Mokanda ŋwaakomaka
Zake
Maphɔɔ ma etatele
Zake akomaka mokanda mumu phɔ ya iteya ɓaanosi mozalesi mosengyesi na ɓɛ̀ɛ iɓaa onte ya ɓɛ̀ɛ na ná ɓato ɓate ɓali ɓaanosi.
Zake kateya oɓokye malondo maute nde na Ŋwaphongo, emba toengyesi imoonga mango na ianola sisɔ (1.2-8). Amba ya ambya sima mitindo phɔ ya maphɔɔ makyekyi ezwele, iɓaa pha, maphɔɔ ma nkaka ndengye na ndengye, bimekyi na mateya ma phɛlɛ maawɛnɛnɛ na bitoma (1.9-27). Akatela na ɓokusi lowɔ la ikyeka maɓoo onte ya isanga (2.1-130). Emba awɛninya oɓokye o maphɔɔ masɔ, lolekyi na ntina eli nde ianola na bitoma bilaa (2.14-26). Kaongye na ɓanga oɓokye toɓanzakye nɔkɔ ya ɓanga (3.1-12), amba na loteya malondo ma phɛlɛ mauta na Ŋwaphongo (3.13-18). Kakyebisa ɓato ɓanyɔsa mobulu, ɓamiambya nde o maphɔɔ ma mokyisi, ɓaayɔɔ ɓɛbi na ɓɛ̀ɛ, na ɓanyɔkɔlɔ ɓasi ɓa ɓɛ̀ɛ (4.1–5.6). Kaongye na ɓaanosi ɓasɔ ɓaeɓe ikanga motema, ɓa ɓee ɓato ɓa losambo na ɓasalise ɓa ɓɛbi ɓaabungi (5.7-20).
Mokanda mumu mongye na ɓaanosi oɓokye ianola sa ɓɛ̀ɛ siwɛninya bitoma phɔ ianola sitesiwɛninya bitoma sawa (2.26).
Maphɔɔ mali o mokanda mumu
- Zake 1.1: Maphɔɔ ma etatele
- Zake 1.2-18; 2.1-13; 5.7-20: Mateya ndengye na ndengye
- Zake 1.19-27: Iyoka na ikyela
- Zake 2.14-26: Iɓaa na ianola kyeongye na ikyela bitoma
- Zake 3.1-18: Munɔkɔ ŋwa moanosi
- Zake 4.1–5.6: Moanosi na maphɔɔ ma mokyisi
1
Iɓeya
1 Inga Zake, moombo ŋwa Ŋwaphongo na ŋwa Nkolo Yesu Klisto, naeɓeya ɓɛ́ɛ maɓota iko mbuka maɓale makyɛminyangwa o nkyisi isɔ.* 1.1 Zake oyo eli mosi wa Yesu. Bitoma ɓa ɓatoma 12.17. Galatiya 1.19.
Ianola na zebi
2 Ɓɛbi na nga, ɓo bimekyi ɓa ndengye na ndengye biekomesi, ɓa na nkyisa. 3 Oeɓe oɓokye, ɓo ophisi ianola sa ɓɛ́ɛ onte ya imekama, wamokoka ikanga motema. 4 Kasi ikanga motema siɓe saa phɛlɛ phɔ oɓe ɓato ɓalongoɓana o maphɔɔ masɔ, phɔ ya oɓokye ɓɛ́ɛ sazanga ekpele yɔnɔyɔ.
5 Ɓo eɓe oɓokye mɔnɔmɔ na ɓɛ́ɛ azangyi zebi, asiongye na Ŋwaphongo, aamophɛ sango. Phɔ Ŋwaphongo kaphɛ ɓato ɓasɔ na motema molaa, sa mooya. 6 Aongye na ianola sisɔ, yo saɓa na ziko. Phɔ moto okoikye ziko, aula na kanda ya maa manɛnɛ matombe ewɛɛlɛ na mbale na mbale. 7 Moto wa ndengye mɛna yo saumunya oɓokye amozwa ŋwana ekpele oka Nkolo, 8 phɔ ali moto wa ntema iɓale, kaɓongole maumunya mɛ imbɛlɛ sisɔ o maphɔɔ mɛ.
Ɓoɓola na ezwele
9 Moɓola asepele na ɓoɓola phɛ, yo samiwɛnɛ pha, 10 emba moto wa ezwele amiuya phɔ ezwele yamounva, o iwa sɛ amoikala pha ndokolo phulɛlɛ ekyeungye o ngonda. 11 Phɔ moo motɔkɔsi, mungasi, munyibye munkata, phulɛlɛ ya ŋwango ekaa, emba ɓolaa pha ŋwango ɓoumbo. Eli nde ɓomɔ na moto wa ezwele, onte ya bitoma ɓɛ, amounga.
Bimekyi
12 Nkɔnzɔ ili na moto okokangye motema o bimekyi. Phɔ oteye yo ikanga motema sɛ, amozwa eboko ya ɓomɔɔ phalakyela Ŋwaphongo ɓato ɓaamozingye. 13 Ɓo moto amekami, yo sa wɔ oɓokye: «Eli Ŋwaphongo okomekye.» Phɔ Ŋwaphongo tazingye ɓoɓe, tambe na meka moto. 14 Moto na moto kamekame nde na phowa yɛ mampenza, ekyemokosa na ekye motome ikyela ɓoɓe. 15 Emba phowa ekusi kyeɓote isumu, ɓo isumu sikosi, siɓangye iwaa.
16 Ɓɛbi na nga ɓa lozingo, ɓɛ́ɛ samikosa. 17 Ɓolaa ɓosɔ na makaɓo masɔ maala maakoka o ikolo, maute oka Tata owakyela saa, ɓokombe na ɓanyasɛɛsi. Ali nde ndengye yɔnɔyɔ, yo taekpane, oka yɛ enzɔmbi teeli. 18 Ɓo wazinga yo, aloɓota na iloɓa sa phɛlɛ phɔ ya oɓokye toɓe o ikolo sa bikyelamo ɓɛ́ɛ bisɔ.
Iyoka na ikyela
19 Ɓɛbi na ga ɓa lozingo, eɓa maphɔɔ mama na ɓolaa, moto munsɔ akyele ɓokusi aokye, kasi yo sa wɔ mizele, yo saoka yɔɔ mizele. 20 Phɔ moto wa yɔɔ, takokya maphɔɔ ma Ŋwaphongo ma ɓosembo. 21 Yango mɛna, manya maphɔɔ masɔ maasɔkɔtɔ na ma koo. Yamba na ɓolaa iloɓa sa phika Ŋwaphongo onte ya ɓɛ, sango sikokyi ibikya milimo ma ɓɛ.
22 Ɓa ɓakyelesi ɓa ikyiwɔ Iloɓa, kasi saɓa nde ɓaokyi na matoo. 23 Phɔ moto okookye iloɓa, kasi tambe sikyelela, yo mɔna aula na moto okyekyi ɓoo phɛ o talatala. 24 Amiwɛni yo mampenza, wakute yo mana wamɔ, sakɔkɔ amibungyi ɓo miwɛnɛkyi yo. 25 Kasi moto owa mophila miɓeko miilaa, ma ɓosɔmi, taokye nde iloɓa ɓookyi phɔ ya isibunga mizele, kasi kasikyelele. Yo mɔna amoɓa na nkɔnzɔ o maphɔɔ maakyele yo.
26 Ɓo moto kaumunya oɓokye ali mosambesi, kasi tauya lole lɛ, kamikosa yo mampenza, losambo lɛ loli la pha. 27 Losambo loote loli na intɔnɔ siiɓe oka Tata Ŋwaphongo, eli: Ikyeka biika na mazengye onte ya ngɔngɔ ya ɓɛ̀ɛ, na imiɓanza i maphɔɔ masɔ maaɓe ma mokyisi.