41
Dijan preya blanga sikbala
Preya blanga Deibid.
1 Ol detlot pipul hu album ola powan pipul, olabat na garra jidan gudbinjiwei.
YAWEI garra album olabat wen olabat abum trabul.
2 YAWEI garra maindim olabat en nomo larram enijing hepin langa olabat.
Im garra meigim olabat jidan gudbinjiwei langa det kantri.
Im kaan larram detlot enami teikoba det kantri.
3 YAWEI garra album olabat wen dei sik,
en meigim olabat jidan gudwan igin.
4 Aibin tok, “Aibin dum nogudwan ting langa yu, YAWEI.
Yu sori langa mi en meigim mi gudwan.”
5 Main enami olabat tokabat mi krulbalawei.
Dei wandim mi blanga dai en fogedabat mi.
6 Detlot pipul hu kaman blanga luk langa mi, olabat nomo trubala.
Dei go en dalimbat stori blanga mi ebriweya.
7 Ol detlot pipul hu nomo laigim mi, dei tok gija kwaitbalawei blanga mi.
Dei reken mi sikwan dumaji aibin dum nogudbala ting.
8 Dei tok, “Im brabli sikwan.
Im kaan gidap brom im sweig enimo.”
9 En main brabli gudfren weya aibin trastim brabliwei,
en weya minbala bin sherimbat gija daga,
im nomo laigim mi na.✡ Meth 26:23; Mak 14:20; Luk 22:21; Jon 13:18
10 Yu sori langa mi, YAWEI, en meigim main bodi gudwan igin,
en ai garra peiyimbek main enami olabat.
11 Dumaji main enami olabat kaan winoba langa mi,
ai garra sabi yu gudbinji langa mi.
12 Yu garra album mi, dumaji mi dum ola rait ting.
Yu garra jidan gulijap langa mi olagijawan.
13 Preisim YAWEI, det God blanga Isreil!
Preisim im tudei en olagijawan du.
Yuwai! Trubala!✡ Saam 106:48