1  * 1:1 Timodhy: 1Kor 4:17 Yihri yih Pihlmon.

Warga gihn ni aay ke banga a Poal. Awaahn ni a nii thijin ke nying gihn nahga ngad batien Jeacuu Kriihjto. An kedea Timodhy ge beehda umiiho ke nying Jeacuu kedea ge beehda ngad akuud yaa yiiho yih amaahdh wane. Yih beehda gom wan me ne cohg yi tiihj ke nying Jeacuu wa kwaad gihn tiihy wane. 2  † 1:2 Rom 16:5Arkiihpo: Klo 4:17 Apya ge beehda nyemiiho ke nying Jeacuu maa ayiiho, ngo amaahdh wane, kedea Arkiihpo ge cuung tiehd ke won yi puohny Ciig Beer maa akuud yaa yiiho ge kway Juog paari ge amaahdh wane thiow.

3 Beehn Juog Wuur kedea Jeacuu Kriihjto Ruohdh cub gene muuny kedea doohr yihri.

4  1:4 Rom 1:8 A beehd kaa muohj koohr Juog e wuora nea a ukwahyo ke nyingi. 5  1:5 1Th 3:6 Koohr Juog muohja muohjo bang gihn ngo alihnga bang nyoge kejea yih poohd kaahn dhe yoohn ayiihi lum Jeacuu Ruohdho kedea yaa ayiih lum Juog ge nhyaari nhyaaro. 6  1:6 Pihp 1:9; Klo 1:9-10 A ukwahyo kejea nhyaahro gihn nhyaari yaa ayiiho ge adoohng ne ge wuud miihu kedea ge nyemiihu ke nying Jeacuu yih meehg nhyaahr nu dead yihdh giih beeye cang ge acub Juoge yihro ke nying Jeacuu. 7  1:7 Rom 12:10; 2Kor 7:4; Judea 13:1 Cwihnya med keraahyo kedea cwihnya ameehgi ngahmo ke nying nhyaahro gihri kedea ke nying kony ge konyi yaa ayiiho.

8  1:8-20 1Tim 6:1-2 Nea maano yih be maa ne tiihy gihn daahda utiihyi ngo keehd me nud tee maa acub Jeacuue yihra me maa yihn ne tiihy gihn daahda. 9-10  ‡ 1:9 Pihl 1; Epi 3:1§ 1:10 Onecimuj: Klo 4:9son: 1Tim 1:2 Abea ke nying nhyaahro gihn ayoado bang Jeacuu e ne kwaya wongi beere ngo tiihyi tiihyo. Wongi akwaya, a Poal ge beehda ukiihj e amag yi thijin ke nying puohny lum Jeacuu Kriihjto, kejea konyi Onecimuj. Ge anaa yi thijin e ngo akonya udoohnge ne ngad yiiho noono uroome wa nyethiin yeya. 11 Umodho ngo kuu anahg ngaa me ree ne koany yihri ke nying gihn anaa agoohde oogo rihi, abea awaahn ni ngo adoohng ne ngaa me ree ne koany yihro cang.

12 Onecimuj ge anhyaara wa nyethiin yeya, e aman oohra bangi. 13  1:13 Pihp 2:30 Abea keehd maano e a daahd ngo ubeehde keehd an ka poohde e a nii thijin ke nying gihn nahga ngad batien Jeacuu Kriihjto. A anaa adaahd ngo uluunye kari ne kony an. 14  1:14 2Kor 9:7; 1Pii 5:2 Abea a be daahd ubeehde kan nea padh yih naa ayiiho. Ke dhe yoohn ni, nea gihn daahda ngo atiihyi, e ngo atiihyi bang gihn yih ne daahd ngo ke tiihyo, kedea padh thiel e naa athiel yihn ne tiihy ngo. 15 Ka moogo e Juog e naa ameehg Onecimuj goohd oogo rihi unahge nihn oogo beere nea ngo uduuo e be cahg aay ne weey weey. 16  1:16 1Kor 7:22; 1Tim 6:2 Bang gihn ge uduue bangi, e ngo buu unahg ubaahng maa now abea unahg wado ke nying gihn ayiihe lum Jeacuu. Onecimuj beehda ngaa maa anhyaara, abea ngo ngahya kejea ngo unhyaari keter me neehn kaano nahge ubaahngi kedea ngad yiiho nu.

17 Noono nea yih apahro ke nyinga kejea wo nyoge maa yaa tiihj acielo, kea lor Onecimuj beer mee wa ke ne lori an. 18 Nea Onecimuj awuohj ayuge rihi wale nea gihn me koohnyi ree nud e kea koohnyi ke an. 19  1:19 1Kor 16:21 Gihn ni beehda an ne gweede ke cinga: A Poal, kwaad gihn daahdi bang Onecimuj ngo ucoala yihri. Abea wiihi keá wul kejea yih be koohnya. Yih koohnya koohnyo bang gihn dhe yoohn beehdo beer ge ayoadi ngo ayoadi ke banga naa ayuga yihn udoohngi ne ngad Jeacuu. 20 Nea kare nud kea tiihy gihn kwaya yihri yih umiiha ke nying ruohdh. Tiihy gihn kwaya bang gihn wo beehda yaa batien Jeacuu. 21 Keehd man gweehda yihri ni, e ngo beehde ngahya kejea gihn akwaya yihri ngo utiihyi adhaahr ukaali wiihe.

22 Gihn moogo me daahda ke robo yihri nud. Gwiir kar beehdo yihra, bang gihn ngo gaahna gaahno kejea Juog wiih kwaj gihru ngo uduue umeehge an lony oogo yi thijin, ne ci ne liew wun keehdo.

23  * 1:23 Epabraj: Klo 4:12 Eparuj wu amaahdhe, ngo nii thijin banga ke nying gihn tiihye ke nying Jeacuu Kriihjto. 24  † 1:24 Maarko: Tiihy 12:12; 2Tim 4:11Arijtarkuj: Klo 4:10Demaj kedea Luka: Klo 4:14 Thiow Maarko, Arijtarkuj, Demaj kedea Luka ge tiihy ke an, yi puohny Ciig Beer wu amaahdh gene.

25 Beehn Ruohdho Jeacuu Kriihjte cube muunye yihru cang.