌ ʌroogadʌ.
6 Dai siʌʌscadʌ Diuusi ʌpamu ootosagi gʌmara tami oidigi daama saidʌ ʌrtʌaanʌdamigadʌcana oodami dai potʌʌdamu ʌgai vʌʌsi gʌtʌtʌaañicaru:
Sai siaa duutudaiña maradʌ.
7 Dai Diuusi aagai gʌtʌtʌaañicaru dai pocaiti:
Aanʌ idui giñtʌtʌaaʌñicaru dai ʌgai ʌvʌli gʌnducami dai otoma ivueeyi ʌgai istumaasi tʌaanʌi aanʌ.
Ascaiti Diuusi. 8 Dai Diuusi potʌtʌdai gʌmara:
Aapi ʌrDiuusi dai tomastuigaco viaacamu aapi gʌsʌʌlicamiga.
Dai vʌʌscʌrʌ ivueeyi aapi istumaasi ʌrsʌʌlicami.
9 Aapi oojoidi istumaasi ʌrsʌʌlicami dai sʌʌlicʌdʌ maioojoidi istumaasi maitʌrsʌʌlicami.
Cascʌdʌ vaamioma baigʌʌliatu aanʌ aapi siaa.
Astʌtʌdai Diuusi. 10 Dai potʌtʌdai ʌʌpʌ gʌmara:
Aapi apʌrgʌʌ tʌaanʌdami dai aapi idui oidigi dai tʌvaagi.
11 Oidigi dai tʌvaagi ugitimu dʌmos aapi tomastuigaco oidacamu.
Oidigi dai tʌvaagi cʌcʌʌliocoimu ʌpan duucai yuucusi.
12 Dai aapi gajiaadʌrʌ viaamu ʌcʌcʌʌliocoidadʌ dai aa uutudui iduuñimu.
Dʌmos aapi tomastuigaco momaascamu dai tomastuigaco oidacamu.
Astʌtʌdai Diuusi. 13 Diuusi potʌtʌdai gʌmara:
Daacañi giñsʌʌlisia padʌrʌ, asta siʌʌscadʌ aanʌ voopoidagi sʌʌlicamigadʌ vʌʌsi gʌntʌtʌaanʌdamiga ʌgai ismaacʌdʌ gʌvuidʌrʌ vʌʌtʌca.
Dai ʌʌgi aapi gatʌaanʌda agai.
Astʌtʌdai Diuusi. Dai Diuusi tomali ʌmo imidagai maipodu aagidi tomali ʌmoco gʌtʌtʌaañicaru. 14 Vʌʌsi Diuusi tʌtʌaañicarudʌ iibʌdaga ʌgai daidʌ ivueeyi vʌʌsi istumaasi Diuusi tʌaanʌi. Diuusi ootosai gʌtʌtʌaañicaru sai soicʌiña ismaacʌdʌ Diuusi cʌʌgacʌrʌ vuvaida agai.