60
Zion kah A Boeimang Tah YAHWEH Ni
1 Thoo laeh, vang laeh.
Nang kah vangnah ha pawk coeng tih
BOEIPA thangpomnah tah nang soah sae coeng.
2 Hmaisuep loh diklai,
yinnah loh namtu a dah coeng ke.
Tedae nang soah BOEIPA ha thoeng coeng tih
a thangpomnah khaw nang soah tueng coeng.
3 Na vangnah dongah namtom rhoek loh,
namah kah pangtong khosae ah
manghai rhoek loh pongpa uh ni.
4 Na mik te huel lamtah
a kaepvai kah amih boeih ke so lah.
Kho hla lamkah na ca rhoek te coi uh thae tih
nang taengla ha pawk uh.
Ha pawk uh vaengah na canu rhoek te
a laengpang ah a poeh uh.
5 Te vaengah na hmuh vetih na hlampan bitni.
Anih te birhih vetih na thinko hang ka sak ni.
Tuitunli kah a hlangping te nang taengla ha buung vetih
namtom kah khuehtawn te nang taengla ha pawk ni.
6 Kalauk cako loh nang ng'et ni.
Midian neh Ephah kalaukca rhoek khaw
a pum la Sheba lamkah sui hang khuen uh vetih
hmueihtui ham phueih uh ni.
Te vaengah BOEIPA koehnah a phong uh ni.
7 Kedar boiva boeih khaw
nang taengla tingtun uh vetih
Nebaioth tutal rhoek loh nang n'khut ni.
Ka hmueihtuk kah kolonah la luei uh vetih
ka boeimang im te ka cam ni.
8 Khomai bangla ding uh tih
vahui bangla amamih kah bangbuet la
aka cet te u rhoek nim?
9 Sanglak rhoek loh kai he ni n'lamtawn uh ngawn.
Tarshish sangpho loh khohla lamkah na ca rhoek te
amamih kah ngun neh sui neh
lamhma la ham pawk puei ni.
BOEIPA na Pathen ming ham neh
Israel kah a cim ham te nang n'cam coeng.
10 Na vongtung tah
kholong ca rhoek loh hang khoeng uh vetih
a manghai rhoek loh nang n'khut ni.
Ka thinhul ah nang kan taam cakhaw
ka kolonah dongah nang kan haidam ni.
11 Olp 21.25,26Namtom kah khuehtawn te
nang taengla aka pawk puei ham
na vongka loh ong uh taitu vetih
khoyin khothaih khai uh mahpawh.
Te vaengah a manghai rhoek te hmaithawn uh ni.
12 Nang taengah tho aka thueng pawh
namtom neh ram tah milh uh vetih
namtom rhoek khaw rhae la rhae uh ni.
13 Ka rhokso hmuen cam hamla
Lebanon kah thangpomnah hmaical,
kungkang neh ta-aw thing khaw
nang taengla tun ha pawk vetih
ka kho kung kah a hmuen ah ka thangpom ni.
14 Olp 3.9Nang aka phaep rhoek kah a ca rhoek te
nang taengah aka ngawm sut la ha pawk uh ni.
Nang yah aka bai rhoek boeih
na kho kah khopha taengah bakop uh ni.
BOEIPA kah khopuei Zion nang te
Israel kah a cim la a khue uh ni.
15 A hnoo sut neh a hmuhuet la na om tih
aka pongpa om pawh.
Tedae nang te kumhal kah hoemdamnah neh
cadilcahma phoeikah cadilcahma ham
omthennah la kang khueh ni.
16 Namtom kah suktui te na yawn vetih
manghai rhoek kah rhangsuk te khaw na yawn ni.
Te vaengah kai BOEIPA tah
nang aka khang neh nang aka tlan
Jakob kah samrhang la na ming ni.
17 Rhohum yueng la
sui kang khuen vetih thi yueng la ngun,
thing yueng la rhohum,
lungto yueng la thi kang khuen ni.
Nang aka cawhkung te rhoepnah neh,
nang aka tueihno te duengnah neh ka khueh ni.
18 Na khohmuen ah kuthlahnah,
na khorhi khuiah rhoelrhanah neh
pocinah te ya voel mahpawh.
Tedae na vongtung te khangnah la,
na vongka te koehnah la na khue ni.
19 Olp 21.23; 22.5Nang ham tah khothaih khosae la
khomik khaw kuek voel pawt vetih
hla kah a aa loh nang soah ha sae mahpawh.
Tedae BOEIPA tah nang ham
kumhal khosae neh na Pathen te na boeimang la om ni.
20 Na khomik te khum voel pawt vetih
na hla khaw yaem voel mahpawh.
BOEIPA tah nang ham
kumhal khosae la om vetih
na nguekcoinah khohnin khaw khum ni.
21 Amih na pilnam aka dueng boeih loh
khohmuen kumhal duela a pang uh ni.
A thingling pae he ka thingling neh
ka kut kah bibi neh a cam ham om.
22 A dikhnawn te thawngkhat la,
canoi khaw namtu pilnu la om ni.
Kai BOEIPA tah
amah tue vaengah amah la ka tawn uh ni.