69
Hlawt ham a Bih
[David kah Tuilipai te aka mawt ham]
1 Tui loh ka hinglu te ham pha dongah
Pathen aw kai n'khang lah.
2 Sihnok laedil la ka buek tih tungtainah om kolla
tui dung la ka pha voek dongah tuili loh kai n'yo coeng.
3 Ka pang te khaw ka kohnue coeng.
Ka olrhong khaw koh coeng.
Ka Pathen te ka lamtawn ah ka mik kha coeng.
4 Tgt 35.19; Jhn 15.25Lunglilungla la ka lunguet rhoek tah ka lu dongkah sam lakah yet.
A honghi mai neh kai aka biit ka thunkha rhoek loh yet uh.
Ka huen pawt te ka sah.
5 Ka anglat te Pathen namah loh na ming tih
ka dumlai he nang taeng lamloh a thuh uh moenih.
6 Ka Boeipa caempuei Yahovah,
nang aka lamtawn rhoek te
kai kong ah yahpok uh boel saeh.
Israel Pathen nang aka tlap rhoek te
kai kong ah a hmaithae uh boel saeh.
7 Nang ham te kokhahnah ka phueih tih
ka maelhmai he mingthae loh a dah.
8 Ka pacaboeina rhoek taengah ka hlanglak tih
ka manu ca rhoek taengah ka kholong.
9 Jhn 2.17; Rom 15.3Na im thatlainah dongah kai n'yoop tih
nang aka veet rhoek kah kokhahnah khaw kai soah tla.
10 Te dongah ka hinglu kah yaehnah neh
ka rhap dae kai taengah kokhahnah la pawk.
11 Ka tlamhni pueinak ka bai vaengah
amih ham thuidoeknah la ka om.
12 Vongka kah aka ngol rhoek loh
kai taengah lolmang a taeng uh tih
yu o rhoek kah rhotoeng la ka om khoeng.
13 Tedae Pathen kah kolonah tue vaengah,
kai loh BOEIPA nang taengah ka thangthuinah te,
na sitlohnah cangpai dongah
namah kah khangnah oltak neh kai nan doo.
14 Tangnong khui lamkah kai n'huul lamtah
m'buek sak boeh. Ka lunguet neh tui dung lamkah n'huul lah.
15 Tuili tui loh kai n'yo boel saeh lamtah
a laedil la kai n'yoop boel saeh.
Tangrhom loh kai a ka n'khuep thil boel saeh.
16 Na sitlohnah a then dongah kai n'doo lah BOEIPA.
Na haidamnah cungkuem neh kai taengla ha mael lah.
17 Te dongah na maelhmai te na sal taeng lamkah thuh boel mai.
Ka taengah n'daengdaeh dongah a loe la kai n'doo dae.
18 Ka hinglu taengla ha yoei lamtah n'tlan dae.
Ka thunkha rhoek kongah kai n'lat dae.
19 Namah loh kai kah kokhahnah, yahpohnah,
ka mingthae neh na hmaikah
kai aka daengdaeh boeih khaw na ming.
20 Kokhahnah dongah ka lungbuei rhek
tih ka mangoeng sut.
Te dongah aka suem ham ka lamtawn dae om pawt tih,
aka hloep ham khaw ka hmu pawh.
21 Mat 27.48; Mrk 15.36; Luk 23.26; Jhn 19.28,29Ka buh dongah anrhat han hlum uh tih
ka tuihalh vaengkah ham a thuui n'tul uh.
22 Rom 11.9,10Amih kah caboei te amih mikhmuh ah pael la,
rhoepnah te hlaeh la om pah saeh.
23 Amih kah mik te a tueng khui lamkah hmuep saeh lamtah
a cinghen khaw khun yoeyah saeh.
24 Amih te na kosi lun thil lamtah
na thintoek thinsa loh amih te doom saeh.
25 Clt 1.20Amih kah lumim te kho pong la om saeh lamtah
a dap ah khosa hlang om boel saeh.
26 Na ngawn te a hloem uh tih
na rhok kah nganboh te a tae uh.
27 Thaesainah te amamih kah thaesainah neh
a koei dongah nang kah duengnah te bawn uh boel saeh.
28 Sng 32.32; Olp 3.5; 13.8; 17.8Hingnah cabu khui lamkah phae lamtah
hlang dueng rhoek neh hmaih daek boeh.
29 Tedae kai mangdaeng thakkhoeih he,
Pathen namah kah khangnah neh n'hoeptlang lah.
30 Lumlaa neh Pathen ming te ka thangthen vetih
amah te uemonah neh ka pomsang puei ni.
31 Te daengah ni BOEIPA ham vaito
vaitotal ki cawn neh khomae aka rhak lakah a uemo eh.
32 Kodo rhoek loh a hmuh vetih a kohoe uh ni.
Pathen aka tlap rhoek,
nangmih thinko ah hing van saeh.
33 BOEIPA loh khodaeng rhoek te a yaak tih
a thongtla rhoek khaw a hnoel moenih.
34 Vaan rhoek neh diklai loh,
tuitunli rhoek neh a khuiah aka yuel boeih loh
BOEIPA amah te thangthen uh saeh.
35 Pathen loh Zion a khang ni.
Judah khopuei rhoek te a sak vaengah
kho a sak vetih pahoi a pang uh ni.
36 A sal rhoek kah a tiingan long khaw a pang uh vetih
a ming aka lungnah rhoek loh a khuiah kho a sak uh.