1 Mndewa Mulungu kamulongela Musa, 2 “Dino ni lagilizo kusonhela munhu yeli na utamu wa mbende muna isiku ya kusafyigwa kwake. Yahahona kezagaligwa kwa mkulu wa nhambiko. 3 Mkulu wa nhambiko kezahita kumulola munhu iyo kunze ya dilago. One utamu wake wa mbende uhona, 4 mkulu wa nhambiko kezawalongela wanhu wagale ndege waidi wagima weli hawambule mwiko, chihande cha mbiki wa mwelezi, sufu ndung'hu na tambi da hisopo kwa ichimu cha munhu iyo yondayasafyigwe. 5 Mkulu wa nhambiko kezalonga wamchinje ndege imwe uchanyha ya nongo inogile ili na mazi ya nzasa. 6 Maabaho kezamwamha ndege yeli mgima hamwe na chihande cha umbiki wa mwelezi, sufu ya langi ndung'hu na tambi da hisopo, nayo kezavabika ivo hamwe na ndege yeli mgima muna idamu ya ndege yachinjigwe. 7 Maabaho idamu ija kezammizila munhu iyo yosafyigwa utamu wa mbende miyanza saba, maabaho kezagong'onda kuwa munhu iyo kela. Ndege ija yeli mgima kezamuleka yahite kuna imigunda kunze ya lago. 8 Munhu iyo kezafuwa viwalo vake na kezawegula nyele zose na kezakoga, nayo kezakuwa kela. Maabaho kezabwela kuna dilago, mbali kezakala kunze ya hema jake kwa siku saba. 9 Kezawegula nyele zake zose zili mditwi na ndevu na ng'humbitu. Kezawegula nyele zose zili muna ulukuli lwake. Maabaho kezafuwa viwalo vake na kezakoga, nayo kezakwela.

10 “Siku yenane kezagala wanang'hondolo walume waidi welibule chilema na zike da ng'hondolo dimwe da mwaka umwe dilibule chilema na chilo nhatu za usage unogile wouhanganyigwe na mavuta kwa ichimu cha nhosa ya mhule, hamwe na mavuta selusi imwe ya lita. 11 Mkulu wa nhambiko yondayamsafye munhu iyo kezamgala haulongozi ha Mndewa Mulungu, habehi na hana ihanhu ha kwingilila muna dihema da Mulungu hamwe na vinhu viyagalile. 12 Mkulu wa nhambiko kezasola mwanang'hondolo mulume imwe na kumulava nhambiko ya ubananzi hamwe na mavuta selusi imwe ya lita. Maabaho kezavinula uchanyha kuwa chilaguso cha kumulavila Mndewa Mulungu. 13 Maabaho kezamchinja mwanang'hondolo iyo hana ulupango, hanhu howochinjiligwa wanyama wa nhambiko ya uhasanyi na nhambiko ya kutimbula. Nhambiko ino ya ubananzi fana viili nhambiko ya uhasanyi, ivo ni va mkulu wa nhambiko, ni nhambiko yelile ng'hani. 14 Mkulu wa nhambiko kezasola damu ya nhambiko ya ubananzi na kumuhaka munhu yosafyigwa muna digutwi jake da kulume na dole ng'hulu da mkono wake wa kulume na dole ng'hulu da mgulu wake wa kulume. 15 Maabaho mkulu wa nhambiko kezasola mavuta chidogo ya mzaituni na kuyaguma muna diganza da mkono wake wa kumoso, 16 maabaho kezavabika chidole cha mkono wake wa kulume muna yamavuta yayo yeli kuna ichiganza cha kumoso na kuyamiza miyanza saba haulongozi wa Mndewa Mulungu. 17 Mavuta yasigale muna diganza jake kezamuhaka munhu iyo yosafyigwa hasi ya gutwi jake da kulume na dole ng'hulu da mkono wake wa kulume na dole ng'hulu da mgulu wake wa kulume na haja heli na damu ya nhambiko ya ubananzi. 18 Mavuta yasigale kezamuhaka munhu iyo mditwi. Ivo mkulu wa nhambiko kezamtendela kuilumba haulongozi ha Mndewa Mulungu. 19 Mkulu wa nhambiko kezamulavila Mndewa Mulungu nhambiko ya uhasanyi na kumtendela kuilumba ija yosafyigwa, muladi kumsegezela kwambula mwiko kwake. Maabaho kezamchinja mwanang'hondolo wa nhambiko ya kutimbula. 20 Maabaho mkulu wa nhambiko kezamulavila nhambiko ya kutimbula na nhosa ya mhule mchanyha ya lupango. Mkulu wa nhambiko kezamtendela kuilumba, nayo kezakuwa kela.

21 “Mbali munhu iyo yahawa ngayengaye, hadaha kulava vinhu ivo, basi kezagala mwanang'hondolo kuwa nhambiko ya ubananzi yondayenuligwe uchanyha kuwa chilaguso cha kumulavila nhambiko, muladi kumtendela munhu iyo kuilumba. Iviya kezagala chilo imwe ya usage wouhanganyigwe na mavuta kwa ichimu cha nhosa ya mhule na mavuta selusi imwe ya lita. 22 Iviya kezagala huwa waidi hebu nziwa waidi fana viyodaha. Imwe kezakuwa wa nhambiko ya uhasanyi na imwenga wa nhambiko ya kutimbula. 23 Siku yenane kezamgalila mkulu wa nhambiko vinhu ivo haulongozi ha hanhu ha kwingilila muna dihema da Mulungu, kwa ichimu cha kusafyigwa kwake haulongozi ha Mndewa Mulungu. 24 Mkulu wa nhambiko kezamsola mwanang'hondolo mulume iyo wa nhambiko ya ubananzi hamwe na yaja yamavuta na kezavinula uchanyha kuwa chilaguso cha kuvilavila haulongozi ha Mndewa Mulungu. 25 Kezamchinja mwanang'hondolo mulume iyo wa nhambiko ya ubananzi. Mkulu wa nhambiko kezasola damu na kumuhaka munhu iyo yosafyigwa hasi ya gutwi jake da kulume na muna didole ng'hulu da mkono wake wa kulume na dole ng'hulu da mgulu wake wa kulume. 26 Mkulu wa nhambiko kezakwika mavuta yayo chidogo muna diganza jake da kumoso, 27 na kezayamiza kwa chidole cha mkono wake wa kulume miyanza saba haulongozi ha Mndewa Mulungu. 28 Mkulu wa nhambiko kezamuhaka munhu iyo yosafyigwa mavuta hasi ya gutwi jake da kulume na muna didole ng'hulu da mkono wake wa kulume na dole ng'hulu da mgulu wake wa kulume. Kezamuhaka hanhu haja hoyamuhakile damu ija ya nhambiko ya ubananzi. 29 Mavuta yasigale muna umkono wake kezamuhaka munhu iyo muna iditwi, muladi kumtendela kuilumba haulongozi ha Mndewa Mulungu. 30 Maabaho mkulu wa nhambiko kezalava huwa waidi hebu nziwa waidi fana munhu iyo viyodaha kugala, 31 huwa imwe wa nhambiko ya uhasanyi na imwenga wa nhambiko ya kutimbula. Iviya kezalava nhosa ya mhule, mkulu wa nhambiko kezamtendela kuilumba munhu iyo yosafyigwa haulongozi wa Mndewa Mulungu. 32 Yayo ni malagilizo kusonhela munhu yeli na utamu wa mbende yeli hadaha kulava nhambiko ziya za kuisafya.”

33 Mndewa Mulungu kawalongela Musa na Haluni, 34 “Vondamwingile muna iisi ya Kanaani yondanimwing'heni kuwa yenu, nizatenda chimvuguya muna ikaye, muna iisi yondaiwe yenu, 35 ivo mwenekaye kezahita kumulongela mkulu wa nhambiko, ‘Niwona chimvuguya muna ikaye yangu.’ 36 Mkulu wa nhambiko kezalagiliza chila chinhu chili umo chilavigwe kunze ya kaye yang'hali hanalola chimvuguya icho, muladi chila chinhu muna ikaye sekechigong'ondigwe kuwa chambula mwiko. Maabaho mkulu wa nhambiko kezakwingila kuilola kaye iyo. 37 Kezalola chimvuguya icho, one chihawoneka muna ing'huta na chitenda mabaka ya langi ndung'hu hebu ya mayani mabisi na kuwoneka kuwa chingila mgati ya ng'huta, 38 mkulu wa nhambiko kezalawa kunze na kuihinda kaye iyo kwa siku saba. 39 Siku yesaba kezabwela na kulola kaidi. One chimvuguya chihenela muna ing'huta ya kaye iyo, 40 mkulu wa nhambiko kezawalagiliza wasegeze mabwe yeli hanhu hana ichimvuguya na kuyasa hanhu hambule mwiko kunze ya bululu. 41 Chokaa ya ng'huta za mgati ya kaye iyo izakwanguligwa na chibugulu chake chizakwasigwa hanhu hambule mwiko kunze ya bululu. 42 Maabaho wezasola mabwe yamwenga na kuyeka hanhu haja hoyakalile mabwe ya uchanduso na kuhaka chokaa imwenga.

43 “One chimvuguya icho chihalawilila kaidi muna ikaye yahamala kusegezigwa yamabwe na kukwangula chokaa na kwika chokaa imwenga, 44 mkulu wa nhambiko kezahita na kulola. One chimvuguya chenela muna ikaye iyo, uwo ni utamu wa chimvuguya, kaye iyo yambula mwiko. 45 Kaye iyo yolondeka ibomoligwe, mabwe yake na mibiki yake na chokaa yake vigaligwe hanhu hambule mwiko kunze ya bululu. 46 Munhu yoyose yokwingila muna ikaye lusita ihindigwa, kezakwambula mwiko mbaka ichigulogulo. 47 Munhu yoyose yogona hebu yoja muna ikaye iyo, kolondeka yafuwe viwalo vake.

48 “One yahakomeleza kuilola goya kaye iyo, mkulu wa nhambiko kezawona chimvuguya hachenele viikomelezeke kuhakigwa chokaa, mkulu wa nhambiko kezagong'onda kuwa kaye iyo hayambule mwiko, kwaviya chimvuguya chimala. 49 Muladi kuisafya kaye iyo, mkulu wa nhambiko kezasola ndege waidi hamwe na chihande cha mbiki wa mwelezi, sufu ndung'hu na tambi da hisopo. 50 Kezamchinja ndege imwe uchanyha ya nongo ili na mazi ya nzasa. 51 Maabaho kezasola chihande cha mbiki wa mwelezi na hisopo na sufu ndung'hu na ndege yeli mgima, kezavivabika vose muna idamu ya ndege ija yachinjigwe na muna yamazi ya nzasa. Kezaimizila ikaye iyo miyanza saba. 52 Ivo kezaisafya ikaye iyo kwa damu ya ndege yafile na mazi ya nzasa na ndege imgima na chihande cha mbiki wa mwelezi na sufu ndung'hu na tambi da hisopo. 53 Maabaho ndege ija imgima kezamuleka yaguluke yahite kuna imigunda kunze ya bululu. Ivo niivo vondayaitendele kuilumba kaye iyo, nayo izakuwa hayambule mwiko.”

54 Yano ni malagilizo kusonhela utamu wa mbende, kwa uhele, 55 chimvuguya muna diwalo na muna ikaye, 56 lulumu hebu chilonda hebu baka, 57 muladi kulagusa chinhu chelile hebu chambula mwiko. Yayo ni malagilizo kusonhela utamu wa mbende na chimvuguya.