1 Wal aibin kipgon tok, “Wal dijan na det mesij blanga Jerusalem. Wanim bin hepin iya? Wotfo yumob abumbat padi ontop langa det fletwan ruf langa yumob haus? 2 Det taun blanga yumob im brabli noisiwan brom detlot pipul hu jinginatbat brabli adbala.

“En detlot hubin dai deya, dei nomo bin gitkil langa det wo. 3 Detlot lida blanga yumob bin ol ranawei. Dei nomo bin faitbek, najing. Nomeda deibin ol ranawei, bat stil detlot solja bin gajim olabat.

4 “Wal yumob libum mi iya miselp wulijim ai garra kraikraibat nomo lilbit. Yumob nomo trai en meigim mi gudbinji, dumaji main pipul olabat bin ol binijap. 5 Wal YAWEI det brabli boswan God bin pikimat dijan taim na blanga det brabli nogudbala ting blanga hepin langa Jerusalem. Detlot enamimob bin nakimdan ola wol blanga Jerusalem, en ola pipul nomo sabi wanim blanga dum, en langa det bigwan hil kantri pipul irrimbat olabat jinginat adbala blanga sambodi blanga albumbat olabat.

6 “Wal detlot solja brom Elam en brom Kira bin kaman garram hosis en bagi en deibin abum olabat shild redibala du. 7 Ola solja bin jidan oloba langa detlot gudwan kantri, en olabat bin jidan bigismob redibala blanga fait langa detlot geit blanga Jerusalem. 8 Ol detlot strongbala ting weya yumob bin oldei trastimbat, dei kaan album yumob na.

“Wen tharran bin hepin yumob bin gajim detlot bigbala naif en bo en erro brom yumob stowa rum. 9-11 Yumob bin luk detlot hol langa det atsaidwan wol blanga Jerusalem, en yumob bin pulumdan sambala breikinwan haus blanga gajim sambala ston blanga meigim det wol gudwei igin. En yumob bin bildimap pleis blanga pudum woda brom det olwan wodahol. Bat yumob nomo bin askim God blanga album yumob blanga ol dislot ting. Im na bin meigim dijan plen blanga Jerusalem longtaim. 12 Wen dijan ting bin hepin YAWEI det brabli boswan God bin dalim yumob blanga kraikraibat en imbin dalim yumob blanga sheibum yumob hed en jidan soribalawei blanga yumob nogudbalawei en blanga werrimon sekbeigwan klos blanga shoum yumob rili sori. 13 Bat yumob nomo bin teiknodis. Yumob bin kipgon densdens en pleiplei myusik en yumob bin abumbat padi garram bif en dringgimbat wain en yumob bin tok, ‘Wi garra dagadagatbat en dringgimbat en abumbat gudbala taim dumaji maitbi tumorro wi garra dai.’✡ 1 Karin 15:32

14 “Wal YAWEI det brabli boswan God bin dalim mi dijan pramis, ‘Ai kaan neba larramgo fri olabat blanga dijan nogudbala ting raidap olabat garra dai. Mi na YAWEI det brabli boswan God gibit yu dijan mesij.’ ”

15 “Wal YAWEI det brabli boswan God bin gibit mi mesij blanga dalim det men gulum Shebna, det gabman bos blanga det speshalwan haus blanga det king. 16 YAWEI bin tok, ‘Hu yu reken yu? Yubin meigim brabli purdiwan greibyad blanga yu ronselp langa det rok weya ola dedbala king oldei jidan. 17 Yu reken yu brabli strongbala men indit? Wal ai garra gajim yu en tjakidawei yu. 18 En ai garra tjakidawei yu langa najawan kantri. Deya na yu garra dai en deya na blanga yu ola brabli gudwan bagi garra jidanbat breikapwan du. Yu nomo eni gud langa yu bos, najing. 19 Ai garra andimwei yu brom det haibala wek.

20-21 “ ‘Wal langa det taim na ai garra gibit detlot speshalwan klos en det speshalwan wek en pawa blanga yu langa main wekinmen neim Eliyakim, det san blanga Hilkaiya. En Eliyakim im garra jidan det dediwan blanga ola Jerusalem pipul en blanga det king femili brom Juda du. 22 Ai garra gibit im det ki blanga det haus blanga Deibid, en im garra jidan haibala bos langa det speshalwan haus blanga det king. En eni dowa im garra opinimap, nobodi kaan neba jadimap im, en wen im jadimap eni dowa nobodi kaan neba opinim igin.✡ Reb 3:7 23 Im garra jidan brabli trubala langa im femili neim, dumaji ai garra pudum im langa det pleis wulijim det peig weya holdimap det tent.

24 “ ‘Im garra bos langa ebrijing en im garra jidan brabli trubala langa ol im femilimob en im garra lukaftumbat olabat gudwei jis laik det peig weya oldei holdimap det kap en pleit. 25 Wal langa det taim na ai garra pulumat det peig weya jidan brabli strongbala. Im garra kamat en buldan langa graun en ebrijing weya joinap mijamet garram det peig garra ol binijap.’ ” Wal lagijat na YAWEI bin tok.