1 Mndewa Mulungu kamulongela Musa, 2 “Walongele Waisilaili, ‘One mulume hebu muke kokwika chilaho malumu, chilaho cha kuwa Mnazili* Munhu yoyose yoika hakwe kwa ichimu cha Mndewa Mulungu, kwa chiebulaniya kotangigwa Mnazili. na kuika hakwe kwa ichimu cha Mndewa Mulungu, 3 kolondeka sekeyang'we divai hebu upele, sekeyang'we ching'waji chochose chitendigwe kwa zabibu, sekeyang'we mazi ya zabibu hebu sekeyaje zabibu zivile hebu zinyalile. 4 Siku zose za kuika hakwe kwake kolondeka sekeyaje chinhu chochose chitendigwe kwa mzabibu, mbeyu hebu makang'ha yake.

5 “ ‘Siku zose za chilaho chino cha kuika hakwe, sekeyawegule nyele zake mbaka siku zake za kuika hakwe kwa ichimu cha Mndewa Mulungu vondazifike, kezakuwa kela na kezazileka nyele zake zikule. 6 Siku zose zoyoika hakwe kwa ichimu cha Mndewa Mulungu, munhu iyo sekeyakwenhukile mtufi. 7 Hata one uhawa mtufi wa tati yake hebu mami yake hebu lumbu hebu mwali wake, muladi sekeyambule mwiko kwaviya kaika hakwe kwa ichimu cha Mulungu kwa chilaho. 8 Siku zose za kuika hakwe kwake kezakuwa kela kwa Mndewa Mulungu.

9 “ ‘One munhu yoyose yahadanganika bila kuugula habehi yake, ija kezakwambula mwiko, maabaho siku yesaba vondayasafyigwe kezawegula ditwi jake. 10 Siku yenane kezamgalila mkulu wa nhambiko huwa waidi hebu makinda ya nziwa maidi haulongozi wa hanhu ha kwingilila muna dihema da Mulungu. 11 Mkulu wa nhambiko kezalava imwe kwa ichimu cha nhambiko ya uhasanyi na imwenga kwa ichimu cha nhambiko ya kutimbula muladi kumtendela kuilumba kwaviya katenda uhasanyi kwa mtufi. Siku iyo kezaditenda ditwi jake jele. 12 Kezaika hakwe kaidi kwa ichimu cha Mndewa Mulungu. Siku za mwanduso hazizapetigwa kwaviya kambula mwiko muna zisiku zake za kuika hakwe. Kezalava mwanang'hondolo mulume wa mwaka umwe kuwa nhambiko ya ubananzi.

13 “ ‘Dino ni lagilizo kwa Mnazili. Vondazikomelezeke siku za kuika hakwe kwake, kezagaligwa hanhu ha kwingilila muna dihema da Mulungu. 14 Kezalava nhambiko yake kwa Mndewa Mulungu, mwanang'hondolo mulume wa mwaka umwe yelibule chilema kwa ichimu cha nhambiko ya kutimbula, zike da mwanang'hondolo dilibule chilema kwa ichimu cha nhambiko ya uhasanyi, bebelu da ng'hondolo dilibule chilema kwa ichimu cha nhambiko ya tindiwalo, 15 na chisege cha magate hayagumigwe lusu na maandazi ya usage unogile uhanganyigwe na mavuta, na magate masisili hayagumigwe lusu yabobodigwe mavuta hamwe na nhosa za usage na ching'waji.

16 “ ‘Mkulu wa nhambiko kezavigala vinhu ivo haulongozi wa Mndewa Mulungu na kulava nhambiko ya uhasanyi na nhambiko ya kutimbula. 17 Kezamgalila Mndewa Mulungu chisege cha magate hayagumigwe lusu, hamwe na mwanang'hondolo wa nhambiko ya tindiwalo na nhosa za usage na nhosa za ching'waji. 18 Hana ihanhu ha kwingilila muna dihema da Mulungu, Mnazili iyo kezawegula nyele zake na kuziguma muna umoto uli hasi ya nhambiko ya tindiwalo.

19 “ ‘Maabaho mkulu wa nhambiko kezasola yega da bebelu da ng'hondolo ijo dikimusigwe. Kezasola gate dilibule lusu muna ichisege na andazi, kezamwing'ha Mnazili ija, yahakomeleza kuwegula nyele ziyakalile nazo lusita lwa kuika hakwe kwake. 20 Maabaho mkulu wa nhambiko kezavinula uchanyha vinhu ivo fana nhambiko ya kwinuligwa uchanyha haulongozi wa Mndewa Mulungu. Vinhu vino vose vela kwa mkulu wa nhambiko, hamwe na chidali chochinuligwe uchanyha na chima chochilavigwe nhambiko. Yahakomelezeka yayo yose, Mnazili kodaha kung'wa divai.

21 “ ‘Ino ni ndagilizi kwa Mnazili, fana vichili chilaho chake. Mbali yahadaha kulava vinhu vimwenga, kolondeka kuzindilila ndagilizi ya Mnazili.’ ”

22 Mndewa Mulungu kamulongela Musa, 23 “Mulongele Haluni na wanage wa chilume wawatemele mate Waisilaili kwa mbuli zino,

27 “Ivo wezaditambula zina jangu kwa Waisilaili, na nizawatemela mate.”