32
Duengnah Ram A Thui
1 Manghai tah duengnah neh manghai vetih
mangpa rhoek loh a tiktam la boei uh ni.
2 Te vaengah tah khohli vaengkah
congket conglong neh hlipuei vaengkah
a huephael bangla,
rhamrhae kah sokca tui bangla,
buhmueh rhathih khohmuen kah
thaelpang puei kah hlipkhup bangla boeih om ni.
3 Aka hmu rhoek loh a mik buem uh voel pawt vetih
aka ya kah a hna long khaw hnatung uh pawn ni.
4 Thinko aka loe long khaw ming hamla a yakming ni.
Ol khol khaw a loe la puk cal ni.
5 Hlang ang te hlangcong la khue voel pawt vetih
ngukngak te hlang rhoeikhang ti nah mahpawh.
6 Lailak la saii ham neh
BOEIPA te rholrhaknah thui ham,
aka ang loh boethaehalang a thui tih
a lungbuei kah boethae a saii.
Hlang kah hinglu te bungpong la a kaeng tih
tuihalh khaw tui-ok loh a vaitah sak.
7 Ngukngak loh a boethae hnopai te
khonuen rhamtat la a khueh tih,
khodaeng loh tiktam a thui vaengah
pataeng kodo mangdaeng te
a honghi ol neh vueinan hamla caai.
8 Tedae hlangcong long tah
moeihoeihnah neh a uen tih
moeihoeihnah neh pai van.
Caemtloek Nu kah Kohuetnah
9 Mongkawt nu rhoek thoo uh lamtah ka ol hnatun uh.
Palyal tanu rhoek ka olthui he hnakaeng uh lah.
10 Palyal rhoek te kum at hnin at ah na tlai uh bitni.
Misurbit loh n'khah vetih cangah khaw pha mahpawh.
11 Mongkawt nu te lakueng saeh,
palyal nu rhoek khaw tlai uh saeh.
Hni te pit saeh lamtah
a yal la a pumpu te vah saeh.
12 Naidoeh lohma ham neh misur thaihsu ham te
rhangsuk mah rhaengsae laeh.
13 Hling neh lota he
ka pilnam kah hmuenlung ham a yam pah coeng tih,
khorha kah omthennah dongah aka yalpo
imkhui boeih ham pai ni.
14 Impuei te a phap vetih
khopuei a lilup khaw a hnoo ni.
Molpuei neh rhaltawt imsang te
kohong marhang kah a omthennah neh
tuping luemnah la poeh vetih
kumhal due lungtokhui la om ni.
15 Hmuensang lamkah
Mueihla te mamih soah han kingling vaengah tah
khosoek khaw cangphil cangngol la poeh tih
khoham cangphil cangngol bangla a poek.
16 Te vaengah tah khosoek ah tiktamnah loh kho a sak vetih,
duengnah loh cangphil cangngol te a om thil ni.
17 Duengnah kah a khoboe tah rhoepnah la,
duengnah kah thohtatnah tah
kumhal due mong vetih ngaikhuek la om ni.
18 Ka pilnam long tah rhoepnah tolkhoeng neh
pangtungnah tolhmuen ah duemnah neh
a mongkawt la kho a sak ni.
19 Te dongah duup khaw rhael aka bo loh a hnaa vetih
khopuei khaw tlarhoelnah la kunyun ni.
20 Te dae tui kaeng te boeih aka tawn tih
vaito neh laak kho neh aka tluek rhoek tah na yoethen uh.