1 “Yano ni malagilizo kusonhela nhambiko ya ubananzi. Nhambiko iyo yela ng'hani. 2 Mnyama wa nhambiko ya ubananzi kezachinjigwa hanhu howochinjiligwa wanyama wa nhambiko ya kutimbula, damu yake izakwitiligwa banzi zose za lupango. 3 Mabambala yake yose ya mavuta yezalavigwa nhambiko, mabambala ya mkila na yaja yogubika utumbo, 4 na figo zake mbili na mabambala yake yeli mchigudi na hanhu hanogile ha ini. 5 Mkulu wa nhambiko kezavitimbula mchanyha ya lupango fana nhambiko iyolaviligwa Mndewa Mulungu kwa moto. Iyo ni nhambiko ya ubananzi. 6 Wotogoleligwa kuja nhambiko iyo ni walume wa lukolo lwa wakulu wa nhambiko muhala, mbali yolondeka kudiligwa hanhu helile. Nhambiko iyo yela ng'hani.

7 “Lagilizo ni dimwe kwa nhambiko ya ubananzi na nhambiko ya uhasanyi. Mkulu wa nhambiko yondayatende kuilumba niiyo yondayasole nyama ya nhambiko. 8 Mkulu wa nhambiko yolava nhambiko ya kutimbula ya munhu yoyose, kezasola mbende ya mnyama yoyalavigwe. 9 Chila nhosa ya mhule yokigwe hebu yambikigwe hebu ikanzingigwe, izakuwa ya mkulu wa nhambiko yoyoilava. 10 Mbali chila nhosa ya mhule iwe ihanganyigwa na mavuta hebu inyalile, izakuwa ya welesi wose wa Haluni, nawo wolondeka wagoliligwe sawasawa.

11 “Yano yayo malagilizo ya nhambiko za tindiwalo ziya munhu ziyodaha kumulavila Mndewa Mulungu. 12 One munhu yahalava nhambiko ya kumwing'ha hewela Mulungu, kezalava hamwe na nhambiko iyo magate hayagumigwe lusu yoyahanganyigwe na mavuta na magate masisili yoyahakigwe mavuta na maandazi ya usage unogile wouhanganyigwe na mavuta. 13 Hamwe na nhambiko yake iyo ya tindiwalo ya kumwing'ha hewela Mulungu, kezagala magate yoyagumigwe lusu. 14 Ivo kezamulavila Mndewa Mulungu gate dimwe kulawa chila nhosa. Magate yayo yezakuwa ya mkulu wa nhambiko yokwitila damu ya mnyama wa nhambiko ya tindiwalo kuna ulupango. 15 Nyama ya nhambiko iyo ya tindiwalo kwa kumwing'ha hewela Mndewa Mulungu izadigwa siku iyo voilavigwa, munhu halondeka kuleka nyama isigale mbaka imitondo.

16 “Mbali one nhambiko iyo ya tindiwalo ni ya chilaho hebu ya kulonda mwenyewo, izadigwa siku ija iyolava nhambiko yake. Yondaisigale izadigwa igolo yake. 17 Mbali nyama yoyose ya nhambiko iyo yondaisigale mbaka siku yetatu izasomigwa. 18 One nyama yoyose ya nhambiko ya tindiwalo ihadigwa siku yetatu, munhu yailavile hezatogoligwa, na nhambiko yake haizapetigwa. Nyama iyo yambula mwiko na munhu yoyose yondayaije kezatagusigwa. 19 Nyama yoidalisa chinhu chambule mwiko hailondeka kudigwa. Nyama iyo izalunguzigwa kwa moto.

“Munhu yoyose yelile kodaha kuja nyama. 20 Mbali munhu yoyose yambule mwiko yahaja nyama iyo ilavigwe nhambiko ya tindiwalo kwa Mndewa Mulungu, kezabaguligwa mwa wanhu wake. 21 Munhu yoyose yodalisa chinhu chochose chambule mwiko, chiwe chinhu chambule mwiko cha munhu hebu mnyama yambule mwiko hebu chinhu chochose cha kutibusa chambule mwiko, maabaho yahaja nyama ya nhambiko ya tindiwalo iyalaviligwe Mndewa Mulungu, munhu iyo kezabaguligwa mwa wanhu wake.”

22 Mndewa Mulungu kamulongela Musa, 23 “Walongele Waisilaili kuwa sekewaje mabambala ya mavuta ya ng'ombe hebu ya luti hebu ya ng'hondolo. 24 Mabambala ya mavuta ya mnyama yoyose yafile mwenyewo hebu mnyama yakomigwe na mnyama wa kumbago yodaha kwikigwa kwa kutendela vinhu vimwenga, mbali kweli sekemuyaje. 25 Munhu yoyose yahaja mabambala ya mavuta ya mnyama ija yoyalavigwe nhambiko kwa Mndewa Mulungu kwa moto, kezabaguligwa mwa wanhu wake. 26 Kaidi sekemuje damu yoyose, iwe ya ndege hebu ya mnyama hohose homukala. 27 Munhu yoyose yahaja damu kezabaguligwa mwa wanhu wake.”

28 Mndewa Mulungu kamulongela Musa, 29 “Walongele vino Waisilaili, ‘Munhu yoyose yahalava nhambiko ya tindiwalo, kezamgalila Mndewa Mulungu hanhu ha nhambiko iyo. 30 Kezamgalila Mndewa Mulungu kwa makono yake mwenyewo nhambiko yoilavigwe kwa moto. Kezagala mabambala ya mavuta yake hamwe na chidali, nawo wezavinula uchanyha kuwa chilaguso cha kumulavila Mndewa Mulungu nhambiko. 31 Mkulu wa nhambiko kezayatimbula mabambala yayo ya mavuta hana ulupango, mbali chidali chizakuwa cha Haluni na wanage wa chilume. 32 Chima cha kulume cha mnyama wa nhambiko zenu za tindiwalo, mwizamwing'ha mkulu wa nhambiko. 33 Chima icho chizakuwa cha mwelesi wa Haluni yeli mkulu wa nhambiko, yoyolava damu na mabambala ya mavuta ya nhambiko ya tindiwalo.’ ” 34 Mndewa Mulungu kawalagiliza Waisilaili wasole chidali chochinuligwe uchanyha kuwa chilaguso na chima chochilavigwe cha mnyama wa nhambiko zawo za tindiwalo, wamwing'he mkulu wa nhambiko Haluni na welesi wake iwe hanhu hawo siku zose. 35 Baho ni hanhu habaguligwe kwa ichimu cha Haluni na wanage kulawa muna zinhambiko ziyolaviligwa Mndewa Mulungu kwa moto, kwandusila siku dowekigwe kumsang'hanila Mndewa Mulungu fana wakulu wa nhambiko. 36 Viwekigwe kuwa wakulu wa nhambiko kwa kuhakigwa mavuta, Mndewa Mulungu kawalagiliza Waisilaili waweng'he hanhu baho ha nhambiko, iyo izakuwa yawo siku zose.

37 Yano ni malagilizo kusonhela nhambiko ya kutimbula na nhosa ya mhule na nhambiko ya uhasanyi na nhambiko ya ubananzi na nhambiko ya kwikigwa kwa sang'hano yelile na nhambiko za tindiwalo. 38 Mndewa Mulungu kamwing'ha Musa malagilizo yano kuna mulima wa Sinai siku ija iyawalagilize Waisilaili wamgalile nhambiko zawo kuja kuna ichuwala cha Sinai.