Mokanda ŋwa
Iwɛninyama sa Maphɔɔ
Maphɔɔ ma etatele
Yoane, mokomi ŋwa mokanda ŋwa mbomela ŋwa Bibilia, amokomaka phɔ ya ilenza ianola sa ɓato. Phɔ ɓakonzi ɓa Loma, ɓaɓaka ɓamiwɛnɛ ndokolo manzambe. Yango mɛna ɓabutwaka inyɔkɔlɔ ɓaanosi phɔ ɓɛ̀ɛ ɓaɓaka ɓaanole nde Nkolo mɔnɔmɔ Yesu. Teɓaɓaka ɓaanole na ikusamela mokonzi oomunɛnɛ wa Loma naa ekyeko yɛ.
Imbɛlɛ mɛ ɓamba ɓoma ɓaanosi ɓaikye. Ɓamba akya na Yoane, ɓamba motoma o mosanga ŋwa Patimos (1.9). Omɔ, anzelu wa Nkolo Yesu amba moteya maphɔɔ masengyesi iya sima ya ɓana nkɔlɔ (1.1). Yoane awɛnɛ oɓokye minyɔkɔ mamina mili ndokolo mianyɔkɔlɔkɔ ɓato ɓa Ɓabilɔnɛ na ɓa Ela ɓato ɓa Isalayɛlɛ. Maulane nana manyɔkɔlɔkɔ Ɓayuda Nkolo Yesu. Yango mɛna Yoane aɓenga ndengye eyakomama wango o nkanda ya Isaya, Ezekiyɛlɛ na Danyɛlɛ, na ndengye eya wɔ Nkolo Yesu.
Maphɔɔ mali o mokanda mumu maɓengana ɓoɓo:
- Iwɛninyama 1–3: Maphɔɔ mawɛninyama phanza na Nkanda yaakomela Yoane Mangomba
- Iwɛninyama 4–5: Ngambo ya Ŋwaphongo na ya Klisto o ikolo
- Iwɛninyama 6–7: Buku pha mangyende sambo. Ingomba, mokyisi munyakune ŋwa ɔlɔ Ŋwaphongo
- Iwɛninyama 8–11: Mbɛnzɔ sambo
- Iwɛninyama 12–13: Ingomba na Munguna Zabulu, na manyama maɓale
- Iwɛninyama 14: Ŋwana wa mpate na ɓato ɓɛ̀ɛ. Ŋwaphongo moteni ŋwa malombe ma ɓato ɓa mokyisi
- Iwɛninyama 15–16: Bisenzo sambo
- Iwɛninyama 17–20: Ɓabilɔnɛ enyango, nyama ɓaelongyi, moimosi owa ɓɔɔlɛ na Zabulu
- Iwɛninyama 21–22.5: Ikolo na munse munyakune, Yelusalɛmɛ enyakune
- Iwɛninyama 22.6-11: Nkolo Yesu aikyi mbunu: «Waikasi ɓonte, naye.»
1
Etatele
1 Iwɛninyama sa maphɔɔ sawɛnɛkyɛ Yesu Klisto. Ŋwaphongo amowɛninya sango phɔ ya iteya ɓasali ɓɛ̀ɛ maphɔɔ masengyesi iya uŋwaŋwa eye. Klisto atomaka anzelu wɛ phɔ ya ikyɛ siwɛninya oka Yoane mosali nwɛ, 2 owa anola oɓokye isɔ yaawɛnɛ yo ili Iloɓa sa Ŋwaphongo na ikyi wɔ phɔ ya Yesu Klisto. 3 Nkyisa ili na moto okotangye Iloɓa sisi, na ɓaaokye maloɓa ma ɓaimosi emba ɓambe ɓomba isɔ yaakoma ɓɛ́ɛ omɔ, phɔ imbɛlɛ mɛ sikomi phɛnɛphɛ.
Nkanda o mangomba ma Azi
4 Inga Yoane, nakomele mangomba sambo mali o Azi. Be ozwe ngɔlu na ɓose ikyiute na Iyo ooli, owaɓaka na okoye, ikyiute na ná Malɔɓɔ sambo mali o ɓoo pha mumbanga nwɛ ŋwa ɓokonzi, 5 ikyiute na ná Yesu Klisto, nzoka okowɔ nde ɓo wawɛnɛkyɛ yo, Ŋwana owa ɓola onte ya ɓawe, Mokonzi ŋwa ɓakonzi ɓa mokyisi. Oka okolozingye, owalokunyola masumu ma ɓanga na malongo mɛ, 6 owalobuya ɓosoo pha ɓanganga ɓa Ŋwaphongo phɔ ya Ango Ŋwaphongo, nkyɛmɔ na ɓokonzi iɓe nɛ phɔ ya ɓoɓɛlɛ na ɓoɓɛlɛ. Amɛ!
7 Kyeka, kaye onte ya mampata, moto munsɔ aamowɛnɛ, eɓe na ɓamumaaka ikɔngɔ. Maɓota masɔ ma mokyisi mamunyingonela phɔ yɛ. Ɛ! Amɛ!
8 «Nali Etatele na Mbomela», kyewɔ Nkolo Ŋwaphongo, iyo ooli, owaɓaka na ookoye, Ekambambasi.
Yoane awɛni Klisto o ndɔtɔ
9 Inga Yoane, nwɛɓi na ɓɛ́ɛ okookye mpasi ɓo okookye ɓɛ́ɛ phɔ ya ɓokonzi na ikanga sa motema onte ya Yesu, ɓantomaka o mosanga ŋwa Patimos phɔ ya Iloɓa sa Ŋwaphongo saɓaka nga nateya na phɔ ya ɓosembo pha ɓaka nga naimole phɔ ya Yesu. 10 Mokɔlɔ ŋwa Nkolo, Ɓolɔɓɔ phamba ya nzwa, emba namba yaoka o sima ya nga ŋwɛsi mokusi, ndokolo mumbɛnzɔ, 11 mowɔ oɓokye: «Maphɔɔ maawɛnɛ wɛ, omakome o buku ɓɔnɔɓɔ, ombe ɓotoma o mangomba sambo mama: O Efese, o Similinɛ, o Pelegamɛ, o Tiatile, o Saledɛsi, o Filadɛlfi na o Laodikia.»
12 Namba ya miekpinya phɔ ya ikyeka ŋwɛsi ŋwaɓaka munvɔlɛ. Emba waamiekpinya nga, naesi yawɛnɛ maɓele sambo makyela ɓɛ̀ɛ na itela.
13 Emba onte ya maɓele, moto mɔnɔmɔ owa ulana na ŋwana wa moto aɓaka omɔ. Alataka etubu aanda na nkamba ya itela eyamoiphiaka ɓontolo. 14 Moto nwɛ na suwe yɛ yaɓaka intane ndokolo nkungyɛ ya mpate, ndokolo mangbandangbala. Emba miyo mɛ maɓaka ndokolo ingyɛngu sa ŋwenya. 15 Makolo mɛ maɓaka ndokolo ebuni ya motuya eekunyo o itumbu sa ŋwenya, emba ŋwɛsi nwɛ ŋwaɓaka ndokolo ɓokyele kanda ya maa ma ebale eenɛnɛ. 16 O eɓɔkɔ yɛ ya ɓoloo, aphilaka ɓanyasɛsi sambo, emba munɔkɔ nwɛ ŋwaɓaka motɔkɔlɔ mumphata mootu. Ɓoo phɛ phaɓaka ɓongyɛngyɛ ndokolo ɓoko ngale moo. 17 Wa mowɛnɛ nga, namba ka ndokolo mowe o makolo mɛ, emba amba yalangya eɓɔkɔ yɛ ya ɓoloo o ikolo sa nga, amba ya wɔ yokye: «Salota! Nali moto owa o ɓoo na owa mbomela. 18 Na oli na ɓomɔɔ. Nawaka, emba kyeka, nali na ɓomɔɔ phɔ ya ɓoɓɛlɛ na ɓoɓɛlɛ, naphisi maphungola ma iwaa na ma mokyisi ŋwa ɓawe. 19 Yango mɛna koma maphɔɔ masɔ mawɛni wɛ, malekane uŋwaŋwa eye na maamoya sima. 20 Phɔ ya lowɔ lokyekyi ɓanyasɛsi sambo ɓaawɛni wɛ o ɓoloo pha nga na maɓele sambo makyela ɓɛ́ɛ na itela, sekyele, eli ɓoɓo: Ɓanyasɛsi sambo eli ɓanze ɓa mangomba sambo, emba maɓele sambo eli mangomba sambo.»