15
Mosis en ola pipul bin preisim God
1 Brom deya Mosis en ola Isreil pipul bin sing dijan nyuwan song blanga preisim YAWEI det trubala God.
“Wi garra singim song langa YAWEI,
dumaji im haibala,
en im garram pawa detmatj.
Imbin tjakam ola hos en ola men langa solwoda.✡ Reb 15:3
2 YAWEI im strongbala,
en im oldei lukaftumbat wi.
Im na bin seibum wi.
Im na det God blanga wi,
en wi garra preisim im.
Im na det God blanga ola dedi blanga wi,
en wi garra tok gudbalawei blanga im.✡ Saam 118:14; Aisai 12:2
3 Im oldei win wen im fait.
En im neim YAWEI.
4 Imbin tjakam ola solja blanga det king langa solwoda,
en imbin tjakam ola bagi blanga olabat langa solwoda du.
Ola ami bin draunt.
Ola gudwan solja bin binij langa det Redsi.
5 Det dipwan solwoda bin gaburrumap olabat,
en deibin godan raitdan langa det bodam jis laiga ston.
6 YAWEI, yu garram detmatj pawa langa yu bingga.
Isibala yu gin binijimap ola enami blanga yu garram det pawa.
7 Yu brabli strongbala,
en yu brabli haibala du,
en yubin binijimap detlot Ijip pipul hubin fait langa yu.
Wen yubin gitwail langa olabat,
yubin binijimap olabat jis laiga faiya weya oldei barnimap draiwan gras.
8 Yubin jandim win langa det solwoda,
en det solwoda bin kadimat miselp.
Det solwoda bin jandap jis laik dubala bigwan wol,
en det graun bin go brabli adwan.
9 Melabat enami bin tok,
‘Wi garra ranimap en gajimap olabat,
en wi garra pulumat olabat ola enijing.
Ebrijing wi wandim wi garra deigimbek garram wi,
en wi garra deigimat wi naif en binijimap olabat.’
Lagijat na melabat enami bin tok.
10 Bat yu, YAWEI,
yubin jandim det win,
en det solwoda bin gaburrumap olabat.
Deibin godan jis laiga hebiwan ston insaid langa det dipwan solwoda.
11 YAWEI, yu na det trubala God,
en nomo eni drimin jidan seim laik yu.
Yu brabli difrin brom enibodi.
Nobodi garram pawa seim laik yu.
Nobodi kaan dum eni klebabala ting seim laik yu.
Nobodi kaan dum bigbala wek seim laik yu.
12 Yu jis lidimap yu bingga,
en det graun julurumap ola enami blanga yu.
13 Yubin kipum det pramis blanga yu,
en yubin seibum melabat.
Yubin bringimap melabat iya,
dumaji yu laigim melabat.
Garram yu pawa yu garra deigim melabat langa det kantri weya yubin pikimat blanga melabat.
14 Wen ola najalot pipul garra irrim dis stori,
dei garra bradin brabliwei.
Wen ola Filastain pipul garra irrim dis stori,
dei garra bradin brabliwei.
15 En ola bosmen langa det kantri gulum Idam,
dei garra bradin du.
En ola strongbala men langa det kantri gulum Moweb,
dei garra bradin du.
En ola pipul langa det kantri gulum Keinan,
dei garra bradin du,
en dei garra ranawei.
16 YAWEI, wen ol detlot pipul irrim yu brabli strongbala,
dei garra bradin detmatj,
en dei kaan dum enijing raidap melabat gopas langa olabat,
dumaji yu na bin deigidawei melabat brom det king.
17 Wal yu garra deigim melabat langa det kantri,
en yu garra pudum melabat langa det hil blanga yu.
YAWEI, melabat garra jidan langa det pleis weya yubin pikimat blanga yu kemp.
Bos, melabat garra jidan langa det Serramoni Pleis weya yubin meigim garram yu ronwan bingga.
18 YAWEI, yu na det wanbala trubala God,
en yu garra jidan haibala king olagijawan.”
Lagijat na ola pipul bin sing, 19 afta detlot Isreil pipul bin wok thru langa det Redsi langa draiwan graun. Ola Ijip solja en hosis en bagi bin bulurrum olabat langa det Redsi, bat YAWEI bin draundim olabat garram det solwoda. 20 En afta det sista blanga Mosis en Eran neim Miriyam hubin speshalwan mesinja blanga God bin gedim wan lilwan dram gulum tembarin, en ola gel bin bulurrum im garram olabat tembarin, en deibin densdens, 21 en Miriyam bin sing dijan song.
“Wi garra singim song langa YAWEI det trubala God,
dumaji im haibala,
en im garram pawa detmatj.
Imbin tjakam ola hos en ola men langa solwoda.”
Bitawan woda bin meigim miselp gudwan woda
22 Brom deya Mosis en detlot pipul bin gowei brom det Redsi, en deibin go langa det deset kantri gulum Shuya. Thrideis deibin wok langa det deset kantri, en dei nomo bin faindim eni woda, 23 en afta deibin kamat langa wan pleis weya deibin faindim woda. Bat det woda bin brabli bitawan, en dei nomo bin dringgim, en deibin gulum det pleis Mara, dumaji det woda bin oldei jidan bitawan.
24 Wal ola pipul bin gitwail langa Mosis na, en deibin tok, “Wanim melabat garra dringgim?”
25 Wal Mosis bin jingat langa YAWEI, en YAWEI bin shoum im wan lilwan wadi deya, en Mosis bin gajim det wadi, en imbin tjakam langa det woda, en det woda bin meigim miselp gudwan blanga dringgim.
Wal deya na langa det pleis YAWEI bin testim detlot Isreil pipul, en imbin gibit olabat dislot lowa na. 26 Imbin tok, “If yumob lisin langa mi brabliwei, en yumob dum wanim im rait langa mi, en yumob bulurrum ol dislot lowa main, wal ai kaan panishim yumob garram detlot seimwan trabul weya aibin panishim detlot Ijip pipul. Wal yumob garra duwit langa mi, dumaji mi na YAWEI, en mi na oldei meigim yumob gudbala.” Lagijat na YAWEI bin tok.
27 Brom deya detlot Isreil pipul bin kipgon, en deibin kamat langa det wan pleis gulum Ilim. Det pleis bin abum 12 springwoda en 70 pamtri deya langa det pleis, en ola pipul bin kemp deya na.