1 Bulahimu kasola muke imwenga, zina jake Ketula. 2 Muke iyo kamwelekela Bulahimu Zimulani na Yakishani na Medani na Midiani na Ishibaki na Shuwa. 3 Yakishani kamweleka Sheba na Dedani, wana wa Dedani ni Waashulu na Waletusi na Waleumi. 4 Wana wa Midiani wakala Efa na Efeli na Henoki na Abida na Elidawa. Wose wawo wakala welesi wa Ketula.

5 Bulahimu kamwing'ha Isaka vinhu vake vose, 6 mbali wana wa watumwa wake wakalile fana wanaake zake wowamwelekele wana kawagolela ndolendole viyakalile yang'hali hanadanganika, kawagala kuna iisi ya ulawilo wa zuwa, kutali na mwanage Isaka.

7 Bulahimu viyadanganike kakala na miyaka gana na malongo saba na tano. 8 Bulahimu kadanganika mulala ng'hani na kakala na deng'ho, kahita kuilumba na wasaho zake. 9 Wanage, Isaka na Ishumaili wamuwanda umo muna dituka da Makipela ulawilo wa zuwa wa Mamule mumgunda woukale wa Efiloni, mwana wa Sohali Muhiti. 10 Bulahimu na Sala muke wake wawandigwa kuna umgunda uja Bulahimu uyagulile kwa Wahiti. 11 Viifosile ifa ya Bulahimu, Mulungu kamtemela mate Isaka mwana wa Bulahimu, yoyokalile kakala habehi na disima da Beeli laha iloi.

12 Uno uwo ludongo lwa welesi wa Ishumaili mwana wa Bulahimu yoyelekigwe na Hajili Mmisili, yoyakalile msang'hani wa chike wa Sala. 13 Yano yayo yamazina ya wana wa Ishumaili kwa kusondelela kwelekigwa kwawo, chaudele wa Ishumaili ni Nebayoti na wamwenga ni Kedali na Abideli na Mibisamu 14 na Mishima na Duma na Masa 15 na Hadadi na Tema na Yetuli na Nafishi na Kedema. 16 Wano ni wana wa Ishumaili, wowakalile walangulizi wa makabila longo na waidi. Ukazi na vibululu vawo vimanyika kwa mazina yawo. 17 Ishumaili viyadanganike kakala na miyaka gana na malongo matatu na saba, kahita kuiting'hana na wasaho zake. 18 Welesi wa Ishumaili wakala hagati ya Havila na Shuli, habehi na Misili mwiinzila ya kuhita Ashulu. Wakala kwa kuigola na welesi umwenga za Bulahimu.

19 Uno ulo ludongo lwa welesi wa Isaka mwana wa Bulahimu. Bulahimu kamweleka Isaka 20 Isaka kakala na miyaka malongo mane viyamsolile Lebeka mwana wa Besueli, Mwalamu wa Padani Alamu. Lebeka kakala lumbu wa Labani. 21 Lebeka kakala halela, ivo Isaka kampula Mndewa Mulungu, nayo Mndewa Mulungu kamwidika chiyapulile, ivo Lebeka kapata wimo. 22 Wimo uwo ukala na mambasa, wana wawo waihuma muinda ya Lebeka. Nayo kalonga, “Chino choni chochinilawilila?” Ivo kahita kumuuza Mndewa Mulungu.

23 Mndewa Mulungu kamulongela Lebeka,

24 Lusita lwake lwa kuvumbula vilufikile, kavumbula mambasa. 25 Chaudele kelekigwa na mbende ndung'hu na lukuli lwake lose lukala fana walo dili na mazoya, ivo zina jake kamtanga Esau. 26 Wekaidi kavumbuka kuno kamhilila chisiginho cha Esau, ivo zina jake katangigwa Yakobo. Esau na Yakobo viwavumbuke Isaka kakala na miyaka malongo sita.

27 Wana wawo wakula. Esau kakala mkala, yoyolonda kukala muna ivyuwala, na Yakobo kakala yaholile yolonda kukala hakaye. 28 Mbali Isaka kamulonda Esau, kwaviya kanogelwa kuja wanyama woyawakomile Esau, mbali Lebeka kamulonda Yakobo.

29 Siku dimwe Yakobo kakala yokwambika ndiya, Esau keza kulawa kuukala kuno kana nzala, 30 ivo kamulongela Yakobo, “Nina nzala ng'hani, nokulamba uning'he ndiya iyo indung'hu.” Lekamana Esau katangigwa Edomu fambulo jake ndung'hu.

31 Yakobo kamwidika, “Nizakwing'ha one uhanichuuzila haki ya uchaudele wako.”

32 Esau kamulongela, “Vinoga! Nahabehi kudanganika. Haki yonifaya choni?”

33 Yakobo kamwidika, “Teng'hu ilahile kuwa kwizanichuluzila haki yako.”

Esau kailaha na kamwing'ha Yakobo haki yake. 34 Maabaho Yakobo kamwing'ha gate na nzugu. Kaja na kang'wa na maabaho kenuka na kasegela. Ivo niivo Esau viyaizehile haki yake ya uchaudele.