Simo elaa ya Yesu Klisto eya imolaka
Matiye
Maphɔɔ ma etatele
O Simo Elaa ya Matiye tomozwa ndɔngɔ iinɛnɛ ya Simo Elaa ɓo waeyimolaka Malako.
Kasi Simo Elaa ya Matiye embi kula kyɛsɛnɛ na ɓwikye na Simo eyaaka Malako.
O Simo ya Matiye tomozwa maphɔɔ mama:
- Matiye 1–2: Ɓankɔkɔ ɓa Yesu na iɓotama sɛ
- Matiye 3.1-12: Mateya ma Yoane Moɓatise
- Matiye 3.13–4.11: Iɓatisama na imekama sa Yesu
- Matiye 4.12–18.35: Etoma ya Yesu o Galileya
- Matiye 19.1–20.34: Yesu amani o Galileya akyɛ o Yelusalɛmɛ
- Matiye 21.1–27.66: Pɔsɔ ya Yesu eya suka o Yelusalɛmɛ
- Matiye 28.1-20: Iakwa sa Yesu na iwɛnɛnɛ sɛ na ɓaekosi
Simo Elaa ya Matiye, kyewɛninya oɓokye Yesu ali Mokonzi ooyelesi ɓato ɓɛɛ ɓokonzi pha Ŋwaphongo. Ambi kula ɓaa na Moteye ooɓaphɛ mateya masengyesi na ɓɛ́ɛ phɔ ɓaɓee manzoka oka ɓato ɓasɔ.
1
Ɓankɔkɔ ɓa Yesu
(Luka 3.23-38)
1 Kyeka mankombo ma ɓankɔkɔ ɓa Yesu-Klisto: Yesu ali nkɔkɔ wa Davidi, na nkɔkɔ wa Abalayama.
2-11 Abalayama aɓoti Izake,
Izake aɓoti Yakoɓo,
Yakoɓo aɓoti Yuda na ɓanaa nyango,
Yuda aɓoti Pɛlɛsi na Zala nyango wa ɓɛ́ɛ Tamala,
Pɛlɛsi aɓoti Esilɔnɛ,
Esilɔnɛ aɓoti Lama,
Lama aɓoti Aminadaba,
Aminadaba aɓoti Nasonɛ,
Nasonɛ aɓoti Salamani,
Salamani aɓoti Boaze (nyango yaɓaka Laaɓa),
Boaze aɓoti Obɛdɛ (nyango yaɓaka Luta),
Obɛdɛ aɓoti Yese,
Yese aɓoti mokonzi Davidi,
Davidi aɓoti Salomo (nyango yaɓaka ŋwasi owa zalaka phanza na Uliya),
Salomo aɓoti Loboama,
Loboama aɓoti Abiya,
Abiya aɓoti Asa,
Asa aɓoti Yozafa,
Yozafa aɓoti Yolama,
Yolama aɓoti Azaliya,
Azaliya aɓoti Yotama,
Yotama aɓoti Akaza,
Akaza aɓoti Ezekiya,
Ezekiya aɓoti Manase,
Manase aɓoti Amona,
Amona aɓoti Yosiya,
Yosiya aɓoti Yoyakimɛ na ɓanaa nyango imbɛlɛ saakyɛkyɛ ɓɛ́ɛ na ɓato ɓa Isalayɛlɛ o ɓoombo pha Babilɔnɛ.
12-16 O sima ya ɓokyɛkye na ɓato ɓa Isalayɛlɛ o ɓoombo o Babilɔnɛ,
Yoyakimɛ aɓoti Salitiyɛlɛ,
Salitiyɛlɛ aɓoti Zolobabɛlɛ,
Zolobabɛlɛ aɓoti Abiudi,
Abiudi aɓoti Eliyakimɛ,
Eliyakimɛ aɓoti Azɔlɔ,
Azɔlɔ aɓoti Sadokɛ,
Sadokɛ aɓoti Akimi,
Akimi aɓoti Eliudi,
Eliudi aɓoti Eleyaza,
Eleyaza aɓoti Matanɛ,
Matanɛ aɓoti Yakoɓo,
Yakoɓo aɓoti Zozefu,
Zozefu moloo wa Maliya nyango wa Yesu, okoɓangye ɓɛ́ɛ Masiya.
17 Tata oka Abalayama nɔnɔ oka Davidi wali ɓa yoo iko mbuka ɓane. Uta oka Davidi nɔnɔ wakyɛndɛ ɓɛ́ɛ na ɓato ɓa Isalayɛlɛ o ɓoombo o Babilɔnɛ, walekana ɓa yoo iko mbuka ɓane. Na o itata imɓɛlɛ sasina tee nɔnɔ o iɓotama sa Masiya, walekana ɓa yoo iko mbuka ɓane mɛ.
Iɓotama sa Yesu
(Luka 2.1-7)
18 Iɓotama sa Yesu Masiya saɓaka ɓoɓo: Nyango Maliya aɓaka ŋwaŋwasi owa lukaka Zozefu ilonga, kasi waaɓa ɓɛ́ɛ naino sa ɓobutwakye o ingambi sɔnɔsɔ, Maliya aesi ya ekama na nwiya ŋwa Ɓolɔɓɔ Ɓosanto. 19 Moloo nyɛ Zozefu aɓaka moto wa ɓosembo, taikaka zinga imosambola o miyo ma ɓato, amba ya kana imolɛɛ oɓokye ɓato saeɓa. 20 Wa ɓaka yo kaumunya ɓaɓona, anzelu mɔnɔmɔ wa Nkolo amba motɔkɔlɛlɛ o ndɔtɔ, amba ya wɔ nɛ oɓokye: «Zozefu, nkɔkɔ wa Davidi, saila ilonga Maliya, phɔ ibu siili nɛ, siuti na mwiya ŋwa Ɓɔlɔɓɔ. 21 Amoɓota ŋwana wa lele, waa molaa nkombo Yesu. Eli yo moto owa mobikya ɓato ɓɛ́ɛ na masumu ma ɓɛ.»
22 Maphɔɔ masɔ maamana makyelama phɔ ya ikokya yaawɔ Nkolo na munɔkɔ ŋwa moimosi wɛ oɓokye: 23 «Ngɔndɔ mɔnɔmɔ amoekama, amoɓota ŋwana wa lele, ɓaamolaa nkombo Emanuɛl.» Nkombo mɛ kyelukye iwɔ oɓokye: «Ŋwaphongo ali na ɓanga elele yɔnɔyɔ.»
24 Waa umwa Zozefu, ambakyela nde ɓo wamowɔlɛkyɛ anzelu wa Nkolo, nɔnɔ wa longa yo Maliya. 25 Kasi taika angana nɛ nɔnɔ waaɓota yo ŋwana wɛ, emba Zozefu amba laa ŋwana mɛ nkombo ya Yesu.