1 Walangulizi wa lukolo lwa Gileadi mwana wa Makili, mwana wa Manase mwana wa Yosefu, wakwenhuka habehi na kulonga haulongozi wa Musa na walangulizi wamwenga wa Waisilaili. 2 Wamulongela, “Mndewa Mulungu kamulagiliza mwenevale wangu uweng'he Waisilaili uhazi wawo wa isi kwa kutowa mhiya, iviya kalagilizigwa na Mndewa Mulungu yaweng'he wandele wa Selofehadi ndugu yetu uhazi wa tati yawo. 3 Mbali one wahasoligwa na wanhu wa makabila yamwenga ya Isilaili, uhazi wawo wizalawa kumwetu na kuhita kwa wanhu wa kabila diwosoligwa, ivo uhazi wetu wizahunguka. 4 Mwaka wa kukomboligwa wa Waisilaili vondaufike, uhazi wawo wizakongezigwa muna dikabila dowosoliligwa, ivo kabila jetu hadizapata uhazi uwo.”

5 Musa kawalagiliza Waisilaili fana Mndewa Mulungu viyalongile, “Wanhu wa kabila da Yosefu walonga ukweli. 6 Vino niivo viyolagiliza Mndewa Mulungu kusonhela wandele wa Selofehadi, ‘Wodaha kusoligwa na mulume yoyose iwomulonda, mbali wasoligwe muna dikabila jawo. 7 Habule uhazi wa Isilaili wondaulawe kulawa kabila dimwenga, chila Muisilaili kezakwamha uhazi wa kabila jake. 8 Mndele yoyose yeli na uhazi wa isi muna dikabila da Isilaili, kolondeka yasoligwe na munhu wa kabila jake, muladi chila Muisilaili yasole uhazi wa tati zake. 9 Ivo hakwizakuwa na uhazi wowose wondauhamizigwe kulawa kabila dimwe kuhita kabila dimwenga, mana chila kabila da Isilaili dizakwamha uhazi wake.’ ”

10 Wandele wa Selofehadi watenda fana viya Mndewa Mulungu viyamulagilize Musa. 11 Mala na Tiliza na Hogila na Milika na Nuhu, wandele wa Selofehadi, wasoligwa na wana wa ndugu za tati yawo. 12 Wasoligwa muna dikabila da Manase mwana wa Yosefu na uhazi wawo usigala muna dikabila da tati yawo.

13 Zino ni ndagilizi na malagilizo Mndewa Mulungu yoyaweng'hile Waisilaili kufosela Musa muna dibawe da Moabu habehi na lwanda lwa Yoludani uli malola na bululu da Yeliko.