3
Ɓana ɓa Ŋwaphongo
1 Kyeka ndengye ya lozingo loikye laalophɛ Tata ndokolo ikaɓo,
oɓokye toɓangame ɓana ɓa Ŋwaphongo,
emba tombi nde ɓa ɓomɔ!
Yango mɛna mokyisi temokokyi iloeɓa,
phɔ teŋwaika eɓa Ŋwaphongo.
2 Ɓande na nga ɓa lozingo,
tata uŋwaŋwaeye toli ɓana ɓa Ŋwaphongo,
kasi ndengye eyamoɓa ɓanga naino teewɛnɛ.
Toeɓe oɓokye, wa mowɛnɛnɛ yo,
tomoulana nɛ,
phɔ tomowɛnɛ ɓoli yo.
3 Emba moto munsɔ okokyele molemo ndengye mɛna mi yo
kamibuya pɛtɔ ɓoli yo pɛtɔ.
4 Moto okokyele isumu
kakyele na ɓoɓe.
Phɔ isumu ali ɓoɓe.
5 Kasi ɓɛ̀ɛ koeɓe oɓokye iyo aya phɔ ya iya manya masumu,
emba iyo taika kyela isumu.
6 Moto musɔ owaangana nɛ takokyi ikula kyela isumu.
Moto munsɔ okokyele isumu tamowɛnɛ tambe na moeɓa.
7 Ɓana ɓa nga,
moto saekosa.
Moto okokyele maphɔɔ ma ɓosembo ali moto wa ɓosembo,
nde ɓoli yo moto wa ɓosembo.
8 Moto okokyele isumu ali moto wa Zabulu,
phɔ tata o etatele Zabulu ali mokyesi wa masumu.
Kyeka ntina ya ɓoyakakye pha Ŋwana wa Ŋwaphongo:
Iyaɔtɔ bitoma ɓa Zabulu.
9 Moto munsɔ oɓotami na Ŋwaphongo
takule kyela isumu,
phɔ mumboto nwɛ moli onte yɛ,
emba takokyi ikula kyela isumu,
phɔ aɓotama na Ŋwaphongo.
10 Na yango waeɓane ɓana ɓa Ŋwaphongo na ɓana ɓa Zabulu.
Moto munsɔ otokyele maphɔɔ ma ɓosembo tali wa Ŋwaphongo,
eɓe na otozingye nwɛbi nɛ.
Zinga ɓɛbi ya Ŋwana wa Ŋwaphongo
11 Phɔ eye eli simo eyaokaka ɓɛ̀ɛ tata o etatele:
Oɓokye tozingane onte ya ɓanga.
12 Ya Kaina phe:
Wauta yo na moto moɓe, atena ŋwana nyango nkyingo.
Amotenaka nkyingo phɔ ya'ye?
Bitoma ɓɛ́ɛ ɓaɓaka biɓe,
kasi ɓaka ŋwana nyango ɓaɓaka bilaa.
13 Ɓɛbi, ɓɛ̀ɛ sakamwa,
ɓo mokyisi moeyini.
14 Ɓanga toeɓe oɓokye towaa tomba akwa,
phɔ tozingye ɓɛbi na ɓanga.
Moto otozingye ali mowe.
15 Moto munsɔ okoine nwɛbi nɛ, ali moɓomi.
Emba ɓɛ̀ɛ koeɓe oɓokye moɓomi wa ɓato na mɔnɔmɔ tali na ɓomɔɔ pha ɓoɓɛlɛ
onte yɛ.
16 Na ndengye eye, tata lɔlɔ toeɓe lozingo lɛ oɓokye:
Iyo Yesu, ambya ɓomɔɔ phɛ phɔ ya ɓanga,
na ɓanga mɛ, tosenyesi iyambya ɓomɔɔ pha ɓanga phɔ ya ɓɛbi.
17 Ɓo moto mɔnɔmɔ ali na mbolo ya mokyisi mumu
emba kambe wɛnɛ nwɛbi nɛ akayee,
tambi mooka ngɔngɔ,
ndengye'ye lozingo la Nwphongo lamba ɓa onte yɛ?
18 Ɓana ɓa nga,
ɓanga sazinga nde na maloɓa ma munɔkɔ,
kasi na bikyela na ná maphɔɔ ma phɛlɛ.
19 Na ɓomɔ tomoeɓa oɓokye toli ɓato ɓawɔ maphɔɔ ma phɛlɛ,
na o ɓoo phɛ tomouya mandondo ma ɓanga,
20 phɔ ɓo mandondo ma ɓanga malooya,
Ŋwaphongo alekyi mandondo ma ɓanga na ɓonɛnɛ, kambe na eɓa maphɔɔ masɔ.
21 Ɓɛbi na nga ɓa lozingo
ɓo mandondo ma ɓanga temalooya,
tomosolola na Ŋwaphongo sa ɓolotakye.
22 Na ekpele esɔ eyamoonga ɓanga, aalophɛ yango,
phɔ tokumole miɓeko mɛ
tombe na kyela ikyi mosepelisa.
23 Kyeka moɓeko nwɛ:
Ianola Ŋwana wɛ Yesu Klisto
na izingana ɓanga na ɓanga,
ɓo walophɛ yo lango ndokolo moɓeko.
24 Moto okokumole miɓeko mɛ ali onte ya Ŋwaphongo, emba Ŋwaphongo ali onte yɛ mɛ.
Na ɓomɔ toeɓe oɓokye ali onte ya ɓanga,
na nzela ya Ɓolɔɓɔ phaalophɛ yo ndokolo ikaɓo.