1 YAWEI, mi preisim yu dumaji yubin seibum mi.

Im jis laik yubin lidimap mi brom det dakwan pleis.

Yubin kipumwei main enami olabat brom tokabat nogudbalawei blanga mi.

2 Aibin jingat langa yu blanga album mi, YAWEI main God,

en yubin meigim mi gudbala brom sikbala.

3 Yubin kipumwei mi brom det greibyad.

Aibin gulijap dai, bat yubin gibitbek mi main laif igin.

4 Sing ola preis song langa YAWEI, ol yumob hu jidan trubalawei langa im.

Jinggabat wanim det holiwan God bin dum en tok theingkyu langa im.

5 Oni lilbit taim im gitwail, bat im kainwan filing jidan olagijawan na.

Nogudwan filing gin kaman naitaim, bat ailibala det gudwan filing kaman.

6 Aibin filim miselp seif en aibin tok miselp,

“Najing kaan bidim mi.”

7 YAWEI, yubin gud langa mi.

Yubin maindimbat mi jis laik seifwan haus ontop langa bigwan hil.

Bat wen yubin haidim miselp brom mi, aibin bradin na.

8 Aibin jingat langa yu YAWEI.

Aibin jingat brabliwei langa yu blanga album mi.

9 Aibin tok, “Wanim yu reken? Eni gudbala ting garra hepin if mi dai en godan langa greib? Najing!

Ola dedbala pipul gin preisim yu? Najing!

Ola boun gin toktok blanga ola gudwan ting weya yu oldei dumbat? Najing!

10 Yu lisin langa mi YAWEI en yu sori langa mi.

Yu album mi YAWEI!”

11 Yubin tjeinjim main nogudwan filing en yubin meigim mi dens brabli gudbinjiwei.

Yubin deigimwei main nogudwan filing en yubin meigim mi jidan brabli hepiwan na.

12 Wal ai kaan jidan kwaitbala.

Ai garra sing song blanga preisim yu.

YAWEI, yu main God.

Ai garra gibit yu theingks olagijawan.