ZAAN 'LƐTRƐ YAGA MI 'LA YƆƆNDIA‑
Zaan a 'lɛtrɛ yaga mi 'ɛ ŋgblo
Zesu a winbɔwo mi Zaan ‑le 'lɛtrɛ 'lɛɛ‑ ꞊dia, 'bhɛɛ‑ ‑ya ꞊kpaa Gayusi ni. Gayusi ‑o Zesu 'yi mi do ‑la ‑le. 'Waa ‑za 'bhɛɛke do 'kpɔ dɔ ‑a ba za 'yi, 'ke yaa 'e go ‑e ge Zesu 'yi mu ‑lɛdo' 'la ba 'mu ba.
'Duŋ‑ 'lɛtrɛ 'lɛɛ‑ 'yi, 'wa ꞊ya 'bhii‑ Zaan mɛɛ 'la zan mu winbwa‑ ‑a ba, ‑e 'mu ꞊kwan 'elrele. Wlan 'ɛ ni, Zaan 'yaa‑ mɛɛ mu winbɔ 'yee‑ Gayusi 'pegee yaa Zesu 'yi mu ‑lɛdo' 'ɛ ba ‑Waanbhaa' a ‑Jan 'Nrale‑ 'ɛ 'wo zayi'. 'Duŋ‑ ‑o ‑yaa mɛɛ do sii Diotrɛfi. ‑E ‑yaa 'bhɛ ‑wa 'ɛ ta Zesu 'yi mu ‑lɛdo' 'ɛ 'lɛɛ mu 'ɛ do 'le. Zaan mɛɛ 'la zan mu winbwa‑ a nɔɔ‑, 'yee‑ Diotrɛfi 'laa 'mu 'cieya‑ 'silɛ‑, 'bhɛɛ‑ 'yee‑ Zaan 'la 'yaa‑ ‑o ‑lɛɛ 'mi 'le, ‑e 'bhɛ 'tɔ 'yɔɔ‑ ꞊pia. Zaan 'lɛtrɛ 'lɛɛ‑ ꞊kpaa Gayusi ni 'bhɛ 'pubɔ‑ zayi' 'bhɛ klɛza ‑lrele' mu 'ɛ ma, 'bhɛɛ‑ ‑ya ꞊pia 'bhɛ ni dɔɔ 'bhɛ 'laa Diotrɛfi klɛza yɛkɛ‑ mu 'ɛ klɛlɛ.
'Ezin‑, ‑ya ꞊pia Gayusi ni dɔɔ mɛɛ 'la zan ‑yaa ge 'zi 'yee‑ 'lɛtrɛ 'lɛɛ‑ 'le ‑a ta ye, ‑e 'bhɛ zan 'ɛ 'cieya‑ 'si 'elrele. ‑O ‑yaa 'bhɛ mɛɛ 'ɛ sii Demetriusi. 'Bhɛ 'yaa‑ yewo 'zi 'ezin‑ Mɛɛzan ni.
'Lɛtrɛ 'lɛɛ‑ ‑yoo' daan ‑za 'la 'le, 'bhɛ ‑le dɔɔ mɛɛ 'la zan mu 'kpɛn yewo ‑ Waanbhaa' ni, ‑kɔɔ' 'mu 'kun 'sɔniya 'le.
1
Zaan a 'pubɔwli
1 'Mi ‑o 'ke Zesu 'yi mu ‑lɛdo' 'ɛ ‑o ‑lɛɛ mi ‑la ‑le. 'Mi ‑le 'lɛtrɛ 'lɛɛ‑ 'kpa zii' 'bhi 'ŋ 'yiɛnii Gayusi ni, 'bhi ‑la ‑za sɔ 'ŋ ni 'egbɛnɛle.
2 'Ŋ 'yiɛnii gblaan, 'mi 'ŋ 'seriwo zii' ‑Waanbhaa' ni 'yaa‑ ‑za ma dɔɔ ‑ya klɛ 'bhɛɛ‑ 'yaa‑ ‑za mu 'ɛ 'kpɛn dɔ zima; 'bhɛɛ‑ 'e 'klɛnyawole klɛ 'e 'flɛ 'yi, 'bhii‑ 'e lii 'ɛ 'klɛnyawole ‑o gɔnɛ‑ 'la gbɛɛn‑.
Gayusi blɔɔza ‑Waanbhaa' ma
3 'O nɛɛnɛ‑ mu 'la ‑daa 'e ba ye, 'bhɛɛ‑ 'ke ‑o ‑nwa ‑gɛ, ‑woo 'e ta jan 'la ꞊woa 'ŋ ni, 'bhɛ 'ŋ zrukpalaa 'egbɛnɛle. ‑Wa ‑pia 'ŋ 'ni dɔɔ 'e blɔɔle ‑o wlan 'ɛ ma, 'bhɛɛ‑ 'e 'taawo zii' wlan a pɛ zi 'ɛ ta 'elrele. 4 'Ke 'an ꞊maa dɔɔ 'ŋ 'nɛ mu 'ɛ ‑woo 'taawo zii' wlan a pɛ zi 'ɛ ta, 'ŋ zrukpaaza ‑bhɛɛke' gblaan 'laa ‑o 'bhɛ ‑za 'ɛ blaan.
Nɛɛnɛya Zesu 'yi
5 'Ŋ 'yiɛnii, 'yoo‑ ‑za 'la klɛ 'zi ‑kɔɔ' nɛɛnɛ‑ mu 'ɛ ni, 'ali‑ ‑woo 'ke 'cie mu 'la 'le bhe, 'ke 'yee zru bo do 'bhɛ ‑za 'ɛ klɛle ni, ‑za 'lrele‑ ‑le 'bhɛ 'le. 6 ‑O 'yaa‑ mɛɛ ‑za klɛgbɛya 'ɛ ꞊woa Zesu 'yi mu ‑lɛdo' 'ɛ yrɛ ma. 'E 'zoole‑, ‑o ge 'zi ‑waa' 'taa 'la ta bhe, 'kee gbɛ ‑swa pɛ yɛkɛ‑ 'la ma, bhɔ ‑o ba bhɔgbɛya 'la 'ke 'bhɛ sɔ ‑Waanbhaa' ni 'bhɛɛ‑ 'le. 7 Wlan 'ɛ ni, ‑woo 'taa ta Krisi a ye 'ɛ 'bhɛɛ‑ 'kaama‑, 'bhɛɛ‑ waa dɔlɛ ‑a ‑la 'ke mɛɛ 'la zan mu laa ‑Waanbhaa' dɔ 'mu 'bhɔ ‑o ba. 8 ‑Kɔɔ' mu Zesu 'yi mu 'ɛ, ‑kɔɔ' dɔ ‑a ‑la 'ke ‑kɔɔ' bhɔ 'bhɛ mɛɛ ‑glɔɔn mu 'ɛ ba. 'Ke ‑kɔɔ' 'bhɛ ꞊kla, ‑e klɛ 'bhii‑ ‑kɔɔ' 'pegee 'woo‑ mu ‑o 'e gbɛkla' zii' 'eke‑ ta, 'ke ‑kɔɔ' wlan ma zi 'ɛ zrɔn mɛɛ mu ni.
Diotrɛfi 'pegee Demetriusi mu ma jan
9 'Ŋ 'lɛtrɛ 'fiɛntrɔnnɛ do ꞊kpaa Zesu 'yi mu ‑lɛdo' 'ɛ ni. 'Duŋ‑ ‑e sɔ Diotrɛfi 'la ni 'ke ‑ya 'gbu klɛ ‑o ta ‑kuŋlii 'le, yaa dɔlɛ 'waa‑ pɛ ‑jan 'ɛ ꞊la. 10 'Bhɛla ‑zayile, 'ke 'ŋ ‑ja 'ka ba yi 'la 'le, ‑e ‑za 'yɔɔ‑ mu 'la 'kpɛn klɛ, 'ŋ nu 'bhɛ 'kpɛn 'pelɛ‑ 'ka 'yrɛ ma: ‑e bhla mu 'la 'kpa 'o ma; 'bhɛɛ‑ yaa dɔ ‑a ‑la 'ke ‑kɔɔ' nɛɛnɛ‑ mu 'ɛ ‑woo zɛn ‑a ba. 'Bhɛɛ‑ 'ke ‑kɔɔ' nɛɛnɛ‑ mu 'la 'mu ‑a zi 'bhii‑ 'mu ‑kɔɔ' nɛɛnɛ‑ mu 'ɛ 'cieya‑ klɛ 'mu ba, yaa dɔ 'bhɛ ꞊la 'ezin‑; 'bhɛɛ‑ drɔɔn' ‑e 'mu gbin ‑waa' 'klaŋkeba yrɛ 'ɛ ꞊nɔɔ.
11 'Bhi 'ŋ 'yiɛnii Gayusi, 'yaa ‑za 'yɔɔ‑ klɛ mi 'ɛ blaan gɔɔnlɛ ‑za 'yɔɔ‑ klɛlele, 'duŋ‑ ‑za 'lrele‑ klɛ mi ‑la blaan ‑gɔɔn. 'Ke mɛɛ 'la zan ‑za 'lrele‑ klɛ, 'bhɛ zan ‑o 'ke ‑Waanbhaa' a pɛ 'le. 'Duŋ‑ 'ke mɛɛ 'la zan ‑za 'yɔɔ‑ klɛ, 'bhɛ zan 'a zrɔn 'a klɛza mu 'ɛ ma 'bhii‑ yaa ‑Waanbhaa' dɔ. 12 Mɔkpɛn' ‑o Demetriusi 'tɔ wlan 'pe 'zi. ‑Yoo 'taawo zii' wlan ma zi 'la ta, 'bhɛ 'gbu ‑le klɛ 'zi ‑a 'tɔ wlan pe pɛ 'ɛ 'le. 'O mɔɔ 'gbu 'ezin‑, 'woo‑ ‑a 'srɛya‑ klɛ 'zi; 'bhɛɛ‑ 'e 'gbu 'a 'yaango‑ 'bhii‑ 'woo‑ 'kɛla 'wo zii' wlan ‑le 'bhɛ 'le.
‑Daŋma' 'pubɔ‑
13 ‑Jan ‑bebe ‑o 'ŋ 'zi ‑li 'ke 'ŋ 'bhɛ wo 'e ni, 'duŋ‑ 'naa 'bhɛ 'kpɛn klɛle‑ 'ke 'lɛtrɛ dɛle 'le. 14 'Ŋ 'yri ‑o ‑a ta 'bhii‑ ‑a ‑vinbwa sa, 'bhɛɛ‑ 'mi 'pegee 'bhi nu 'eke‑ yelɛ, 'bhɛɛ‑ 'woo 'eke‑ zi janwo 'eke‑ ni kpataakpa.
15 Bhaa 'e bo 'edɔɔle! 'E 'bhɛgwlɛn‑ mu 'la ‑woo ‑gɛ, 'mu 'e 'pubwa‑.
'Bhi 'duŋ‑, 'o 'bhɛgwlɛn‑ mu 'ɛ 'kpɛn 'pubɔ‑ 'o ni do do.