2 TESALINAIKA
Pol pepa muno namba 2 bogl Tesalonaika yomba tongwa
Ka mongo yegl ende okuna ongwa
Mambuno yeglmere pangwa: Krais aglke ende ikine unambuka engemo i sragl taragl plau dinambedi Tesalonaika taun God yombamo meglkwa ye nomano pond pirkwa. Yomba tau plau dikondume dingwa. Yeglpre ana Pol ya Sailas te Timoti, eremogl yomba i nomano wakai tendre dikun ere tena pre pepa i bogl teingwa.
Pol eremogl enge i ta ukrume dungwa, komnaiye kana yaglambu merkinde ye engenge beglmbi ana mambuno kinde kaima wu pene pi gigle kaima dinambuka. Te lo ka sendungwa yagl suwarata wu pene pi, ana yaglkumba ere Krais tenambuka.
Te yungu ombuno ye pirngino mina giglendi mogl ana yumbun i prapra i-wan moraglmedi dungwa. Ye yegl prukwa iwe, yomba prapra yombuglo ertre yene sutno wakai mogltre ana ye yene ya kongun akiye erikwa yomba erimere yegl yomba i eraglme dungwa pre ye yoko moglkre konguno ta panambuka i ere-yondo. Te ye kongun eraglkwa i yomburo dokokre, te yomba ta akeple dinaglkwa ipre ama yomburo dokokraglme dungwa.
1
Pol pepa muno namba 2 bogl Tesalonaika God yombama tongwa
1 Ene Tesalonaika God yombama Neno God ya Yaglkande Yesus Krais ye mina meglkwa yombamo. No Pol ya Sailas te Timoti no pepa muno i bogl ene tomga.
2 God Neno ya Yaglkande Yesus Krais ye wakaino ya te mambunomo pokndungwa i ene mina pandigl tenambriwo.
Pol kamange ere God diwakai yongwa
3 Angrima wagle, ene pre no God engenge diwakai yei tenamga i mambuno wakai pangwa. Sraglpre ene pirngi dingwa i yake wu kande kande ongo te ene yombano mina kanwakai yengwa mambuno i ama yake wu kande pond kaima ongwa. 4 Te mambuno erikwa ipre ana God yombama meglmara no ene dembinosi mounga. Te yaglkumba ene eresigo pinuglone wanmogl ana pirngino gugl sikruko giglendi wanmeglkwa i ama no boglo kugltre ene di imitna ende wanmounga.
Mambuno du-wakai mina God nono yumbu sinambuka
5 Ene mambuno yegl erimara i mina, nono kanumga mem i God mambuno du keunde orkwa ana yumbu sinambuka kuno pamere erambuka. Ene giu geglkwa i God ere endinan ene ye kingdomo mina suna wakai moraglkwa. 6 Sraglpre, God ye taragl du-wakai pamere erambuka, ana yomba ene erekinde ereteimbi God ama ye erekinde ere tenambuka. 7 Ana okuwo Yesus ya angelomo gigle dingwa wagle bogl heven kondo te donga bauglo bogl ende atne ombuno dinaglkwa enge i ene yumbun ingwa pre God ere endinan wakai meglmbi te no ama yegl wakai moramga. 8 Yegl ere yomba God mambunomo kiure meglkwa ya nono Yaglkandeno Yesus ye kamo mambuno wakai pinande erekrikwa yomba ye punduwo kinde bagl ikine ende tenambuka. 9 Yomba kinde topono waule kinde aimande moraglkwa. Ye Yaglkande mambuglo mina ya ambuglangemo kande mina mogl eglke ende ana ye aimande kamun wu kinde pi moraglkwa. 10 Enge kande igle mina Yaglkande Yesus unambuka. Ana God wedi pirngi dingwa yomba holi ye gun pond yei ye kangiye ake mitna endimbi ana ene ama ye bogl akiye gun yeinaglkwa sraglpre God kamo no ene ditomga ene pirngi dingwa pre yegl eraglkwa.
Tesalonaika God yombama giglendi moraglkwa pre ye kamange ere God teingwa
11 Taragl plau dinambuka i no nomano mina pango ana ene pre no kamange engenge ounga. No yegl ounga i God ene akeple dinan wakai yene mogltre ana ene mambuno wakai eraglkwa pre ye aglendi yumara i eraglkwa. Te God siriye bogl tenan ene mambuno wakai eramnedi munduno pangwa i eraglkwa. Ana ene pirngino i nomano ake nusinan mambuno ipre ere poriya sinaglkwa. 12 No ama kamange yegl ounga, mambuno yegl erimbi ana ene bogl akiye nono Yaglkandeno Yesus Krais kangiye wu kande enambuka. Nono Godno ya te Yaglkandeno Yesus Krais ye wakaino mina sragl i yegl erambuka.