LEVITICUS
Tukakinyen Book In LEVITICUS
Ma simla in book in Leviticus pa oakwuk nu ke alu ac tukeni mutal lun mwet Israel in pacl oemeet ah, ac oayapa ma nu sin mwet tol, su ma kunalos pa in karingin oakwuk inge in fahsr oana ma sapkinyuk.
Mwe nunak yohk lun book se inge pa ke luman mutal lun God, ac oayapa ke ouiyen alu ac ouiyen moul lun mwet uh tuh elos fah ku in sruokyana akupasri lalos yurin “God mutal lun Israel.”
Kas su eteyuk oemeet in book se inge pa oan in chapter 19 verse 18 — kas ma Jesus el fahk mu ma sap yohk akluo, su fahk: “Lungse mwet tulan lom oana ke kom lungse kom sifacna.”
Takla Lun Koanon Book Se Inge
Ma sap nu ke mwe sang ac mwe kisa 1:1—7:38
Akmusrala lal Aaron ac wen natul nu ke mwet tol 8:1—10:20
Ma sap ke ma su nasnas ac ma tia nasnas 11:1—15:33
Len in Eela Ma Koluk 16:1–34
Ma sap ke moul mutal ac alu mutal 17:1—27:34
1
Mwe Kisa Ma Fonna Isisyak
1 LEUM GOD El pang nu sel Moses liki Lohm Nuknuk Mutal sin LEUM GOD su nien muta lal, ac sang nu sel oakwuk inge, 2 su ma nu sin mwet Israel ke pacl elos oru kisa lalos.
Ke pacl ma sie mwet el kisakin soko kosro natul, ku in cow soko ku sheep soko ku nani soko. 3 El fin ac sang soko sin cow natul in mwe kisa firir, el ac enenu in use soko cow mukul ma wangin ma koluk ke manol. El ac enenu in use nu ke nien utyak ke Lohm Nuknuk Mutal sin LEUM GOD tuh LEUM GOD Elan insewowo sin mwet sac. 4 Mwet sac ac enenu in filiya paol fin sifen cow soko ah, na ac fah pangpang sie mwe kisa in eela ma koluk lal. 5 El fah uniya cow mukul soko ah we, ac mwet tol in fwil natul Aaron fah asang srah kac nu sin LEUM GOD, ac fwela siska akosr ke loang se ma oan ke acn in utyak nu in Lohm Nuknuk Mutal. 6 Na el fah sukela kulun cow soko ah, ac luseya ikwa uh, 7 na mwet tol elos fah takunla etong fin loang uh ac akosak. 8 Elos fah filiya ipin kosro ah fin e uh, wi pac sifa ac kiris kac uh. 9 Mwet sac fah ohlla koanonsia ac pukinnien cow uh, na mwet tol se ma oru kisa uh fah esukak ma inge nukewa fin loang uh. Foulin mwe mongo ma kisakinyuk inge mwe insewowo nu sin LEUM GOD.
10 Mwet se fin kisakin soko sin sheep ku nani natul, ac enenu na in ma mukul soko su wanginna ma koluk ke manol. 11 El fah uniya ke layen epang ke loang sac, ac mwet tol fah fwela siska akosr ke loang sac ke srah. 12 Tukun mwet sac luseya kosro soko ah, na mwet tol se ma orekma ke kisa uh fah filiya ip nukewa inge fin e sac, wi sifa ac kiris kac. 13 Mwet sac enenu in ohlla koanonsia ac pukinnia kewa ke kof, na mwet tol sac fah sang mwe kisa inge nu sin LEUM GOD, ac esukak ma nukewa fin loang uh. Foulin mwe mongo ma kisakinyuk inge mwe insewowo su sin LEUM GOD.
14 Mwet se fin ac kisakin sie won tuh in mwe kisa firir, enenu na in wuleoa se ku siena wule. 15 Mwet tol fah use nu ke loang uh, furala kwawa ac esukak sifa uh fin loang uh. Srah kac uh ac fah aksororyeyukla nu sisken loang uh. 16 El fah eisla tenguna ac koanonsien won sac, ac sisla nu layen kutulap ke loang uh, nu ke nien fil apat uh. 17 El fah sruokya pao luo ah, ac seya mano sac, tusruktu pao luo ac fah tia ayukla liki mano sac, na el ac esukak nufonna fin loang uh. Foulin mwe mongo ma kisakinyuk inge mwe insewowo nu sin LEUM GOD.