1-2 Wal King Deibid bin majurrumap ola solja blanga im, en imbin kadimat olabat, en imbin meigim thribala bigwan grup, en imbin meigim Jowab en im braja Ebishai en det najawan men Itai jidan bos blanga detlot thribala bigwan grup.

Afta na King Deibid bin kadimat detlot thribala bigwan grup, en imbin meigim olabat jidan lilwan grup garram 1,000 men, en imbin kadimat ol detlot lilwan grup, en imbin meigim olabat jidan langa lilwan grup garram 100 men, en imbin meigim wanbala boswan solja jidan lida blanga ebri grup.

Afta na King Deibid bin dalim detlot solja blanga go en fait langa Ebsalom, en imbin dalim olabat, “Ai garra kaman garram yumob blanga fait du.”

3 Wal detlot solja bin tok, “Nomo. Yu kaan kaman garram melabat, dumaji yu brabli haibala men, en detlot enami blanga wi wandim yu na. Dei kaan jinggabat melabat. Nomeda melabat ranawei brom olabat, bat stil dei kaan jinggabat melabat. En nomeda dei kilim bigmob brom melabat ded, bat stil dei kaan jinggabat melabat, dumaji oni yu na dei wandim. Wal im mobeda yu stap iya langa dis taun Mahanaim en album melabat brom iya gin.” Lagijat na detlot solja bin tok.

4-5 Wal King Deibid bin tok, “Wal gowan. Ai garra dum wanim yumob reken im gudbala blanga mi blanga dum.”

Afta na King Deibid bin dalim Jowab, Ebishai en Itai, “Yumob garra jinggabat mi en nomo ardim main boi Ebsalom.” Lagijat na King Deibid bin tok langa detlot thribala boswan solja, en ol detlot najalot solja bin irrim im gibit det wed langa olabat.

Afta na King Deibid bin jandap wansaid langa det geit blanga det taun, en imbin luk ol detlot solja blanga im gopas langa im blanga go langa det fait, en imbin luk ebri grup gopas.

6 Wal ol detlot solja blanga King Deibid bin go langa det kantri blanga det Ifreiyim klen, en deya na langa det thikwan bush kantri deibin fait langa ol detlot Isreil solja, 7 en deibin bidim detlot Isreil solja brabliwei, en 20,000 solja bin dai. 8 Det fait bin ebriweya langa det kantri, en bigmob solja bin dai brom det fait. Bat bigismob solja bin dai brom det thikwan bush kantri, dumaji imbin raf kantri.

9 Wal Ebsalom bin deya raidimbat im dongki, en wen imbin luk sambala solja blanga King Deibid, imbin gibit miselp, en det dongki bin deigim im andanith langa bigwan tri gulum ouktri, en det hed blanga Ebsalom bin gitstak langa det wadipat langa det tri, en det dongki bin kipgon, en imbin libum Ebsalom deya gin heinginap langa det tri.

10 Wal wanbala solja blanga King Deibid bin luk Ebsalom heinginap deya, en imbin go langa Jowab, en imbin dalim im, “Bos, aibin luk Ebsalom heinginap langa tri.”

11 Wal Jowab bin tok, “If yubin luk im, wal wotfo yu nomo bin kilim im ded deya gin? If yu bina kilim im ded, wal ai bina gibit yu bigmob mani en speshalwan belt.”

12 Wal det solja bin tok, “Nomo. Nomeda yu bina gibit mi brabli bigismob mani, bat stil ai nomo bina dum enijing blanga ardim det san blanga King Deibid, dumaji melabat bin irrim det wed weya det king bin dalim yu en Ebishai en Itai nomo blanga ardim det san blanga im. 13 En ai sabi if ai bina kilim im en nomo duwit langa det wed blanga King Deibid, wal im bina irrim det stori, dumaji im oldei irrimbat ebrijing, en im bina gitwail langa mi, en yu nomo bina album mi.” Lagijat na det solja bin tok.

14 Wal Jowab bin tok, “Ai kaan weistimbat taim irrimbat yu.” En streidawei imbin gajim thribala spiya, en imbin go langa det pleis weya Ebsalom bin heinginap langa det tri, en imbin faindim im deya stil laibala, en imbin kilim im garram detlot thribala spiya, 15 en afta tenbala solja blanga Jowab bin gowap langa Ebsalom, en deibin binijimap im.

16 Wal Jowab bin dalim im wekinmen blanga blowim det wisul blanga stapam det fait, en det wekinmen bin blowim det wisul, en ola solja blanga im bin stap fait langa detlot Isreil solja, 17 en ol detlot Isreil solja bin gobek langa olabat ron kemp.

Wal ol detlot solja blanga Jowab bin gobek langa im, en deibin gajim det bodi blanga Ebsalom, en deibin tjakam det bodi langa dipwan hol deya gin langa det thikwan bush kantri, en deibin gaburrumap det bodi garram bigmob ston.

18 Wal Ebsalom nomo bin abum eni san blanga meigim det femili lain blanga im kipgon, en wen imbin stil jidan laibala, imbin bildimap bigis ting garram ston deya langa det pleis gulum King Beli. Imbin bildimap det ting blanga meigim ola pipul jinggabat im wulijim det neim blanga im kaan binij. En tudei dei gulum det ting Ebsalom Ston.

19 Afta na Ahimas det san blanga Seidok bin go langa Jowab, en imbin tok, “Yu garra larram mi go langa King Deibid en gibit im det gudnyus blanga det fait weya YAWEI det trubala God bin seibum im brom im enami olabat.”

20 Wal Jowab bin tok, “Nomo. Yu kaan deigim eni gudnyus langa King Deibid tudei. Bambai yu gin deigim wed langa im. Bat yu kaan deigim tudei, dumaji det san blanga im bin dai.”

21 Afta na Jowab bin dalim det wekinmen hubin jidan laiga prisana blanga im brom det kantri gulum Ithiyopiya, “Yu garra go langa King Deibid, en yu garra dalim im ebrijing weya yubin luk bin hepin iya tudei.”

22 Wal wen det wekinmen bin gowei, Ahimas bin kipgon askimbat Jowab, “Nomeda wanim garra hepin langa mi, bat stil ai wandim yu garra larram mi go langa King Deibid en gibit im det nyus.”

Wal Jowab bin tok, “Main boi, wotfo yu wandi deigim det nyus langa King Deibid? Nobodi kaan gibit yu enijing blanga tharran.”

23 Wal wanmo Ahimas bin tok, “Nomeda langa mi, bat stil ai wandi go.”

En Jowab bin tok, “Wal gowan.”

Wal Ahimas bin ran na olawei thru langa det Jodan Riba kantri raidap imbin gajimap det wekinmen, en imbin pasim im.

24 Wal King Deibid bin jidanbat langa midul langa det dubala geit langa det taun gulum Mahanaim, en wanbala wekinmen hubin oldei wotjimbat ola geit bin gowap ontop langa det wol, en wen imbin lukinatbat kantri, imbin luk sambodi kaminap langa det roud, 25 en imbin jingat langa King Deibid, en Deibid bin dalim im “If im kaman miselp, wal im bringimap gudnyus.”

Wal det sambodi bin kaman gulijap na, 26 en det wekinmen bin luk najawan men kaminap biyain du, en det wekinmen bin jingat langa det najawan wekinmen deya langa det geit, “Yu luk! Najawan men kaminap biyain.”

Wal King Deibid bin tok, “Det najawan men im bringimap gudnyus du.”

27 Wal det wekinmen ontop langa det wol bin tok, “Ai gin luk det feswan men gudwei na, en im ran jis laik Ahimas oldei ran.”

Wal King Deibid bin tok, “Im gudbala men tharran, en im bringimap gudbala nyus du.”

28 Wal wen Ahimas bin kamat langa King Deibid, imbin nildan lida langa im blanga shoum rispek langa im, en imbin tok, “Bos, wi garra preisim YAWEI. Im na det God blanga yu, en wi garra preisim im, dumaji imbin meigim yu bidim detlot men hubin gibit yu bekboun en wandi kilim yu ded.”

29 Wal King Deibid bin askim im, “Wotabat det san main Ebsalom? Im rait?”

Wal Ahimas bin dalim im laiyawei, “Bos, wen yu wekinmen Jowab bin jandim mi, aibin luk bigmob pipul deya. Bat ai nomo sabi wanim bin hepin.”

30 Wal Deibid bin tok, “Wal yu jandap deya en weit.” En imbin duwit langa im.

31 Afta na det wekinmen brom Jowab bin kamat deya, en imbin dalim King Deibid, “Bos, aibin bringimap gudnyus blanga yu. Tudei na YAWEI bin meigim yu bidim detlot pipul hubin gibit yu bekboun.”

32 Wal Deibid bin tok, “Wotabat Ebsalom det san main? Im rait?”

Wal det mesinja bin tok, “Bos, im mobeda ola enami blanga yu en ol detlot pipul hubin gibit yu bekboun bina dai seimwei laik imbin dai.”

33 Wal wen King Deibid bin irrim det bednyus blanga im san, imbin brabli nogudbinji, en imbin go insaid langa det rum weya bin jidan ontop langa det wol deya gin langa det geit, en imbin kraikrai detmatj en jingat olawei, “Main san! Ebsalom main san! Wotfo yubin dai? Mobeda ai bina dai. Ebsalom main san!”