M̃aki Nap̃a Pol Siria Pa Pan
Li Nalelagaena Wa Lala Nae Garu
KALESIA
Visayuena Na Tusi Nene
Komp̃asnen suniena plas na tusi nini
Kalesia naga lepas keviu tai nap̃a m̃eke vatanon P̃arin Sup̃e nae Rom, a m̃eke e purvanua nap̃a nagane kiena kia Teki.
E pogos nap̃a nalogena kiena Yesu la asiaria vena ava alologon kiena lologena wo, yaru la nap̃a pe ape lus nae re Israel poli lala akekaran lologena wo nene pap̃isi.
Ana yaru lap̃asa asum̃aga, nap̃a e kiela sitomiena lala, asape visae yaru tai sinenan sape naga imi ve yaru lelaga nalelagaena kiena ne Yesu, naga monar taveve ke navisaluaena marua lala nap̃a sumo na Ntewa mila pa Mosis. Ana Pol pis m̃arera kawe sitomiena nene, pisawoia sape p̃elaga nene pe mesmesu re nenaga. Naga pisawal merarava sape visae yaru nap̃a sinenan tolen maliena e Kristo, purp̃esnen suri nene na sanene, naga monar lelaga ga e Kristo. E ga e p̃elaga nene, yaru makega akilia aimi amesmesu e marana Ntewa.
Ana e sum̃are lala e pulkumali lala nae lepas nae Kalesia, yaru lap̃asa apimi akawe Pol e visena lala, apian li-nalelagaena lala asape visae yaru tai sinenan sape imi mesmesu e marana Ntewa, naga monor taveve ke navisaluaena lala kiena Mosis.
M̃aki nini, Pol siria pan la nap̃a asum̃a ataveve ke vianena nene nap̃a pe po re poli, vena urela awasup̃e si aimi e lelagaena na lelaga, a e p̃elaga la nap̃a mesmesu. E kiena m̃aki, naga siar visena, pisawal sape naga kilia vis vanla sanenen komin naga puarar yum̃aena sane nalologena kiena Yesu Kristo, a li na lelagaena lala e yo pinuga apisukilia naga sanene. Naga pisa m̃aga sape pe yaru la re apisa pania asape imi ve nalologena tai poli, ana Ntewa ke nap̃a pisirlua naga narui, pio naga vena visawalen lologena wo va yaru la nap̃a pe ape lus nae re Israel poli. A naga pisa luwega visena na kaweena vianena viowa la nene, naga sape lelagaena kiena yaru ga kilia kila yaru mesmesu e marana Ntewa. E maran tusi maro na m̃aki nini, Pol kila meraravan sape p̃elaga wo nap̃a li nalelagaena la asum̃a akila, molue kome p̃elaga nap̃a yaru sinensi wenlai a vinena, komin nanene naui naga p̃elaga po na malien kiena ne la nap̃a amlelaga e Kristo.
Komp̃asnen tusi la na nini
Visena nasumo 1:1-10
Nam̃areraena sike e Pol komin naga pe nalologena tai 1:11—2:21
Ntewa sum̃a miila ita e kiena lemamiena 3:1—4:31
Li nalelagaena la apimi po, ana kiela yum̃aena sum̃aga 5:1—6:10
Visena maro 6:11-18
1
Pol siar kiena visena pan la
1-2 Inu Pol nesiri m̃aki nini pim̃asu pan amiu, amiu p̃egas nen li nalelagaen lala garu lap̃as nae Kalesia, a inu nemio kieta wolai lala nae e yo nini, imimi mepiun tan amiu mesape sanape amiu asum̃a pogaga pona amiu asike sanape? Inu nena nini nap̃a Yesu Kristo, amio Ntewa Arimata, nap̃a naga pisirlua sina ga Yesu e marena, lalua ne na nene lalua amligan inu nepe yaru nalologena, ana in na sanene, pe yaru re nap̃a pio inu poli, a pe yaru re m̃ena ga nap̃a naga mligan lua inu sanene poli. Ee, amiu na monar ayagogon ya nap̃a nevisawalia.
3 Inu sineun nesape Ntewa Arimata amio Sup̃e Yesu Kristo, lalua amligan lemamiena amio sum̃are sike e amiu.
4 Yesu Kristo, naga kila mesmesu sa nap̃a Ntewa Arimata naga sinenania, nap̃a naga tam̃an naga mare vena war plan kieta mlamulena viowa lala, vena kilia werelua ita e mlamulena viowa nap̃a tesike ea. 5 Vanon sur ne na nene, p̃isi na ita teyeluar manene kia kiena ne Ntewa nene va metava silaga, vano vano tap̃atete p̃isi. Sanene.
Lologena Wo, taaga ga
6 Inu nemilan amiu pap̃isi, nap̃a Ntewa naga pio amiu rui, a Kristo kila po pan amiu pap̃isi rui, ana pe e re ga e pogos nene poli ana amiu asum̃a ap̃ure ke sina ga petan Ntewa, nap̃a amiu asum̃a ataveve ke sina ga visena tai nap̃a sane lologena wo tap̃ena tai. 7 Ana tap̃atete si lologena wo tap̃ena tai ve sanene, komin nap̃a lologena wo taaga ga nene nap̃a sike na. Inu nemloge apisa sanini, vanon nap̃a yar lap̃as nap̃a akila ke sinemiu la pilovilopuia, nap̃a la sinelan avilopu lologena wo kiena ne Kristo imi ve tap̃ena. 8 Ana visae imimi yaru tai, pona navisi nae peni tai, pona a re m̃ena ga, nap̃a naga lologon nalologena wo tai, nap̃a pe toroki re amio nap̃a imimi mepisawal pan amiu sumo rui, ve sanene popon manene nap̃a yaru nene akoven vitove e lele na logeen viowa. 9 Ee, in na nevisawal ke sina ga nene, van amiu narui, nesape visae yaru ai nap̃a pisawal visena na lologena wo tap̃ena tai pan amiu sumo rui, nap̃a pe tap̃enan lologena wo nene nap̃a amiu amla p̃isi rui, ana p̃isi na yaru nene naga monar ala nakoaena viowa vania e kapi.
10 In na nekilia nesape yaru lap̃asia apisa kare inu yam mok rui, apisape in na sineun ga nesape yaru lala aloge wo e kiau visena lala, ana amiu amloge kiau visena m̃arera nene sanape? Pona yoko yaru lap̃asia sinela kar inu yo, ana pogaga, komin nap̃a ya ne in na sineunia, in na sineun ga nesape Ntewa, naga kekaran kiau visena, komin nap̃a visae in nemlologon ga vena yaru la aieluar inu, ve sanene in na pe nepe yar lelaga na yum̃aena kiena ne re si Kristo poli narui.
Pol pisayu nap̃a Ntewa pio naga
11 Wolai lala amio vineu lala, popon nevisa meraravan van amiu, sane, lologena wo nene nap̃a nepisawal ke ne, naga pe visena re tai nap̃a yar la asiar poli. 12 In na pe nemla re lologena wo nene tan yaru tai poli ana pe yar re tai nap̃a pian inu e poli, peraga. Ana Yesu Kristo naga ga kipian ruru inu e lologena wo nene merarava.
13 Yum̃aena 8:3, 22:4,5, 26:9-11Nanene na sa nap̃a amiu amloge rui, nap̃a kiau namalena nanua sumo na sanape, e pogos nap̃a in na nesike loyum̃a e lotuena kiamimi imimi le Yu lala. E pogos nene, inu silaga sineu kari luen ga p̃egas nen nalelagaena lala kiena ne Yesu, ana nem̃ene la nekila kare la nap̃a pe nesitom la re nena poli, komin nap̃a sineun nesape nalelagaena la ne sanene na monar toko ga. 14 Yum̃aena 22:3E pogos nene, netaveve ruru p̃elaga na lotuena kiamimi imimi le Yu lala, taulu yaru tap̃ena lala nap̃a imimi na sane teras taaga, a inu nepuarar visena marua lala kiena ne repimimi la m̃arera, nap̃a kiamimi apua le Yu lala nap̃a asum̃a ataveve pimi tol nanagane.
15 Yum̃aena 9:3-6, 22:6-10, 26:13-18In na nekila ke sanene pano pano-o, ana inu pe nekilia re nap̃a nesape Ntewa naga pisaar inu p̃isi rui, e pogos nap̃a in na pe nepaeme re poli wa. Ana e ga e kiena lemamiena, naga pio inu vena neve kiena, a e kiena sitomena wo, 16 naga kila narina m̃alivin inu vena nevisu kilale naga, vena nevano nelologon Yesu nene van la nap̃a pe ape Yu re poli. E pogos nene, ana pe nepa re nepisu yaru tap̃ena la p̃as poli vena nela nakiliaena lap̃as tan la e lepas na lologena wo nene, 17 a pe nepa re m̃ena ma Yerusalem poli vena nevisu nalogena la nap̃a la ape nalogena sumon inu vena neviun tan la nevisave “?P̃isi na nelologon ya ne, pona nevisawal visena ve sanape?” Peraga, pe nepa nepiun re sanene poli, komin nap̃a Kristo naga kila make sur la nene merarava pan inu p̃isi rui. E pogos nene in na nemligan la vilaga, nepa perina pap̃isi e purvanua nap̃a Arepia, a siraunia nep̃asup̃e ke sina ga nepimi, nepa yalensilau ga nepa garu e pulkumali nap̃a Tam̃askas. 18 Yum̃aena 9:26-30Siraun nap̃a kas telu p̃arovia, ana e pogos ga nene narui in na nepa si ma Yerusalem. Nepa ma Yerusalem nepa nakaten Pita, ana pe nesu re nemio naga piavi poli, ana nesum̃a nemio tol ga legiena lualima taaga pa lima. 19 A e pogos nene, in na pe nepisu re m̃ena nalologena tap̃ena lap̃as poli, ana nepisu ga kiela nasumonena naga taaga, nap̃a Semes nap̃a naga wenla kieta Sup̃e. 20 Naga nene narui, ya nap̃a nepisa ke pan amiu, naga lelaga pe nepisokan re nene poli, Sup̃e kilia m̃aga.
21 Sanene narui, inu nesike ma Yerusalem pe piavi re nena poli, a siraun nene, inu nepa nemial vivia lepas lua nene nap̃a Seria amio Silisia, 22 kila sanene narui e pogos nene, nalelagaena lala nae ma e lepas tap̃ena nap̃a Yutea, amio kana pulkumali keviu nena nap̃a Yerusalem, la nene pe akilia ruru inu re poli wa. 23 La amloge ga ya nap̃a yaru la asum̃a apisa ke, nap̃a apisape, “Yaru nene nanua sumo naga m̃ene kare ita pap̃isi, naga sum̃a kilali nap̃a kila kare kieta nalelagaena, ana nanagane naga sum̃a mlologon ke m̃arera e kieta nalelagaena nene pap̃isi.” 24 A komin suri ne nanene, la asum̃a amieluar Ntewa keviu nap̃a naga pilon kiau malena sanene. Ana la asum̃a apisirilua kia kiena ne Sup̃e vanon inu.