1 Leeme Silok, neni Loorong Silok. Larabung mixin dina dede mi lanmarat. Neni it kis at loxonin orong teren mavana at lempanga raptava (cherubim) la lavatbung menemen ing nengne. 2 Leeme Silok neni Lanaraavuk to xeneng Saion, neni ik lok mavana xasep tinotno ri larabung mixin axap. 3 Limixin axap dinaba emi asu mi mo laasen silok doxodok teren la dinaba tong i do, neni i melemelengan!

4 Loorong Silok nenu Lanaraavuk, u vavara aleng leveloklok in manton. Ugara vaxaru vam leventaangas manmanton kusu limixin diba mumu asu i ro xeneng Israel. Ugara xip pot pam mi loklok manmanton la levelinga ruturun. 5 Leemi asu ri Leeme Silok ne Moroa atnedik. Mina lotu saparav i ro melamgo at loxonin orong teren! Neni i melemelengan!

6 Moses mi ne Aron duga gugu ngan lumaasa ren, la ne Samuel neni ga ngising tin. Diga ngising ti Leeme Silok la neni ga lox epovo levesingising atnedi. 7 Neni ga paase ridi boro xeneng at lovotakabu ga baalom upana. Digang tonga res at leventaangas la levelinga neni gam taba nedi min. 8 O Leeme Silok, nenu ne Moroa atnema, uga lox epovo lodoxoma at limixin taram. Uga lox asuusu i ridi do nenu ne Moroa umdoma xepe lengkakapmek, la uga lox asongot nedi mumu levengkakapmek atdi. Ketla melemu uga doxoma xepe laxakapmek atnedi. 9 Leemi asu ri Leeme Silok ne Moroa atnedik, la ata ngising tin to at loxongkaana xaala Saion! Leeme Silok ne Moroa atnedik i melemelengan.