16
Paul loh Phoebe a Oep
1 Te phoeiah mamih kah ngannu Phoebe, Kenkhrea kah hlangboel tueihyoeih a la aka om te khaw ka oep. 2 Te dongah anih te hlangcim rhoek neh a tingtawk la Boeipa dongah lamtawn uh. Te vaengah amah loh bitat dongah nangmih ng'kuek te khaw pai puei uh. Anih ngawn tah kai kamah ham khaw aka bomkung la muep om coeng.
3 Clt 18.2Jesuh Khrih ah ka bibipuei Priska neh Aquila te toidal uh. 4 Te rhoi tah kai kah hinglu ham amah rhoi kah rhawn a tloeng rhoi. Amih rhoi te kai bueng long pawt tih namtom kah hlangboel rhoek boeih long khaw a uem. 5 Amih imkhui kah hlangboel te khaw toidal uh. Kai kah thintlo Epaenetu te toidal uh. Anih te Khrih ham tah Asia lamkah thaihcuek ni. 6 Mary te toidal uh, anih tah nangmih ham muep thakthae coeng. 7 Kai kah huiko neh ka thongtla puei Androniku neh Junia te toidal uh. Amih rhoi tah caeltueih rhoek khuiah mingthang la om rhoi. Amih rhoi tah kai hmaiah Khrih dongla ana om rhoi bal coeng. 8 Boeipa ah ka thintlo Ampliatu te toidal uh. 9 Khrih ah kaimih bibipuei Urban neh kai kah thintlo Satakhi te toidal uh. 10 Khrih ah ka uep ka pang Apelle te toidal uh. Aristobulus imkhui kah rhoek te toidal uh. 11 Ka hui Herodion te toidal uh. Narkittu imkhui kah Boeipa neh aka om rhoek te toidal uh. 12 Boeipa ah aka thakthae Thruphaena neh Truphosa te toidal uh. Thintlo Perti te toidal uh. Anih tah Boeipa dongah muep thakthae. 13 Mrk 15.21Boeipa ah a coelh Rhopho neh, anih neh kai manu te toidal uh. 14 Ashonkrit, Phlekon, Hermes, Patrobas, Hermas neh amih taengkah manuca rhoek te toidal uh. 15 Philolokas neh Julia, Nereus neh a ngannu, Olampas neh amih taengkah hlangcim boeih te toidal uh. 16 Khat neh khat a cim moknah neh toidal uh thae. Khrih kah hlangboel boeih loh nangmih n'toidal.
Boekoek rhoek Ngaithuen
17 Te dongah manuca rhoek nangmih te kan hloep, thangkui neh paekboenah aka saii rhoek te paelki uh. Te thuituennah na cang uh tangtae aka saii thil te a taeng lamloh rhael uh. 18 Te bang long te mamih Boeipa Khrih ham pawt tih a bungpuei kah sal ni a bi uh. Te dongah olding, yoethennah neh ommongsitoe kah thinko te a hoilae uh.
Paul Kah Lungvat Olnoi
19 Nangmih kah olngainah tah hlang boeih taengah thang tih nangmih soah ka omngaih. Tedae nangmih then sak ham aka cueih la, a thae ham nen tah caepakyik la om sak ka ngaih. 20 Ngaimongnah Pathen loh Satan te nangmih kah kho hmuiah thamaa la a neet ni. Mamih Boeipa Jesuh kah lungvatnah tah nangmih taengah om saeh.
21 Clt 16.1Kai kah bibipuei Timothy neh ka hui Lukia, Jason, Sosipater loh nangmih te n'toidal ne.
22 He capat aka daek kai neh Teratias loh Boeipa ah nangmih te kan toidal.
23 Clt 19.29; 1Ko 1.14; 2Ti 4.20Nangmih te ka imluei Gaius neh hlangboel boeih loh n'toidal. Nangmih te Khopuei kah hnokhoem Erastu neh manuca Kuatu loh n'toidal. 24 Kai kah olthangthen neh Khrih Jesuh kah olhoe bangla duel ham na noeng uh coeng.
Pathen Thangpomnah
25 Olhuep kah pumphoenah bangla khosuen tue ah kam ana khuem. 26 Tedae Pathen kah dungyan olpaek bangla tonghma olcim dongah phoe coeng. Te dongah namtom boeih ham tangnah dongkah olngainah te a phoe sak. 27 Pathen bueng he a cueih dongah amah te Jesuh Khrih lamloh kumhal ah thangpomnah om saeh, Amen.