1 Kaman yumob! Wi garra preisim YAWEI det trubala God.

Wi garra sing gudbinjiwei langa God hu oldei seibum wi en maindimbat wi jis laiga bigwan ston kipum wi seifwan.

2 Wi garra kaman langa im en tok theingkyu,

en preisim im garram ola hepiwan song.

3 YAWEI im det brabli haibalawan God.

Im haibala bos langa ola najalot drimin.

4 Im jidan bos blanga dijan wel.

Im bos blanga ebrijing brom ola dipwan keib raidap langa ola haiwan hil.

5 Im bos blanga solwoda en dijan graun weya imbin meigim imselp.

6 Kaman yumob! Wi garra nildan langa im en weship im.

Wi garra nildan langa YAWEI det trubalawan God hubin meigim wi.

7 Im na wi God,

en wi na detlot pipul im oldei lukaftumbat,

en wi jis laik ola ship blanga im weya im oldei gibit ebrijing.

Irrim tudei wanim YAWEI tok,

8 “Nomo jadimap miselp hat wulijim yumob femili olabat bin dum bifo langa det kantri Meriba, en det taim langa Mesa det deset kantri.✡ Hib 3:15; 4:7

9 Deya na deibin oldei grambulbat en aibin gitwail langa olabat.

Dei nomo bin jinggabat wanim aibin oldei dumbat blanga olabat.✡ Eksa 17:1-7; Nam 20:2-13

10 Blanga 40 yiya ai nomo bin gudbinji langa detlot pipul.

Aibin tok, ‘Olabat nomo garram eni rispek blanga mi.

Olabat nomo teiknodis langa ol main lowa.’

11 Aibin gitwail en aibin meigim dijan strongwan pramis langa olabat,

‘Aibin wandi gibit yumob det kantri blanga jidan gudbinjiwei, bat najing. Yumob kaan go deya na.’ ”✡ Nam 14:20-23; Dyud 1:34-36; 12:9,10; Hib 3:7-11; 4:3-5