1 Ino niiyo miyanza ya Waisilaili viwalawile muna iisi ya Misili kwa mabumbila yawo kwa kulangulizigwa na Musa na Haluni. 2 Musa kandika zina da chila hanhu howekile lago, lago mbaka lago, kwa lagilizo da Mndewa Mulungu. 3 Waisilaili wasegela muna dibululu da Lamasesi kwa ugalu ng'hani haulongozi wa Wamisili, siku ya longo na tano ya mwezi wa mwanduso, siku dimwe vidimalile Dugila da Pasaka. 4 Uko Wamisili wakala wowawanda wana wawo wa udele wose wa chilume woyawakomile Mndewa Mulungu na Mndewa Mulungu katagusa mbaka milungu yawo.

5 Waisilaili wasegela Lamesesi na weka lago jawo uko Sukosi. 6 Kulawa Sukosi weka lago jawo uko Esamu, mumgwazo wa chuwala. 7 Wasegela Esamu na wabwela Pihahilosi, ili ubanzi wa ulawilo wa zua wa Baali Sefoni, weka lago jawo kuulongozi wa Migidoli. 8 Wasegela Pihahilosi, wafosela hagati ya Bahali ya Shamu na kwingila muna ichuwala, wagenda siku nhatu muna ichuwala cha Esamu, weka lago jawo uko Mala. 9 Wasegela Mala na wahita Elimu, uko Elimu kukala na nzasa za mazi longo na mbili na mitende malongo saba, weka lago jawo uko.

10 Wasegela Elimu na weka lago jawo habehi na Bahali ya Shamu. 11 Wasegela habehi na Bahali ya Shamu na weka lago jawo kuna ichuwala cha Sini. 12 Wasegela muna ichuwala cha Sini na weka lago jawo uko Dofuka. 13 Wasegela Dofuka na weka lago jawo uko Alushi. 14 Wasegela Alushi na weka lago jawo uko Lefidimu, uko kukala kwabule mazi ya kung'wa.

15 Wasegela Lefidimu na weka lago jawo muna ichuwala cha Sinai. 16 Wasegela muna ichuwala cha Sinai na weka lago jawo uko Kibilosi Hataava. 17 Wasegela Kibilosi Hataava na weka lago jawo uko Haselosi.

18 Wasegela Haselosi na weka lago jawo uko Lisima. 19 Wasegela Lisima na weka lago jawo uko Limoni Pelezi, 20 Wasegela Limoni Pelezi na weka lago jawo uko Libina. 21 Wasegela Libina na weka lago jawo uko Lisa. 22 Wasegela Lisa na weka lago jawo uko Kehelasa. 23 Wasegela Kehelasa na weka lago jawo kuna mulima wa Shefeli. 24 Wasegela kuna mulima wa Shefeli na weka lago jawo uko Halada. 25 Wasegela Halada na weka lago jawo uko Makelosi. 26 Wasegela Makelosi na weka lago jawo uko Tahasi. 27 Wasegela Tahasi na weka lago jawo uko Tela. 28 Wasegela Tela na weka lago jawo uko Mitika. 29 Wasegela Mitika na weka lago jawo uko Hashimona. 30 Wasegela Hashimona na weka lago jawo uko Moselosi. 31 Wasegela Moselosi na weka lago jawo uko Bene Yaakani. 32 Wasegela Bene Yaakani na weka lago jawo uko Holi Hagidigadi. 33 Wasegela Holi Hagidigadi na weka lago jawo uko Yotibasa. 34 Wasegela Yotibasa na weka lago jawo uko Abilona. 35 Wasegela Abilona na weka lago jawo uko Esioni Gebeli. 36 Wasegela Esioni Gebeli na weka lago jawo uko Kadeshi, kuna ichuwala cha Sini. 37 Wasegela Kadeshi na weka lago jawo kuna mulima wa Holi, muna imhaka ya isi ya Edomu. 38 Mkulu wa nhambiko Haluni kakwela kuna mulima wa Holi kwa ndagilizi ya Mndewa Mulungu, uko kadanganika muna isiku ya mwanduso ya mwezi wetano, muna umwaka wa malongo mane, kwandusila Waisilaili viwalawile Misili. 39 Haluni viyadanganike kuna mulima wa Holi kakala na miyaka 123.

40 Mkanaani, mfalume wa Aladi yoyakalile ubanzi wa kusi wa isi ya Kanaani, kahulika kuwa Waisilaili wokwiza.

41 Waisilaili wasegela kuna umulima wa Holi na weka lago jawo uko Salimona. 42 Wasegela Salimona na weka lago jawo uko Punoni. 43 Wasegela Punoni na weka lago jawo uko Obosi. 44 Wasegela Obosi na weka lago jawo uko Iye Abalimu, muna imhaka ya Moabu. 45 Wasegela Iye Abalimu na weka lago jawo uko Diboni Gadi. 46 Wasegela Diboni Gadi na weka lago jawo uko Alimoni Dibilasaimu. 47 Wasegela Alimoni Dibilasaimu na weka lago jawo kuna imilima ya Abalimu, habehi na mulima wa Nebo. 48 Wasegela kuna imilima ya Abalimu na weka lago jawo kuna yamabawe ya Moabu habehi na lwanda lwa Yoludani uli malola na bululu da Yeliko. 49 Kuja kuna yamabawe ya Moabu weka lago jawo mumgwazo wa lwanda lwa Yoludani, kwandusila Besi Yeshimosi mbaka Abeli Shitimu.

50 Mndewa Mulungu kamulongela Musa kuna dibawe da Moabu habehi na lwanda lwa Yoludani uli malola na bululu da Yeliko, 51 “Walongele Waisilaili, ‘Vondamuloke ulwanda lwa Yoludani kuhita kuna iisi ya Kanaani, 52 molondeka kuwawinga wakaya wose wa isi iyo kumwenu. Mwizazinanga nyang'hiti zawo zose za mabwe na za chuma cha kuhonda na kuhabomola chila hanhu hawo ha kutambikila. 53 Mwizaisola isi iyo iwe yenu na kukala umo, kwaviya niye nimwing'hani iwe yenu. 54 Mwizaigola isi iyo kwa mhiya kuilinga na kaye zenu, kabila kulu wapate hanhu hakulu na kabila dodo wapate hanhu hadodo. 55 Mbali one hamuwawingile wakaya wa isi iyo, waja wondawasigale wezakuwa fana mabale muna yameso yenu hebu miwa chila ubanzi na wezamgazani. 56 Maabaho nizamtendelani fana vonigesile kuwatendela wawo.’ ”