52
Noravano nai vaiinti nahenti qaiqaa ntita kaainarara tura
1 Ieruharemivauvo, himpuane. Are himpira kempukaiqama kera variane.
Ne Kotiva nai kaama tai vatukaraqi variaka, ne koqe utavaaqa nonkute variate. Ho iriate.
Kia Kotira uva iria vatanaakave, kia kotataiqamake variakave, vika kia qaiqaa Ieruharemiqi oriqetevarave.
2 Ieruharemivauvo, himpira konkomavano ariqaa vainara rintatima kera nena avuhainaara taintaqaa oquvuane.
Ai rumpataa senira, nena auntaqihaira ekaa qaqini varakera himpira variane.
3 Noravano Kotiva nai vaiinti nahentiara mintima tiro: Te haaru navutaakara kia koqaa naariraiti, ni qaqi vika kauquqi kauramanta rumpataarave. Vira voqaantemake te kia vika koqaa nimiraiti, vika kauquqihai ni qaqi kuvantu nimitarerave, tura.
4 Noravano Kotiva ekaa haikaqaa raqiki vaiva tiharo, Haaru ti vaiinti nahenti katu vare Isipini vahuqa vaireka vuara. Vira naantiara Asiria vika ti vaiinti nahenti rumpa vare vikaqaa nora maara vataarave.
5 Mintiamanta qaiqaa Babironivata vohaa qaramake kia ti koqaa timiraiti, ti vaiinti nahenti rumpa vare vuru kaarave. Vika ti vaiinti nahenti qaqiqai qoraiqama nimiteha ti hutu qoraiqama timite variarave.
6 Ho vo enta anintairaqe te vi entaraqaa tenta autu qoqaiqama kaari ti vaiinti nahenti ti kempuka autuara kankomake irivarave. Vi entara te ekaa haikara vika tiva nimunarara iriha tiha, Ike, quqaama Noravano Kotiva naima vi uvara tinavu tiva timirave tivarave. Noravano Kotiva minti tura.
7 Aiqina vau koqe vakaaka vare aniaina vaiintira vaiinti nahenti vira voqamake quahama amitevara.
Vi vaiintiva maateraiqamake vai uvara Ieruharemiqi variaka tiva nimireva mintima tiro:
Ne kuvantuvi vai entavama anintaivo. Ni Variqavano ni ruaruama nimiteharo, niqaa koqema kero raqikiqiro vi vaivo, tianarove.
8 Ho iriate. ˻Vo enta˼ vatukaqaa maimaraara raqiki varia vaiintika voqamake quaheha naverai tivarave.
Vi entara vika nái avuqohai Noravano Kotiva Saionini orurantero tuvuainara tavevarave.
9 Ieruharemio, arevata ai avutaqi naavumaaqa rukavu raakavuma kaakavata, ne quaheha aakara nteha ihi tiate. Noravano Kotiva Ieruharemi kuvantu kero, nai vaiinti nahenti maara taiqa nimitero, vika muntuka kukuqama nimitaanarove.
10 Vi entara ekaa vata maata vaika nivuqaa Noravano Kotiva nai mpeqa okara vira qoqaiqama kairamanta vika tinavu Variqavano nai vaiinti nahenti ruaruama nimiteharo navutaaka kauquqihairo ntita vuru kaainara tavevarave.
11 Ne ekaa Babironi mini ke aniate. Ne ani vaiha rauriha variate. Hauri ne kia kotataiqamake vaina haikara utu varevorave.
Haaru Kotira Naavuqiraa haika Babironini vare vuru kaara, kaapuve tanuve vo haikave, ne kotataiqamake vaika vi haikara vi haikara Babironiqihai qaiqaa vare vuru Ieruharemini kaate.
12 Ne Babironihai kia paparuqamake aniate. Vaiintivano ruqemakero kante anintemake, ne anivora.
Noravano Kotiva naima ni ntita varero avuni vuanaro. Ni Isareri Variqavano ni naantiaraini anikavata antua nimitaanaro.
Kotira Kaiqa Vaiintivano maara varaainarara tura
13 Noravano Kotiva tiharo, Ti Kaiqa Vaiinti viva koqema kero ti kaiqa varaqiro viviro, vuru taiqama kaanarove.
Vaiinti nahenti vira autu tuaheraivaro vira autuvano uritara keroma varianarove.
14 Vokika vira anomake qoraiqama amitaivaro vira viri vaatavano kia vaiinti viri vaata voqaara vairamanta vaiinti nahenti vira tave, vira aatu qeteha mpo ike tivarave.
15 Vika minti tihavata, vo enta vika vira taveha ravukuvi kauqu runkinkiri i vaimanta, avuhainaa vaiintinavuvata vira avuqaa vaiha, uva tirare ti, kia ho uva tivarave.
Vi entara vovano kia vika tiva nimiaina haikara vika tavevarave. Vika tota kia iru uvara kankomake irivarave, tiro. Noravano Kotiva minti tura.