1 Mndewa Mulungu kamulongela Musa, 2 “Walongele Waisilaili kuwa niye niiyo Mndewa Mulungu, Mulungu wenu. 3 Sekemutende fana viwotenda wanhu wokala muna iisi ya Misili kuja komukalile, hebu sekemutende fana viwotenda wanhu wa isi ya Kanaani konimgalani. Sekemutende fana wawo viwotenda. 4 Molondeka kwamha malagilizo yangu na kuzindilila ndagilizi zangu. Niye ni Mndewa Mulungu, Mulungu wenu. 5 Ivo yamheni malagilizo na ndagilizi zangu, mana munhu yotenda ivo kezakuwa mgima. Niye niiyo Mndewa Mulungu.

6 “Munhu yoyose sekeyambandame ndugu yake wa habehi. Niye niiyo Mndewa Mulungu. 7 Sekeumgume chinyala tati yako kwa kumbandama mami yako yakweleke. Sekeumgume chinyala kwaviya iyo ni mami yako. 8 Sekeumgume chinyala tati yako kwa kumbandama muke wake. 9 Sekeumbandame lumbu jako, mndele wa tati yako hebu mndele wa mami yako, yawe lumbu yelekigwe muna ikaye yenu hebu kumwenga. 10 Sekeumbandame mzukulu wako, mwana wa mwanago hebu wa mndele wako, uko ni kuiguma chinyala. 11 Sekeumbandame mndele yelekwe na mami yako wa kuvikila, kwaviya iyo ni lumbu jako iviya. 12 Sekeumbandame mami yako sangazi, lumbu wa tati yako, kwaviya iyo ni ndugu wa tati yako. 13 Sekeumbandame mwali wa mami yako, kwaviya iyo ni ndugu wa mami yako. 14 Sekeumgume chinyala sekulu wa tati yako kwa kumbandama muke wake, kwaviya iyo ni mami yako mkulu. 15 Sekeumbandame muke wa mwanago, kwaviya iyo ni mkoi wako wa chike. 16 Sekeumbandame muke wa sekulu wako hebu mdodo wako, uko ni kumguma chinyala sekulu wako hebu mdodo wako. 17 One uhambandama muke, uteganye muladi sekeumbandame mndele wake, hebu wazukulu zake. Wawo ni ndugu wa habehi, mbuli izo ni za chilozo. 18 Sekeumsole mwali wa muke wako kuno muke wako yang'hali mgima. Iyo izawatenda wagombe.

19 “Sekeumbandame muke yahawa muna zisiku zake. 20 Sekeumbandame muke wa miyago buleivo kwizaitenda mwenyewo wambule mwiko.

21 “Sekeumulave mwanago yoyose kuwa nhambiko kwa mulungu Moleki, kwaviya uhatenda ivo kodiliga zina jangu, niye Mulungu wako. Niye niiyo Mndewa Mulungu, Mulungu wako.

22 “Sekeumbandame mulume miyago fana muke. Mbuli iyo yotibusa. 23 Sekeumbandame mnyama muladi sekewambule mwiko, mulume yoyose hebu muke yoyose sekeyatende ivo, mana kutenda ivo ni chilozo.

24 “Sekeuitende wambule mwiko kwa kutenda mbuli izo, mana kwa mbuli izo nowawinga wanhu wa zisi zili habehi na mweye, kwaviya wawo wotenda ivo na kuitenda wambule mwiko. 25 Isi yawo yambula mwiko, niye niitagusa, nayo iwadeka wanhu wake. 26 Mbali mweye na nyambenyambe wokala kumwenu, molondeka mwamhe ndagilizi na malagilizo yangu, na hebu sekemutende mbuli izo zitibusa. 27 Mbuli izo zitibusa wazitenda wanhu wakalile kuna iisi ya Kanaani, nawo waitenda isi yambule mwiko. 28 Isi izawadekani one muhaitenda yambule mwiko, fana voiwadekile wanhu wa zisi zimwenga wowamulongoleleni kukala uko. 29 Munhu yoyose yotenda mbuli yoyose mwa mbuli zino zitibusa, kolondeka yabaguligwe mwa wanhu wake. 30 Ivo yamheni chigangamavu yose yonimulagilizeni, sekemutende chihendo chochose cha kutibusa chochitendigwe na waja wamulongoleleni kukala muna iisi ija. Sekemwambule mwiko kwa mbuli izo. Niye niiyo Mndewa Mulungu, Mulungu wenu.”