1 Wal det sabibala bin kipgon tok, “Main san, yu lisin en teiknodis langa main sabibalawei en brabli gudwan wed, 2 wulijim yu garra sabi hau blanga jidan gudwei, en enijing yu tok garra shoum najalot pipul yu sabibala. 3 Maitbi naja men waif mait tok langa yu garram brabli switbala wed jis laik shugabeig. Im switinimap yu brabliwei en im kiskisbat yu en meigim yu wandim im, 4 bat bambai na im garra libum yu en meigim yu jidan brabli nogudbinji garram loda pein. 5 Det gel garra lidim yu blanga dai. Det wei blanga im garra go streit langa greibyad. 6 Im nomo jinggabat blanga im laif, en im nomo sabi det wei weya im oldei bulurrumbat, im rong.

7 “Wal main san, yu lisin langa mi na. Yu nomo tjakidawei detlot wed weya aibin oldei dalimbat yu. 8 Yu kaan go gulijap langa detkain wuman. Yu nomo go gulijap langa det dowa langa im haus. 9 If yu go deya wal najalot pipul garra rabishim yu en olabat garra gedim det rispek yubin abum basdam, en maitbi det hasbinwan garra kilim yu ded wen yu stil yangbala. 10 En afta ola streinja pipul garra gajim yu ebrijing, nomeda yubin dum adwek blanga gajim detlot enijing, bat dei garra deigidawei detlot ebrijing na, 11 en yu garra kraikrai en abumbat loda pein en yu bodi garra binijap. 12 En yu garra tok, ‘Wotfo ai nomo bin len? Wotfo ai nomo bin larram det sambodi dalimbat mi blanga dum rait ting? 13 Ai nomo bin lisin langa ol main titja. Ai nomo bin teiknodis langa olabat. 14 En mi jidan lida langa olabat en mi sheim miselp na.’

15 “Wal yu garra laigim yu waif brabliwei en yu garra jidan trubalawei langa im. 16 Wal im brabli nogud blanga yu wen yu faindim biginini brom najawan gel. 17 Wen yu biginini olabat growap, yu wandim olabat blanga album yu, nomo detlot streinja pipul. 18 Yu garra jidan brabli hepiwan garram yu waif en jidan brabli gudbinjiwei garram im du. 19 Im brabli purdiwan gel jis laik det reinbo. Im laigim yu brabliwei, en larram im meigim yu jidan brabli hepiwan en im na garra oldei holdim yu gulijap. 20 Main boi, wotfo yu wandim gibit miselp langa najawan gel? Wotfo yu wandim silipsilipbat garram naja men waif? 21 YAWEI det trubala God oldei luk ebrijing yu dumbat en im oldei lukinat weya yu oldei go. 22 Det nogudbalawei blanga nogudbala pipul im laiga trep. Det nogudbalawei blanga olabat garra taiyimap olabat wulijim roup. 23 Olabat garra dai, dumaji olabat nomo bin sabi hau blanga jidan gudbalawei. Olabat nogudbalawei garra deigim olabat langa greib.”