Nitam ka ojibiama8agani8i8adj ka teb8etamo8adj
Tesalonika odenakag
Enadjimomagag oo mazinaigan
Mi oo8e nitam ojibiigani Pon, Silas acitc Timote (Timothée) kagi ojibiama8a8agobanen 8eckadj ka teb8etamindjin Tesalonika (Thessalonique) odenag ka tajikenigobanen. Mi ii8e odenag Tesalonika ma8adji ketci apitendag8anogobanen 8edi Masedonia (Macédoine) akig, Kanes (Grèce) kitci akikag ka iji tag8anogobanen.
Pon ki ijagoban iima odenag meg8adj ka pabamadizigobanen kidji paba tibadjimodj min8adjimo8ini, acitc ki kagik8egoban iima. Ogi 8idjian dac mane a8iagon kidji ani teb8eta8andjin Jesosan. Ka8in dac kin8ej odji tajikesigoban. Tebanin mega iima Coda8innin ega odji pejig e nda8enimigopanin, acitc panima ki ojimogoban kitci kaiezigotc. Midac Pon okitci animendamiigobanin ini ka ani teb8etamindjin kidji odji ani ana8endjigendjin kiabadj kidji teb8etamindjin.
Nanage dac, apitc Pon Konit (Corinthe) odenag ka tegobanen, ogi pi nda 8abamigon o8idji8aganan Timoten, acitc ogi pi 8idamagon e kitci sogi teb8etamindjin a8iagon 8edi Tesalonika odenag. Egi nodage8adj dac Pon acitc o8idji8aganan ega e nigodinig Tesalonika odenani, mi 8edji ki onendamo8adj kidji ojito8adj oo8eni ojibiigani. Inendjigade 8aiej 50 kitci agidason kagi ojibiige8agobanen. Mi oo8eni nitam Pon odojibiigan ka kana8endjigadenig.
Pon kitci min8endamoban e minosendjin ka teb8etamindjin 8edi Tesalonika odenag. Ii dac ojibiiganikag, mig8etc odinan Kije Manidon 8ina8a odji. O8abadaa8an mega kodagian ka teb8etamindjin pakan 8edi odenag adi enendagozindjin kidji iji teb8etamindjin acitc adi enendagozindjin kidji inadizindjin.
Pon ogi mika8asoman adi 8in tibina8e ka ijitadj 8ina8akag, acitc ogi 8idama8an adi epitci kitci 8i 8abamadjin. Odinan kidji ega ana8endjigendjin, ka8in dac eta ii, okadjinija8an acitc kiabadj eckam kidji ani teb8etamindjin.
Mina8adj dac, nak8e8ajit8a adi eji k8ag8edjimagani8idj adi ke iji8ebanig apitc abidjibandjin ka nibondjin acitc ke iji8ebanig apitc koki tag8icinindjin Jesosan. Kakina dac igi8e ka animendamiigo8adj adi ke ijisenig apitc ponaki8anig, o8idjiigona8a oo8eni ojibiigani.
Mi iidi enendagozi8adj kidji inadizi8adj ka teb8etamo8adj, e 8abadai8e8adj ka iji 8aseanig e iji tibendagozi8adj, acitc enendagozi8adj kidji cacibendamo8adj meg8adj e pito8adj, e ketcinamendamo8adj kidji odjitcisenig kidji apanigotc mojag 8idji tajikema8adjin ka Tibendjigendjin.
1
1 Nina8it Pon, Silas acitc Timote (Timothée) ka ojibiamago8eg. Kidanamikagom, kina8a ka teb8etameg, ka ma8adjiidieg kidji aiamieieg 8edi Tesalonika (Thessalonique) odenag, ka tibenimigo8eg Kije Manido Kidadaminan acitc ka Tibeniminak Jesos Christ.
Nipagosenimanan Kije Manido kidji ca8enimigo8eg acitc kidji minigo8eg pekadendamo8ini!
Mig8etc inagani8i Kije Manido ka teb8etamindjin odji
2 Apanigotc mig8etc nidinanan Kije Manido kakina kina8a odji, acitc kabena kidaiamietamagom. 3 Apitc ako aiamita8agidj Kije Manido Kidadaminan, kimik8enimigom, adi epitci mino ijitcigeieg osa e teb8etameg, acitc adi epitci kitci macka8i mikimo8eg osa e sagii8eieg, acitc adi epitci sogigaba8ieg kiteb8etamo8ini8akag e apacenimo8ageieg Jesos Christ ka Tibeniminak.
4 Nidjiki8enanag! Nikikendananan Kije Manido e sagiigo8eg, acitc egi onabamigo8eg 8inikag kidji iji tibendagozieg. 5 Apitc mega ka pi tibadjimo8ag min8adjimo8in kina8akag, ka8in eta nigi motci aianim8esimin. Ke8in Mino Manido ki 8abadai8e omacka8izi8in, acitc nigi 8abadai8emin adi epitci ketcinamendamag e teb8emagag ii min8adjimo8in. Kikikendana8a dac adi ka inadiziag kina8akag kidji gi 8idokago8eg. 6 Kina8a dac, kigi kagikina8abamijinam, acitc ka Tibeniminak ke8in kigi kagikina8abama8a. Kigi kitci kodagitom, pekic dac Mino Manido kigi minigo8a kidji kitci modjigendameg e odisigo8eg Kije Manido odikido8in. 7 Iidi dac, kigi 8abadaa8ag kakina ka teb8etamo8adj 8edi Masedonia (Macédoine) acitc Akaia (Achaïe) akin adi enendagozi8adj kidji inadizi8adj. 8 Ii dac egi inadizieg, ki odji nodagani8an 8edi Masedonia acitc Akaia akin ii min8adjimo8in ka odji kikenimagani8idj ka Tibeniminak. Ka8in dac eta iima ki odji nodjigadesinon, mizi8ekamig aja kikikenimigo8a adi eji teb8eta8eg Kije Manido. Ka8in dac mamakadj niga paba mikodasinanan kiteb8etamo8ini8a. 9 Kakina mega a8iagog tatibadjimo8ag adi ka iji mino todaojiag apitc kina8akag ka teiagiban. Tatibadjimo8ag adi kagi iji pakanadizieg kidji gi nosone8eg Kije Manido, ega kiabadj e icpenimeg8a manidokanag. Nogom dac kidanokita8a8a Kije Manido, 8in teb8e ka Kije Manido8idj ka pimadizidj, 10 acitc kipia8a Og8izisan 8ak8ig kidji pi koki odosendjin. Mi ini Og8izisan Jesosan, kagi abidjibaadjin nibo8inikag. Jesos dac kidag8acimigonan, ega kidji pajacteonak Kije Manido apitc odjitcisenig kidji tibakonigedj.