BÚKÙ TÀ TƗ́DHƗ́//RU YÌZO DHƗ ÀDHYA LÚKÀ 1

Rúbí Tanɨ Lúkà dré tɨsɨ̀le dhɨ

Búkù kònɨ̀dhɨ nɨ tà àndu ngɨ̀le drìdrì dhɨ

Dhya búkù kònɨ̀dhɨ nɨ tɨsɨ̀lepi dhɨ tá Lúkà ꞌɨ. Akódhɨ nda tá àpóstolò ꞌɨ ko. Dɨ, akódhɨ tá ɨ́na móndɨ́ tà Yésu dré ꞌòle ɨ̀ndɨ̀ tadhálé dhɨ kɨ ndàlepi nìle dóro lavúlé, ngóró dhya tà nda kɨ nobhá mì sè dhɨ ɨ̀ dré tɨtɨ́lé drá dhɨ tɨ́nɨ dhɨ ꞌɨ (Lúkà 1:1-4). Akódhɨ tá kókpà Pólò nɨ atsíàmu kɨ àlo ꞌɨ (Tà ꞌòle dhɨ ɨ 16:10, àruka nɨ ɨ́be). Kònɨ̀dhɨ búkù nɨ àlo búkù rì Lúkà dré tɨsɨ̀le dhɨ ɨ kòfalé dhɨ ꞌɨ. Búkù kònɨ̀dhɨ léna dhɨ, akódhɨ adré Yésu nɨ lɨ́drɨ̀ nɨ tà àzí nɨ ɨ́be dhɨ kɨ tɨtɨ́ kòdhya. Akódhɨ nɨ búkù nɨ rì rú be «Tà àpóstolò ɨ̀ dré ꞌòle dhɨ ɨ» dhɨ léna dhɨ, adré Èkèlézyà nɨ tà tɨtɨ́ kòdhya.

Búkù kònɨ̀dhɨ léna dhɨ, Lúkà adré tadhá dhɨ, Yésu Gìká nɨ Mváagó ꞌɨ, ɨ̀ndɨ̀ Mèsɨ́yà Gìká dré tá lazílé gò amùzoá kɨtswálé móndyá títí dhɨ kɨ tɨdrɨ́ dhɨ ꞌɨ. Lúkà adré tɨsɨ̀á dhɨ, Gìká nɨ Tɨrɨ́ zɨ̀ tá Yésu nda alɨ̀le Rúbí Tanɨ longó móndyá lemerè ro dhɨ ɨ dré (4:18). Tà bàti ró dhɨ, Yésu adré Gìká nɨ lèle tadhá móndyá títí tà yàyà dhɨ ɨ́be dhɨ ɨ dré: lemerèbhá ɨ, dràbhá ɨ, móndyá adrélé mì pfòle dhɨ ɨ, tàkonzɨ̀bhá ɨ, tsàle móndyá títí togó be ànzɨmvá kya tɨ́nɨ dhɨ ɨ́be. Tà kàdrɨ̀ àruka à dré adrélé kisúlé búkù kònɨ̀dhɨ léna dhɨ ɨ, tà kònɨ ꞌɨ: Tɨrɨ́ Lólo nɨ àzí, tà zìma Gìká tí dhɨ, Yésu nɨ lèle tadhama tòkó ɨ dré dhɨ, móndɨ́ kɨ tàkonzɨ̀ trìma, ɨ̀ndɨ̀ Yésu nɨ kaꞌìbhá kɨ kólénzé.

Búkù su Rúbí Tanɨ nɨ tà dri dhɨ ɨ kòfalé dhɨ, à adré tà àruka kɨ kisú ngbà ꞌí Lúkà nɨ búkù kònɨ̀dhɨ léna: Yòwánɨ̀ Bàtísimò fèlepi nɨ tìma, tà àruka Yésu nɨ tìma nɨ tà dri dhɨ ɨ, Yésu nɨ lɨ̀ma tépelò na mvámvá ro dhɨ, pɨ́dhɨ́gó Sàmàrɨ́yà agó dóro dhɨ nɨ tà dri dhɨ, pɨ́dhɨ́gó mváagó avɨ̀lepi dhɨ nɨ tà dri dhɨ, àruka nɨ ɨ́be.

Lúkà adré búkù kònɨ̀dhɨ nɨ tɨsɨ̀ agó àlo rú be Tèyòfílè dhɨ dré. Akódhɨ nda dré tá adrélé Yúdà mvá ꞌɨ ko dhɨ sè dhɨ, Lúkà adré Yúdà ànzɨ kɨ tà bǐ àyɨ kɨ labhɨ ɨ́be dhɨ kɨ àndu ngɨ. Tà nda sè dhɨ, móndyá ándrò dhɨ kɨ kɨtswá Rúbí Tanɨ Lúkà dré tɨsɨ̀le kònɨ̀dhɨ nɨ na, àndu nɨ nɨ nìzo dóro lavúlé.

Tà kàdrɨ̀kàdrɨ̀ búkù kònɨ̀dhɨ léna dhɨ kɨ atìma

1) Tà Lúkà dré Rúbí Tanɨ tɨsɨ̀zo ásà dhɨ (1:1-4)

2) Yòwánɨ̀ Bàtísimò fèlepi nɨ tìma, Yésu nɨ tìma, ɨ̀ndɨ̀ akódhɨ nɨ anzɨ̀ nɨ tà (1:5–2:52)

3) Yòwánɨ̀ Bàtísimò fèlepi nɨ àzí (3:1-20)

4) Yésu nɨ bàtísimò dòma, ɨ̀ndɨ̀ akódhɨ nɨ tabhìma (3:21–4:13)

5) Yésu nɨ àzí bvò Gàlìláyà àdhya na dhɨ (4:14–9:50)

6) Yésu nɨ atsí ngàzo Gàlìláyà lésè lɨ̀le Yèrúsalémà na dhɨ (9:51–19:27)

7) Yésu nɨ pósò kùdù, ɨ̀ndɨ̀ akódhɨ nɨ dràma (19:28–23:56)

8) Yésu nɨ ngàma dràdrà ꞌásè dhɨ, ɨ̀ndɨ̀ akódhɨ nɨ mbàma bhù na dhɨ (24:1-53)

Tà Lúkà dré Rúbí Tanɨ tɨsɨ̀zo ásà dhɨ

1 Atálágó Tèyòfílè, ngóró mɨ́ dré nìle be dhɨ tɨ́nɨ dhɨ, móndɨ́ bǐ dhɨ ɨ̀ tabhì tà ru ꞌobhá àma kòfalé dhɨ kɨ tɨsɨ̀le. 2 Ɨ̀ tɨsɨ̀ ngóró dhya tà nda kɨ nobhá mì sè kɨdhoma nɨ lésè gò, ɨ̀ dré atsázó Gìká nɨ kúlí longóbhá ɨ ró dhɨ ɨ̀ dré tɨtɨ́lé tayɨ́lé àma dré dhɨ tɨ́nɨ. 3 Dɨ, atálágó, má dré tà títí nda kɨ ndàle nìle kyá àyɨ kɨ kɨdhoma lésè dhɨ sè dhɨ, má mìlésè dhɨ tá kpà dóro má dré tà nda kɨ tɨsɨ̀le mɨ́ dré mìbhalé tí dhɨ. 4 Má adré ꞌòá kònɨ̀nɨ, mɨ́ kòkɨtswáró nìá tàle dhɨ, tà tadhálé mɨ́ dré dhɨ ɨ tà bàti ꞌɨ dhɨ be.

Ángéló longó Yòwánɨ̀ nɨ tìma nɨ tà

5 Lókyá Èródè dré tá adréràꞌa ópɨ́ ro bvò Yùdáyà àdhya drìle dhɨ ꞌá dhɨ, kòwánà àlo rú be Zàkàrɨ́yà dhɨ tá be. Akódhɨ nda tá kòwánà angábhá Àbɨ́yà nɨ súrú lésè dhɨ kɨ àlo ꞌɨ. Akódhɨ nɨ tòkó rú be Èlìzàbétè dhɨ angá tá kpà Àrónà atú adrélépi kòwánà kɨ kàdrɨ̀ ro dhɨ nɨ súrú lésè. 6 Àyɨ rìti dhɨ kɨ tà tá gyǎgya Gìká mìlésè. Ɨ̀ adré tá tà títí Mírì nɨ tátrɨ́trɨ́ kúlí dré adrélé tàle à kòꞌo dhɨ kɨ ꞌo, tà àlo tɨvɨ̀ àko ró. 7 Dɨ, àyɨ tá àyɨkya mvá àko. Tàko ko, Èlìzàbétè tá kóndó ꞌɨ, ɨ̀ndɨ̀ àyɨ rìti dhɨ kɨ kóná lavú tá dre.

8 Kìtú àlo dhɨ, Zàkàrɨ́yà nda adré tá àzí ꞌo kòwánà ro Gìká kandrá. Àngyá ko, lókyá nda tá lókyá kòwánà akódhɨ nɨ súrú lésè dhɨ ɨ̀ dré adrézó àzí ꞌo dhɨ ꞌɨ. 9 Ànzyà gà kòwánà ɨ̀ dré adrélé ꞌòle dhɨ tɨ́nɨ dhɨ, ɨ̀ kɨpè tá akódhɨ dzègé sè, fɨ̀le béndélé za Mírì nɨ tépelò na dhɨ kòdhya. 10 Dɨ akódhɨ dré tá adréràꞌa béndélé za dhɨ ꞌá dhɨ, móndyá zyandre títí dhɨ ɨ̀ adré tá tà zi Gìká tí kɨvɨ̀ na.

11 Gò ángéló Mírì àdhya dré ngàzo agálé Zàkàrɨ́yà kandrá, áyɨ totó adrélé àlètárɨ̀ adrézó béndélé za dhɨ nɨ drɨ́ágó lésè. 12 Zàkàrɨ́yà kònò akódhɨ dre dhɨ, akódhɨ nɨ drì dré abɨ́zó nyɨ̌nyɨ gò, tirì dré gàzo akódhɨ léna bǐ. 13 Dɨ, ángéló nda dré ɨ́na tàzoá drá dhɨ: «Zàkàrɨ́yà, mɨ́ ro ngá ko! Tàko ko, Gìká yi tà mɨ́ dré zìle ɨ́ tí dhɨ dre. Ámɨ tòkó Èlìzàbétè nɨ mváagó ti mɨ́ dré gò, mɨ́ dré rú nɨ nɨ zìzo Yòwánɨ̀. 14 Akódhɨ nɨ arɨ́ fe mɨ́ dré kólénzé ɨ́be. Móndɨ́ bǐ dhɨ kɨ kókpà lenzé akódhɨ nɨ tìma sè. 15 Tàko ko, akódhɨ nɨ tà nɨ adré kàdrɨ̀ Mírì mìlésè. Akódhɨ kɨtswá tàdzí vínò ꞌɨ yà, kó ngalè wá àtsɨ́ ꞌɨ yà dhɨ nɨ mvu ko. A nɨ ga Tɨrɨ́ Lólo sè bǐ, kɨdhólé ɨ́ dré adréràꞌa áyɨ andre lé dhɨ ꞌá. 16 A nɨ Ɨ̀sèrélè ànzɨ bǐ dhɨ kɨ adrì agòle Mírì àyɨ kɨ Gìká vélé. 17 A nɨ adhé alɨ̀le Mírì kandrá, Tɨrɨ́ Lólo atú adrélépi pròfétà Èlɨ́yà le dhɨ nɨ rìnyí sè, kɨtswálé ànzɨ kɨ atá kɨ togó adzá àyɨ kɨ ànzɨ ɨ vélé, ɨ̀ndɨ̀ móndyá adrébhá lɨgɨ́lé dhɨ kɨ togó adzá móndyá gyǎgya kɨ tògyá vélé, kɨtswázó móndɨ́ kɨ tɨvó adrélé gànzi ró Mírì dré be dhɨ bvó.»*

18 Dɨ, Zàkàrɨ́yà dré ángéló nda nɨ lizízó tàzoá dhɨ: «Má nɨ nìá ngalè tà kòdhɨ nɨ ru ꞌo bàti dhɨ ngɨ́nɨ? Àngyá ko, ma màlɨ̀ga ꞌɨ, ɨ̀ndɨ̀ áma tòkó nɨ kóná lavú dre.» 19 Ángéló logó drá dhɨ: «Ma Gàbèrèyélè ꞌɨ. Má adré áma totó Gìká kandrá, adrélé akódhɨ nɨ àzí ꞌo. Akódhɨ amù ma alɨ̀le mɨ́ vélé, rúbí tanɨ kòdhɨ nɨ longó mɨ́ dré. 20 Dɨ, mɨ́ yi rè ká! Mɨ́ nɨ adré ábhä́bhä́ ro tà ta àko ró, tsàle kìtú tà nda dré dra ru ꞌòzo dhɨ tú. Tàko ko, mɨ́ kaꞌì mɨ́na áma kúlí ɨ ko, tágba kúlí nda ɨ̀ dré dra ru ꞌòzo àyɨ kɨ lókyá sè dhɨ.»

21 Lókyá nda sè dhɨ, móndyá zyandre nda ɨ̀ adré tá Zàkàrɨ́yà nɨ letè gò, àyɨ kɨ lɨ́ndrɨ́ dré adrézó gàle, dré tá adrélé gìle tépelò na tò dhɨ sè. 22 Dɨ, kàpfò lásà dre dhɨ, kɨtswá tá ɨ́na tà ta àyɨ véna bwà ko. Gò ɨ̀ dré atógyàzoá dhɨ, ngá agá tá akódhɨ mi toróbɨ́ tɨ́nɨ tépelò na dre. Àngyá ko, akódhɨ atsá tá ɨ́na ábhä́bhä́ ro, adrélé tà ta àyɨ dré drɨ́gá sè. 23 Akódhɨ nɨ lókyá adrézó àzí ꞌo tépelò na dhɨ kàkɨ́ dre dhɨ, dré nzɨ̀zo ɨ́ bhàna.

24 Àmvolásà dhɨ, akódhɨ nɨ tòkó Èlìzàbétè dré ꞌa kisúzó gò, dré áyɨ zùzo ꞌa nda be mbǎ nzi. Adré tá kisùá ɨ́ léna dhɨ: 25 «Mírì ꞌo má dré tà adrélépi dóro ɨ́ mìlésè dhɨ kòdhya. Lókyá kònɨ̀dhɨ sè dhɨ, tɨngá má rúsè tà adrélépi tá kanyò fe má dré móndɨ́ ɨ mi dhɨ dre.»

À longó Yésu nɨ tìma nɨ tà

26 Èlìzàbétè nɨ mbǎ nɨ nzi-drì-àlo sè dhɨ, Gìká dré ángéló Gàbèrèyélè nɨ mùzo lɨ̀le bhàandre rú zìle Nàzàrétà bvò Gàlìláyà àdhya lé dhɨ na, 27 kyánzɨ àlo rú be Màrɨ́yà, àgo tà nìlepi rè ko dhɨ véna. À zɨ̀ tá Màrɨ́yà nda agó àlo rú be Yòséfà, angálépi ópɨ́ Dàwídì nɨ súrú lésè dhɨ dré tòko ró. 28 Ángéló nda kòfɨ Màrɨ́yà véna dre dhɨ, dré tàzoá dhɨ: «Mɨ Mírì dré áyɨ togó tanɨ bhàzo mɨ́ rú nɨ, mòdo mɨ́ dré! Mírì túmä́ní mɨ́ be!» 29 Dɨ Màrɨ́yà nɨ drì dré abɨ́zó nyɨ̌nyɨ kúlí nda sè gò, dré adrézó kisùá ɨ́ léna ngalè mòdo nda tá àdho mòdo kárá ꞌɨ ya dhɨ.

30 Dɨ, ángéló nda dré ɨ́na tàzoá drá dhɨ: «Màrɨ́yà, mɨ́ ro ngá ko! Tàko ko, mɨ Gìká nɨ togó tanɨ ɨ́be mɨ́ rú. 31 Mɨ́ yi rè ká! Mɨ́ nɨ ꞌa kisú gò, mɨ́ dré mváagó tìzo, rú nɨ nɨ zìzo Yésu. 32 Akódhɨ nɨ tà nɨ adré kàdrɨ̀, ɨ̀ndɨ̀ à nɨ akódhɨ nɨ zi Gìká kurú na bhù na dhɨ nɨ Mváagó ro. Mírì Gìká nɨ akódhɨ nɨ bha adrélé ópɨ́ kàdrɨ̀ ro, ngóró akódhɨ nɨ tábhí Dàwídì tɨ́nɨ. 33 Akódhɨ nɨ òpɨ̀ nya Ɨ̀sèrélè ànzɨ ɨ dri kóná vésè kólyá.† Bàti, akódhɨ nɨ òpɨ̀ nɨ adré kùdù àko.»

34 Dɨ Màrɨ́yà dré ángéló nda nɨ lizízó tàzoá dhɨ: «Tà kòdhɨ nɨ ru ꞌo ngɨ́nɨ? Tàko ko, má nì rè agó àlo nɨ tà ko.» 35 Dɨ ángéló nda logó drá dhɨ: «Tɨrɨ́ Lólo nɨ así mɨ́ dri gò, Gìká kurú na bhù na dhɨ nɨ rìnyí dré ámɨ asózó. Ásà dhɨ, à nɨ mvámvá lólo mɨ́ dré dra tìle nda nɨ zi Gìká nɨ Mváagó ro. 36 Dɨ mɨ́ yi rè ká! Ámɨ aró Èlìzàbétè kisú ɨ́na ꞌa dre. Adré mváagó letè, tágba dré adrézó màlɨ̀ga ꞌɨ dhɨ. Kònɨ̀dhɨ, akódhɨ tá adrélé zìle kóndó ro nda nɨ mbǎ nɨ nzi-drì-àlo dhɨ ꞌɨ. 37 Tàko ko, Gìká mìlésè dhɨ, tà àlo kɨtswálé ꞌòle bwà ko dhɨ yókódhó.» 38 Dɨ Màrɨ́yà gò tàá dhɨ: «Ma Mírì nɨ màrábà ꞌɨ. Tà nda kòꞌo ru má dré ngóró mɨ́ dré tàle dhɨ tɨ́nɨ.» Gò ángéló nda dré akódhɨ nɨ tayɨ́zó.

Màrɨ́yà lɨ̀ Èlìzàbétè nɨ no

39 Lókyá nda sè dhɨ, Màrɨ́yà dré ngàzo lɨ̀le sɨ́rɨ́ bhàandre àlo bvò kòngo ró Yùdáyà àdhya lé dhɨ na. 40 Dré tsàzo fɨ̀le Zàkàrɨ́yà nɨ dzó na gò, mòdo fe Èlìzàbétè dré. 41 Dɨ Èlìzàbétè dré Màrɨ́yà nɨ mòdo nda nɨ yiràꞌa dhɨ, mvámvá dré ngàzo lána gò, Èlìzàbétè dré gàzo Tɨrɨ́ Lólo sè bǐ. 42 Dré yòzoá kúlí ꞌuꞌù sè dhɨ: «Gìká bhà tà tanɨ mɨ́ dri tòkó àruka títí dhɨ kya kɨ lavú dre. Bhà kókpà tà tanɨ mvámvá mɨ́ dré dra tìle dhɨ dri dre. 43 Ma tá àdhi ꞌɨ, áma Mírì nɨ andre dré alɨ̀zo má vélé nɨ? 44 Mɨ́ nò rè ká! Ámɨ mòdo nɨ kúlí dré adhéràꞌa má bílé dhɨ ꞌá dhɨ, mvámvá nga má léna arɨ́ dré. 45 Kólénzé mɨ́ dré, mɨ́ dré kaꞌìle tàle dhɨ, Mírì nɨ dra tà ɨ́ dré tàle mɨ́ dré dhɨ nɨ ꞌo káyà dhɨ sè.»

Longó Màrɨ́yà àdhya

46 Dɨ Màrɨ́yà dré tàzoá dhɨ:

«Má adré áma Mírì nɨ tà bha kuru.

47 Áma togó adré lenzélé Gìká áma tɨdrɨ́lépi dhɨ nɨ rú sè.

48 Tàko ko, akódhɨ bhe mì áyɨ màrábà tàko nɨ nɨ no.

Kɨdhólé nyànomvá dhɨ, móndyá lókyá títí ɨ sè dhɨ kɨ áma zi kólénzé líyí ro.

49 Àngyá ko, Gìká rìnyí líyí ro dhɨ ꞌo tà kàdrɨ̀ lavúlé dhɨ má dré dre.

Akódhɨ nɨ rú lólo.

50 Adré áyɨ togó dóro tadhá móndyá lókyá títí ɨ sè adrébhá áyɨ ro dhɨ ɨ dré.

51 ꞌO tà kàdrɨ̀ ɨ áyɨ drɨ́gá rìnyi ró dhɨ sè dre.

Lapé móndyá tà kisùkisù ɨ́be drìkàdrɨ̀ ro dhɨ ɨ.

52 Tɨrɨ́ ópɨ́ kàdrɨ̀ ɨ àyɨ kɨ lɨrɨ́rà adrézó òpɨ̀ nya dhɨ ɨ drìlésè gò,

móndyá tàko kɨ tɨngázó kuru.

53 Fè ngá dóro ɨ móndyá tàbirí ɨ́be dhɨ ɨ dré nyàle gò,

ngábhá kɨ logózó nzɨ̀le drɨ́gálé sè.

54-55 Alɨ̀ áyɨ màrábà, Ɨ̀sèrélè ànzɨ kɨ ledé.

Tɨvɨ̀ kpà áyɨ togó dóro tadhama Àbàrámà ɨ dré ànzɨ nɨ ɨ́be kóná vésè kólyá dhɨ ko,

ngóró dré tá lazílé àma kɨ tábhí ɨ dré dhɨ tɨ́nɨ.»

56 Màrɨ́yà dré adrézó Èlìzàbétè bhàna mbǎ na gò, dré gòzo nzɨ̀le ɨ́ bhàna.

Yòwánɨ̀ nɨ tìma

57 Èlìzàbétè nɨ lókyá tìzo dhɨ kòkɨtswá dre dhɨ, dré mváagó tìzo. 58 Akódhɨ nɨ bhàzɨ̌ ɨ aró nɨ ɨ́be dhɨ ɨ̀ kòyi tàle dhɨ, Mírì tadhá tá áyɨ togó dóro drá dhɨ dre dhɨ, ɨ̀ dré ngàzo adrélé lenzélé túmä́ní akódhɨ be.

59 Mvámvá nda nɨ kìtú nɨ nzi-drì-na akódhɨ nɨ tìma àmvolésè dhɨ sè dhɨ, ɨ̀ dré lɨ̀zo akódhɨ nɨ ꞌo lwàle. Móndɨ́ ɨ̀ adré tá ꞌòle akódhɨ nɨ atá, Zàkàrɨ́yà nɨ rú fe drá ká. 60 Dɨ, andre nɨ dré ɨ́na tàzoá dhɨ: «Kóko, à nɨ akódhɨ nɨ rú zi Yòwánɨ̀.» 61 Ɨ̀ tà drá dhɨ: «Móndɨ́ rú be kònɨ̀nɨ dhɨ ámɨ súrú na dhɨ yó.» 62 Gò ɨ̀ dré mvámvá nda nɨ atá nɨ lizízó drɨ́gá sè, nìzoá ngalè akódhɨ lè à kòzi mvámvá nda nɨ rú àdhi ya dhɨ. 63 Dɨ Zàkàrɨ́yà dré ngá adrézó ngá tɨsɨ̀ drìá dhɨ nɨ zìzo gò, tɨsɨ̀zoá dhɨ: «Akódhɨ nɨ rú Yòwánɨ̀.» Gò àyɨ títí dhɨ kɨ lɨ́ndrɨ́ dré gàzo tà nda sè. 64 Gbǎ kòdhwa, Zàkàrɨ́yà nɨ kúlí dré fùzo gò, dré kɨdhózó adrélé tà ta, adrézó Gìká nɨ rú bha kùle. 65 Dɨ tirì dré gàzo àyɨ kɨ bhàzɨ̌ títí dhɨ ɨ léna bǐ. Gò à dré adrézó tà nda kɨ tɨtɨ́ bvò kòngo ró Yùdáyà àdhya ꞌásè wä́yi. 66 Móndyá títí tà nda kɨ yibhá dhɨ ɨ̀ adré tá tà nda kɨ kisù, adrézó lizíá àyɨ kòfalésè dhɨ: «Mvámvá kòdhɨ nɨ atsá àdhi ró?» Tàko ko, Mírì nɨ rìnyí tá mvámvá nda ɨ́be bàti.

Longó Zàkàrɨ́yà àdhya

67 Zàkàrɨ́yà, mvámvá nda nɨ atá dré gàzo Tɨrɨ́ Lólo sè bǐ gò, dré ngàzo Gìká nɨ kúlí longó pròfétà àdhya tɨ́nɨ kònɨ̀nɨ:

68 «Rúku kàdré Mírì, Ɨ̀sèrélè ànzɨ kɨ Gìká dré,

dré alɨ̀le áyɨ móndyá kɨ lomɨ́, àyɨ kɨ apázó dhɨ sè.

69 Tàko ko, akódhɨ ꞌo dhya rìnyi ró dra àma kɨ tɨdrɨ́lépi dhɨ apfòle,

áyɨ màrábà Dàwídì nɨ súrú lésè dre.

70 ꞌO kònɨ̀nɨ ngóró dré tá lazílé kɨ́nó lésè,

áyɨ pròfétà lólo dhɨ ɨ tí dhɨ tɨ́nɨ.

71 Lazí tá dhɨ, ɨ́ nɨ àma kɨ tɨdrɨ́ àma kɨ kàrɨbhá ɨ drɨ́gásè,

ɨ̀ndɨ̀ móndyá títí adrébhá togó kònzɨ bha àma rú dhɨ ɨ drɨ́gásè.

72 Ásà dhɨ, tadhá áyɨ togó dóro àma kɨ tábhí ɨ dré dre.

Tɨvɨ̀ kpà tà lólo ɨ́ dré bhàle ru yìzo móndyá ɨ́na ɨ́be dhɨ ko.

73 Tàko ko, sɨ̀ tá mòndrà lazízóá àma kɨ tábhí Àbàrámà dré dhɨ,

74 ɨ́ nɨ àma kɨ apá àma kɨ kàrɨbhá ɨ drɨ́gásè,

mà kàdréró áyɨ tà ꞌo tirì àko,

75 ngóró móndɨ́ lólo ɨ̀ndɨ̀ gyǎgya ɨ́ mìlésè dhɨ ɨ tɨ́nɨ, àma kɨ lókyá wä́yi sè.

76 Dɨ mɨ, áma mvá ro nɨ, à nɨ ámɨ zi Gìká kurú na bhù na dhɨ nɨ pròfétà ro.

Àngyá ko, mɨ́ nɨ dhe lɨ̀le Mírì kandrána, kɨtswálé láti ledé akódhɨ dré.

77 Mɨ́ nɨ longóá akódhɨ nɨ móndyá ɨ dré dhɨ,

akódhɨ nɨ àyɨ kɨ tàkonzɨ̀ kɨ tri, àyɨ kɨ tɨdrɨ́zó.

78 Àma kɨ Gìká nɨ ꞌòá kònɨ̀nɨ áyɨ togó dóro ɨ̀ndɨ̀ yàyà dhɨ sè.

Ásà dhɨ, a nɨ ngádra amù àma dré bhù lésè

ngóró kìtú nɨ apfòapfò tɨ́nɨ,

79 kɨtswálé ngá kazá móndyá adrébhá lɨrɨ́lé tínímvá na dhɨ ɨ dré,

ɨ̀ndɨ̀ àyɨ adrébhá lɨrɨ́lé lɨ́ndrɨ́ dràdrà àdhya zàle dhɨ ɨ dré,

kɨtswálé kpà àma kɨ tidrì láti tà kɨ̀drɨ́kɨ̀drɨ àdhya ꞌásè.»‡

80 Dɨ mvámvá nda adré tá mbàle rúbhá sè ɨ̀ndɨ̀ tògyá sè. Adré tá adrélé duku na tsàle lókyá dré apfǒràꞌa Ɨ̀sèrélè ànzɨ ɨ kandrá dhɨ ꞌá.

*1:17 1:17 À kònò Màlákì 3:23-24.

†1:33 1:33 À kònò 2 Sàmùwélè 7:12, 13, 16; Èsáyà 9:6; Dànyélè 7:14. Gìká nɨ Kúlí tɨsɨ̀le Gìríkì ti sè dhɨ adré tàá «Yàkóbhò nɨ dzó» kònwa. Kòdhɨ adré lèá tàle dhɨ «Ɨ̀sèrélè ànzɨ ɨ».

‡1:79 1:79 À kònò Èsáyà 9:1.