46
Namtom neh EgyptHam Olphong
1 BOEIPA ol he Namtom ham tonghma Jeremiah taengla ha pawk.
2 Isa 19.1-25; Ezk 29.1—32.32Judah manghai Josiah capa Jehoiakim kah a kum li dongah Perath tuiva kaep ah aka om tih, Babylon manghai Nebukhanezar loh a ngawn Karkhemish kah Egypt manghai Pharaoh Neko kah caem sokah Egypt kawng ni.
3 Photlingca neh photlinglen neh
rhongpai uh lamtah caemtloek ham thoeih uh laeh.
4 Marhang te khit uh lamtah
marhang caem khaw cet laeh saeh.
Lumuek neh pai uh lamtah cai te met uh laeh.
Caempho te bai uh laeh.
5 Balae tih a paep neh a hnuk la aka balkhong te ka hmuh.
Amih kah hlangrhalh rhoek khaw dae uh tih
thuhaelhnah khuila rhaelrham uh coeng.
Te dongah kaepvai kah rhihnah te mael uh thil pawh.
He tah BOEIPA kah olphong ni.
6 Kapyang khaw rhaelrham thai pawt tih
hlangrhalh khaw loeih thai pawh.
Tlangpuei kah Perath tuiva hmoi ah
paloe uh tih cungku uh.
7 Sokko bangla aka phul tih
tuiva tui bangla aka tuen he unim?
8 Egypt tah sokko bangla phul tih tuiva tui bangla tuen.
Te dongah, “Ka cet vetih diklai he ka khuk ni.
Khopuei neh a khuikah
khosa rhoek khaw ka milh sak ni,” a ti.
9 Marhang rhoek te cet lamtah leng rhoek te yan uh laeh.
Kusah hlangrhalh rhoek neh
photlingca aka pom Put rhoek khaw,
lii nuen ham aka tu Ludim rhoek khaw cet uh laeh.
10 Tedae te khohnin tah,
ka Boeipa Caempuei Yahovah kah
a rhal rhoek taengah phuloh ham
tawnlohnah khohnin coeng ni.
Te dongah ka Boeipa Caempuei Yahovah taengkah
hmueih la tlangpuei khohmuen
Perath tuiva ah cunghang loh a cawk vetih
amih thii neh a hah la hmilhmal ni.
11 Egypt nu, oila,
Gilead la cet lamtah thingpi te lo laeh.
Si tah a poeyoek la na puh na puh sak tih
na saibawnnah hae moenih.
12 Na yah te namtom loh a yaak vetih
na henah te diklai ah khawk ni.
Hlangrhalh soah hlangrhalh khaw
paloe uh rhoi vetih a rhenten la cungku rhoi ni.
13 Jer 43.10-13Babylon manghai Nebukhanezar loh Egypt khohmuen tloek ham ha pawk vaengah he ol he BOEIPA loh tonghma Jeremiah taengah a thui.
14 Egypt taengah puen lamtah
Migdol ah khaw yaak sak.
Noph neh Tahpanhes ah khaw yaak sak.
“Pai uh lamtah namah ham rhuengphong laeh,
na kaepvai te cunghang loh a cawk coeng,” ti nah.
15 Aka lueng nang te balae tih ng'kawt mai eh?
Anih te BOEIPA loh a thaek vetih pai tloel ni.
16 Hlang loh a hui soah a cungku khaw
paloe neh a khoep hae.
Te dongah, “Thoo lamtah cunghang kah
a vuelvaek hman ah mah pilnam taeng neh
mah pacaboeina kah khohmuen la mael sih,” a ti uh ni.
17 “Tingtunnah aka paan tah
longlonah Egypt manghai Pharaoh,”
tila hnap a hoe uh ni.
18 Kai hingnah manghai olphong tah
a ming khaw caempuei BOEIPA ni.
Te dongah tlang ah Tabor bangla,
tuitunli ah Karmel bangla ha pawk ni.
19 Egypt nu taengkah khosa loh
namah ham vangsawn hnopai te saii laeh.
Noph te imsuep la om vetih
khosa a om pawt hil a hnueih ni.
20 Egypt bawnthen vaito aw
tlangpuei lamkah pilyang
ha pawk rhoe ha pawk coeng.
21 A kutloh rhoek khaw a kotak ah
vaitoca bangla toitup.
Amih te oeih, hoilae uh vetih
rhenten rhaelrham uh ni.
Amih kah rhainah khohnin ah
a cawhnah tue loh amih a thoeng thil
coeng dongah pai uh mahpawh.
22 A ol te rhul a colh vaengkah bangla,
caem rhoek a khong vaengkah bangla,
om tih hai neh thing top bangla
anih taengah thoeih uh ni.
23 He tah BOEIPA kah olphong ni.
A duup te a hum pah ni.
Kaisih lakah khaw a puh dongah
hoem lek pawt tih amih te tae lek pawh.
24 Tlangpuei pilnam kut ah
a paek vaengah Egypt nu te yak bitni.
25 Israel Pathen caempuei BOEIPA loh, “No kah Amon neh Pharaoh, Egypt khaw, a pathen neh a manghai khaw, Pharaoh neh anih soah aka pangtung boeih te ka cawh coeng. 26 Amih te a hinglu aka toem kut ah, Babylon manghai Nebukhanezar kut ah, anih kah sal kut ah ka tloeng ni. Tedae he phoeiah ni hlamat kum kah bangla kho a sak eh. He tah BOEIPA kah olphong ni.
Israel ham Thohkoepnah
27 Jer 30.10,11Ka sal Jakob nang rhih boel lamtah
Israel nang khaw rhihyawp boel saeh.
Nang te khohla lamloh,
na tiingan te a tamna khohmuen lamloh
ka khang coeng ne.
Te dongah Jakob ha mael vetih
mong vetih mong pawn ni.
Te vaengah lakueng voel mahpawh.
28 Ka sal Jakob nang rhih boeh.
He tah BOEIPA kah olphong ni.
Nang taengah ka om tih
namtom boeih kah
a boeihnah te ka khueh coeng.
Te ah te nang kang heh cakhaw
nang kah a bawtnah te ka saii moenih.
Nang te tiktamnah neh kan thuituen vetih
nang te kam hmil rhoe kam hmil mahpawh.