Mokanda ŋwa Yoane ŋwa ntuɓo
Yoane
Maphɔɔ ma etatele
Ɓawɔ ɓɛkye Yoane akoma nkanda iyato, naɓo taika koma nkombo yɛ omɔ. Mokanda nwɛ ŋwa ntuɓo temoeɓane naa ɓamotomelaka ɓanza. Kasi moteya maphɔɔ maaɓaka malekane oka ɓanosi ɓa mangomba makyɛkyɛ ŋwango. Mangomba mayɔkɔ maikye ma imbɛlɛ mɛ maɓaka malɛ iɓenga nzela ya Ŋwaphongo phɔ ya imiphɛ o maphɔɔ ndengye na ndengye. Yango mɛna mokanda mumu mowɔlɛ maphɔɔ manɛnɛ maɓale:
- Ilenza ɓanosi oɓokye ɓabikye na isanga sa phɛlɛ na Ŋwaphongo na ná Ŋwana wɛ Yesu Klisto. Ibika simiwɛninya na nzela ya lozingo la ɓɛbi.
- Ikyela ɓokusi phɔ ya isukya mateya ma ɓɔɔlɛ maɔtɔ ɓophɛlɛ pha Simo Elaa.
Mokanda mumu mowɔlɛ maphɔɔ mama:
- 1 Yoane 1.1-4: Maphɔɔ ma etatele
- 1 Yoane 1.5–2.29: Moo na enzɔmbi
- 1 Yoane 3.1-24: Ɓana ɓa Ŋwaphongo na ɓana ɓa molemba
- 1 Yoane 4.1-6: Maphɔɔ ma phɛlɛ na maphɔɔ ma ɓɔɔlɛ
- 1 Yoane 4.7-21: Laakolo lozingo loute oka Ŋwaphongo
- 1 Yoane 5.1-21: Ianola siphɛ ɓato ɓomɔɔ pha ɓoɓɛlɛ
1
Iloɓa sa ɓomɔɔ
1 Yaaɓaka o etatele,
yaaokaka ɓanga,
yaawɛnɛkyɛ ɓanga na miyo ma ɓanga,
yaalembetelaka ɓanga
na yaakumaka ɓanga na maɓɔkɔ
Eli yo Iloɓa saalophɛ ɓomɔɔ
2 — phɔ ɓomɔɔ phamiwɛninya,
na ɓanga towɛnɛkyɛ
yango mɛna towɔ
tombe na eyimola ɓomɔɔ pha ɓoɓɛlɛ na ɓoɓɛlɛ,
phaaɓaka oka Tata, phamba ya miwɛninya oka ɓanga —
3 yaawɛnɛkyɛ ɓanga na ya okaka ɓanga,
toeyimole yango na ɓɛ̀ɛ mɛ,
phɔ na ɓɛ̀ɛ oangane na ɓanga.
Emba iyangana sa ɓanga eli iyangana na Tata
na ná Ŋwana wɛ Yesu Klisto.
4 Emba toekomele ɓaɓona
phɔ nkyisa ya ɓanga iɓe ya phɛlɛ.
Ŋwaphongo ali moo
5 Kyeka simo eyaoka ɓanga nɛ,
yango ekyembe eyimola ɓanga eye:
Ŋwaphongo ali moo,
oka yɛ, tewali nɔnɔ ŋwana enzɔmbi.
6 Ɓo towɔ oɓokye: Toangana nɛ,
bibi totambule o enzɔmbi,
mɛna tokate
tolombe kyela na maphɔɔ ma phɛlɛ.
7 Kasi ɓo totambule o moo
ɓoli yo mampenza moo,
mɛna ɓanga ɓasɔ toangana elele yɔnɔyɔ,
emba malongo ma Yesu, Ŋwana wɛ, malokunyole masumu masɔ.
8 Ɓo towɔ oɓokye: Teloli na masumu,
tomikatele ɓanga mampenza,
na maphɔɔ ma phɛlɛ temali onte ya ɓanga.
9 Kasi ɓo toyambole masumu ma ɓanga,
oli yo moto okokokya maphɔɔ malakyi yo, na oli yo moto wa ɓosembo,
alolimbisa masumu ma ɓanga,
amba na lokunyola na ɓoɓe pha ɓanga ɓosɔ.
10 Ɓo towɔ oɓokye: Teloli ɓato ɓa masumu,
mɛna tomobuye moto wa ɓɔɔlɛ,
na iloɓa sɛ tesili onte ya ɓanga.