108
[Psalm lal David]
Sie Pre In Suk Kasru Lainyen Mwet Lokoalok
(Psalm 57:7–11; 60:5–12)
1 Arulana pulaik insiuk, O God!
Nga fah on ac kaksakin kom.
Ngutalik, O ngunik!
2 Ngutalik, harp nutik ac lyre nutik!
Nga ac fah okasak faht uh.
3 Nga fah sot kulo nu sum, O LEUM GOD, inmasrlon mutunfacl uh.
Nga fah kaksakin kom inmasrlon mwet uh.
4 Lungse kawil lom sowak fulat liki kusrao;
Oaru lom sun pukunyeng uh.
5 O God, akkalemye fulat lom yen engyeng uh,
Ac wolana lom fin faclu nufon.
6 Molikutla ke ku lom. Topuk pre luk,
Tuh mwet su kom lungse fah ku in moliyukla.
7 Liki acn mutal sel, God El fahk,
“Ke sripen nga kutangla, nga fah kitalik acn Shechem
Ac oralik Infahlfal Sukkoth nu sin mwet luk.
8 Ma luk pa acn Gilead, oayapa acn Manasseh;
Acn Ephraim, mwe loeyen sifuk,
Ac acn Judah pa scepter* scepter: liye ke Kalmen Kutu Kas. luk.
9 A nga fah orekmakin acn Moab oana sie ahlu in winwin luk;
Nga fah sisang fahluk luk nu fin acn Edom
In akkalemye lah ma luk pa acn we.
Nga fah sala ke kutangla luk fin mwet Philistia.”
10 O God, su ac fah usyula nu in siti se oasr pot we?
Su ac fah kolyula nu Edom?
11 Ya kom siskutla na pwaye?
Ya kom ac tia wi mwet mweun lasr uh illa?
12 Kasrekut lain mwet lokoalok lasr,
Mweyen kasru sin mwet uh wangin sripa.
13 Ke God El wi kut lac, kut ac fah kutangla;
El ac fah kutangla mwet lokoalok lasr uh.