1 Wal aibin kipgon tok, “YAWEI det boswan God bin shoum langa mi najawan drim, en langa det drim aibin luk baskit garram loda kukwan frut daga. 2 En YAWEI bin askim mi, ‘Eimos, wanim yu gin luk?’ ”

En aibin tok, “Mi luk bigmob kukwan frut daga langa baskit.”

“En YAWEI bin tok, ‘Wal ai gin luk main pipul Isreil. Olabat jis laik det frut langa det baskit weya redi blanga sambodi blanga binijimap. Wal lagijat du ai garra binijimap main pipul olabat. En ai kaan album miselp blanga holdimbek miselp enimo. Ai garra panishim olabat. 3 Langa det dei na, dei kaan abum hepiwan song langa det Serramoni Pleis. Dei garra ol nogudbinji en kraikraibat. Ola dedbala pipul bodi garra leidan ebriweya. En detlot pipul weya tjakidaweibat detlot dedwan bodi, olabat jis laik detlot dedwan bodi du weya kaan tok.’ Lagijat na YAWEI bin tok.”

4 Brom deya aibin tok, “Yumob irrim mi na yumob Isreil pipul. Yumob tridimbat detlot lobala pipul brabli nogudbalawei en yumob oldei wandim blanga binijimap detlot powan pipul langa dijan kantri. 5 Wen yumob oldei go langa det Serramoni Pleis blanga weship langa det Sebathdei en blanga det Nyumun serramoni, yumob oldei jinggabat blanga det dei garra gowei kwikbala, wulijim yumob gin selimbat ola enijing. Yumob oldei jinggabat blanga selimbat ola sid daga en selimbat detlot enijing loda trikibalawei en yumob garra robimbat pipul. 6 Yumob oldei askimbat pipul blanga peiyimbat bigmob mani blanga detlot rabishwan daga. Sabi det pomen weya im nomo garram eni mani blanga baiyim enijing en im kaan peiyimbek enibodi mani weya im owim im? Wal yumob oldei baiyim det pomen blanga jidan yumob ronwan wekinmen.

7 “Ola Isreil pipul brabli praudbala blanga YAWEI, dumaji im jidan olabat God, en blanga tharran na, imbin tok strongbalawei. ‘Ai kaan neba foget detlot nogudbala ting weya deibin dumbat. 8 Dijan graun garra sheik brabliwei en ebribodi langa dijan kantri garra ol jidan brabli nogudbinji en ola graun langa dijan kantri garra sheik nomo lilbit du. En im garra kipgon sheiksheik wulijim det rafwan Nail Riba weya im oldei gowap en godan.

9 “ ‘Det taim garra kaman bambai blanga panishim yumob. Wen im dinataim, ai garra meigim det san godan. En wen im garra jidan deitaim, ai garra meigim det deitaim jidan dakbala. Mi na, YAWEI det boswan God bin tok. 10 Det taim garra kaman wen yumob garra majurrumap miselp blanga abum serramoni weya ebribodi oldei jidan brabli gudbinji en oldei singsing mijamet, bat ai garra tjeinjim det taim en meigim fyunral taim blanga yumob. Jis laik det men weya im sorisori miselp en kraikraibat blanga im san hubin dai, dumaji imbin abum oni wan san, wal lagijat na yumob garra kadim miselp heya en yumob garra werrimon rabishwan klos du. Det dei garra jidan brabli nogud, dumaji brom gudbala dei im garra jidan nogudbala dei.

11-12 “ ‘Det taim garra kaman blanga panishim yumob. Ai garra jandim samting blanga meigim yumob lukabat mi, en blanga meigim yumob wandim irrim mi tok en blanga gibit wed langa yumob Isreil pipul. Ebriwei yumob garra lukabat mi, brom det solwoda gulum Dedsi raidap langa det bigwan solwoda gulum Medatareiniyan en nowathsaid en sanraiswei langa ol dislot kantri. Yumob garra adwek lukabat mi, bat yumob kaan faindim mi. Det taim na garra kaman weya ai garra meigim yumob pipul langa dislot kantri jidan hanggribala, bat yumob kaan jidan hanggribala blanga daga en yumob kaan jidan thestibala blanga woda. Wal lagijat du, yumob garra jidan hanggribala en thestibala blanga irrim det wed brom mi. Mi na, YAWEI det boswan God bin tok. 13 En langa det dei du, detlot men en wuman weya dei jidan brabli strongbalawei, olabat du garra buldan ebriwei, dumaji olabat nomo bin abum eni woda blanga dringgim. 14 En langa detlot pipul, weya meigim pramis langa detlot laiyawan drimin, deya langa Sameriya, dei tok brabli strongbalawei blanga det drimin sheip weya im jidan deya langa det taun gulum Den, en blanga det najawan drimin sheip weya jidan deya langa det taun gulum Biyashiba. Wal ol detlot pipul na, dei garra ol buldan en dei garra ol dai en olabat kaan gidap igin.’ Lagijat na YAWEI bin tok.”