65
[Psalm lal David]
Kaksak Ac Sang Kulo
1 O God, fal kut in kaksakin kom in Zion
Ac karingin wulela lasr nu sum,
2 Mweyen kom topuk pre.
Mwet in acn nukewa ac fah tuku nu yurum
3 Ke sripen ma koluk lalos.
Ma sutuu lasr uh kutangkutla,
Tusruktu kom nunak munas nu sesr kac.
4 Insewowo elos su kom sulela,
Su kom use in muta in acn mutal sum.
Kut ac fah insewowokin ma wo su oan in lohm sum,
Oayapa ke mwe insewowo in Tempul mutal lom.
5 Kom topuk kut ke kom ase kutangla nu sesr,
Ac kom oru pac ma wolana in molikutla.
Mwet fin faclu nufon,
Ac yen loeslana in meoa, elos wi pac lulalfongi in kom.
6 Kom oakiya eol uh ke ku lom,
Su mwe akkalemye ku lulap lom.
7 Kom akmisye ngirngir in meoa uh
Ac pusren noa uh;
Kom akmisye pac fohsak lulap lun mwet uh.
8 Faclu nufon fwefela in liye
Ma usrnguk su kom oru.
Orekma lom oru tuh mutanfahl nukewa
In sasa ke engan, liki acn kutulap na nwe roto.
9 Kom supwama af nu faclu in akkalemye lah kom karingin acn uh.
Kom akkasrupye fokin acn uh in isus fahko wo.
Kom nwakla infacl uh ke kof,
Ac kom sang tuh in oasr fokin acn uh.
Pa inge oreya sum:
10 Kom supwama af na matol nu in imae
Ac sroksrokunak infohk uh;
Kom akfisrasrye fohk uh ke af srisrik,
Ac oru tuh sacn srisrik in kapak.
11 Fuka kasrupiyen kosrani lulap su kom oru inge!
Acn nukewa kom som nu we, pukanten ma we.
12 Inimae nwanala ke un kosro;
Ac pe eol uh sessesla ke engan.
13 Inimae nwanala ke sheep;
Ac infahlfal uh sessesla ke wheat.
Ma inge nukewa on ac sasa ke engan.